ޗާގޯސް މައްސަލައާއި ގުޅިގެން ކުރީގެ ބަންޑާރަނައިބު ޑރ މުހައްމަދު މުނައްވަރު ދައްކަވަމުން ދަނީ ނަތީޖާއެއް ނެތް ހުސް ވާހަކަތަކެއް ކަމަށް ދާޚިލީ ވަޒީރު އަދި ސަރުކާރު ކޯލިޝަން ޕާޓުނަރު އިމްރާނު އަބްދުﷲ ވިދާޅުވެއްޖެ އެވެ.
ޗާގޯސް މައްސަލައިގައި ދިވެހި ސަރުކާރުން އަމަލުކޮށްފައިވަނީ ގޯސްކޮށް ކަމަށާއި، އެކަމާއި ގުޅިގެން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާކަމަށް ކުރީގެ ބަންޑާރަ ނައިބު ޑރ މުޙައްމަދު މުނައްވަރު ވަނީ ވިދާޅުވެފައެވެ.
ޑރ މުނައްވަރު މިފަދައިން ވިދާޅުވެފައިވަނީ އެ މައްސަލައާއި ގުޅިގެން ގިނަ ސިޔާސީ ޕާޓީތަކުންނާއި ފަންނީ ބޭބޭފުޅުން ގުޅިގެން ބޭއްވި ޕްރެސް ކޮންފަރެންސްގައި ވާހަކަދައްކަވަމުން ނެވެ.
ޑރ މުނައްވަރު ވިދާޅުވީ ދިވެހިރާއްޖޭގެ ދެކުނުގެ ސަރަހައްދަކީ ކަނޑުތަކާއި ބެހޭ ޤާނޫނާއި އެއްގޮތްވާ ގޮތުގެ މަތިން 200 ނޮޓިކަލް މޭލު ކަނޑައަޅާ ކަނޑުގެ ޗާޓު ކުރަހާ އެ ކުރެހުންތައް އދ އަށް ވެސް ހުށައަޅާފައިވާ ކަމަށެވެ.
ކަނޑުގެ ސަރަހައްދު ކަނޑައެޅުމުގެ މި މައްސަލައިގައި ރާއްޖޭގެ ސަރަހައްދުން ބައެއް ގެއްލިގެން ދިޔައީ މޮރިޝަސްގެ ސިޔާދަތު ރާއްޖެއިން ގަބޫލުކޮށް އެ މައްސަލައިގައި ދިވެހިން ޒަމާނުއްސުރެ ދަމަހައްޓަމުން އައި ސްޓޭންޑް ދޫކޮށްލުމުން ކަމަށް ޑރ މުނައްވަރު ވިދާޅުވި އެވެ.
އެގޮތުން ޗާގޯސް އަކީ މިހާރުވެސް މިލިޓަރީ ބޭހަކަށް ވެފައި އެތަނުގައި ހަރަކާތްތެރިވަނީ އިނގިރޭސިން ކަމަށް ވާއިރު، ޗާގޯސްގެ ސިޔާދަތު އޮތީ ކޮން ބަޔަކަށްތޯ އަދި އޮތީ ކަނޑަނޭޅިކަމަށް ޑރ މުނައްވަރު ވިދާޅުވި އެވެ. އޭގެ އިތުރުން ޑރ މުނައްވަރު ވިދާޅުވީ ޗާގޯސް އަކީ ދިވެހިރާއްޖޭގެ ތަނެއްކަމަށް ދިވެހި ސަރުކާރުތަކުން ދައުވާކޮށްފައި ނެތްކަމަށް ބުނާ ވާހަކައަކީ ހަޤީގަތެއް ކަމަށެވެ.
އެހެން ނަމަވެސް އިން ވަކި ކުރުމުގެ މައްސަލައިގައި ޗާގޯސް އަކީ މޮރިޝަސްގެ ތަނެއް ތޯ ނުވަތަ އިނގިރޭސިންގެ ތަނެއްތޯ ބަލާކަށް ނުޖެހޭނެ ކަމަށާއި، ދިވެހިރާއްޖޭގެ ކަނޑުގެ ސަރަހައްދާއި ފުށުއަރާ އެއްވެސް އިތުރު ގައުމެއް ދެކުނުން 200 ނޮޓިކަލް މޭލު ސަރަހައްދުގައި ނެތްކަމަށް އޭނާ ވިދާޅުވި އެވެ. އަދި އެ ސްޓޭންޑު ސަރުކާރުން ދޫކޮށްލުމަކީ ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލެން މެދުވެރިވި ސަބަބުކަމަށް ޑރ މުނައްވަރު ވިދާޅުވި އެވެ.
ޑރ މުނައްވަރުގެ އެ ވާހަކަތަކަށްފަހު ޗާގޯސްގެ މިލްކުވެރިކަމަށް ދިވެހިރާއްޖެއިން ދައުވާކޮށްފައި ނުވާކަމަށް ޑރ މުނައްވަރު ވިދާޅުވި ވާހަކަ ބައެއް ނޫސްތަކުން ރިޕޯޓުކޮށް، އެހެން ވިދާޅުވި މަފްހޫމު އޮޅޭގޮތަށް ރިޕޯޓުކޮށްފައި ވެއެވެ.
އެކަމާއި ގުޅިގެން އިމްރާނު ކުރެއްވި ޓްވީޓުގައި ވިދާޅުވީ ޗާގޯސް އަކީ ރާއްޖޭގެ ތަނެއްކަމަށް ޑރ މުނައްވަރަށް ވިދާޅުވާން ކެރިވަޑައި ނުގަތުމަކީ އެ މައްސަލައިގައި ޑރ މުނައްވަރު ވިދާޅުވަމުންދާ ވާހަކަތަކަކީ ހަގީގަތެއް ނެތް ހުސް ވާހަކަތަކެއްކަން ހާމަކޮށްދޭ ކަމެއް ކަމަށެވެ.
"ޗާގޯސް އަކީ ރާއްޖޭގެ ތަނެއްކަމަށް ޑރ މުނައްވަރަށް ވިދާޅުވާން ކެރިވަޑައި ނުގެންނެވުމުން މި ހުރިހާ ދުވަހު ވިދާޅުވީ ނަތީޖާއެއް ނެތް ހުސް ވާހަކަތަކެއްކަން މިއަދު ވަރަށް ސާފުކޮށް ހާމަވޭ"
ހޯމް މިނިސްޓަރު އިމްރާނު
ޗާގޯސް މައްސަލައިގައި ސަރުކާރު ކޯލިޝަންގައި ތިބި ބައެއް ސިޔާސީ ޕާޓީތައްވެސް ހިމެނޭހެން ބޭއްވި ޕްރެސް ކޮންފަރެންސްއަށް ފަހު އެ މައްސަލައިގައި ސަރުކާރުން އަމަލުކުރި ގޮތް ދިފާއު ކުރެއްވުމަށް ސަރުކާރުގެ ވަޒީރުންނާއި، ސިޔާސީ މަޤާމުތަކުގައި ތިއްބެވި ބައެއް ބޭބޭފުޅުންވެސް ވަނީ ޑިފެންސަށް ފައިބައި ވަޑައިގަންނަވާފަ އެވެ.
އަދި އެ ކޮންފަރެންސްއަށް ފަހު ސަރުކާރު ކޯލިޝަންގައި ހިމެނޭ ބައެއް ސިޔާސީ ޕާޓީތަކުގެ އެތެރޭގެ މަޝްރަހު ވެސް ވަނީ ހޫނުވެގެން ގޮސްފައެވެ.
Advertisement
This content is created and paid for by advertisers and does not involve Voice Journalists
