އާސަހަރާގައި އަންހެނުން ނަމާދުކުރާ ބައި ބޮޑުކުރަން މާލެ ސިޓީ ކައުންސިލުން ނިންމައިފިއެވެ.

ސިޓީ ކައުންސިލުން މި ނިންމުން ނިންމާފައި ވަނީ  އެ ކައުންސިލްގެ ހަތަރުވަނަ ދައުރުގެ 100 ވަނަ ރަސްމީ އާއްމު ޖަލްސާގައެވެ.

ސިޓީ ކައުންސިލްގައި ކުރިއަށް ދިޔަ ނޫސްވެރިންގެ ބައްދަލުވުުމުގައި މޭޔަރު ޑރ. މުހައްމަދު މުއިއްޒު ވިދާޅުވީ، އާއްމުކޮށް މާލޭގައި ބޭނުންކުރާ ސަހަރާއަކީ އާސަހަރާ ކަމަށް ވެފައި، އެތަން އޮންނަނީ ވަރަށް ބޮޑަށް ތޮއްޖެހިފައި ކަމަށެވެ. އެހެންކަމުން ސަހަރާ އަޕްގްރޭޑް ކުރުމުގެ މަސައްކަތް ކުރަން ސިޓީ ކައުންސިލުން ނިންމީ ކަމަށެވެ.

މުއިއްޒު ވިދާޅުވީ ސަހަރާގައި މަޑުކޮށްލާނެ ތަނެއް ނެތުމުން އާއިލާތައް ތިބެން ޖެހެނީ ގާފޮޅުމަތީގައާއި ފާރުގައި ލެނގިގެން ނުވަތަ މަގުމަތީގައި ކަމަށެވެ.

އާއިލާއާއެކު ހަމަޖެހިލައިގެން ތިބެނޭނެ ގޮތެއް އާސަހަރާގައި ނެތް ކަމަށް މުއިއްޒު ފާހަގަ ކުރެއްވިއެވެ.

"އެ ސަހަރާގަ، އެއްކަމަކަށް، އަންހެން ބޭފުޅުން ނަމާދު ކުރާ ޖާގަ ވަރަށް ކުޑަވާނެ. އަމުދުން ތަންކޮޅެއް ގިނަ ބޭފުޅުން ޒިޔާރަތް ކުރާ ކަހަލަ ވަގުތު ވަގުތުތަކުގަ ހަމަ ވަރަށް ބޮޑަށް ކުޑަކަން ފާހަގަ ކުރެވޭ. އެހެންވީމަ އަޅުގަނޑުމެން މި ނިންމީ އަންހެން ބޭފުޅުންނަށް ނަމާދުގަ ބައިވެރިވުމަށް ޖާގަ އިތުރު ކުރުމަށާ އަދި ޖުމްލަކޮށް ފިރިހެން ބޭފުޅުންނަށް ވެސް ހަމަ މިސްކިތުގެ ޖާގަ އިތުރުކުރަން" މުއިއްޒު ވިިދާޅުވިއެވެ.

މީގެ އިތުރުން މުއިއްޒު ވިދާޅުވީ، ސަހަރާގެ މަސައްކަތް ނިމޭއިރު އާއިލާތައް މަޑުކޮށްލައިގެން ތިބުމަށް ބޮޑުކޮށް ތަނެއް ހަދާނެ ކަމަށާއި އެތަނުގައި އޭސީލައި ސޯފާ ބަހައްޓާނެ ކަމަށެެވެ.

އަދި ކުދި އާއިލާތަކަށް ހާއްސަކޮށްގެން ކުދި ދެ ވެއިޓިން ރޫމެއް ހަދާނެ ކަމަށްވެސް މުއިއްޒު ވިދާޅުވިއެވެ.