ރާއްޖޭގެ ފޮރިން މިނިސްޓަރު ކަމުގައި ދުންޔާ މައުމޫން ހުންނެވިއިރު، ރާއްޖެއިން ބޭރަށް ވިލާތު ވިލާތަށް ކުރެއްވި ދަތުރުތައް ކުރެއްވީ އަމިއްލަ ޖީބުން ޚަރަދު ކުރައްވައިގެންތޯ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ސުވާލު ކުރައްވައިފިއެވެ.

ރޮޒެއިނާ މިފަދައިން ވިދާޅުވެ ދުންޔާއަށް ބަހުގެ ހަމަލާތަކެއް އަމާޒުކުރައްވާފައި ވަނީ، އިނގިރޭސިވިލާތުގެ ރަސްގެފާނު ޗާލްސް 3 ވަނަ، ރަސްކަމުގެ ތަޚުތުގައިވެޑުވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ކުރައްވާ ރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު އިނގިރޭސިވިލާތަށް ވަޑައިގެންނެވުމާއި ގުޅިގެން އެކަމަށް ފާޑުވިދާޅުވެ ދުންޔާ ކުރެއްވި ޓުވީޓަށް ރައްދު ދެއްވަމުންނެވެ.

ދުންޔާ ރައީސް ޞާލިހުގެ އެ ދަތުރުފުޅާއި ގުޅިގެން ކުރެއްވި ޓުވީޓުގައި ވިދާޅުވީ، ޓެކްސްޕޭޔަރުންގެ ފައިސާއިން 9 މިލިއަން ހަރަދު ކޮށްގެން އެފަދަ ދަތުރު ކުރާއިރު ކުޑަކުދިންގެހިޔާއަށް މިއަހަރު ބަޖެޓުކުރީވެސް 9 މިލިއަން ރުފިޔާ ކަމަށެވެ. އަދި އެ ރަސްމިއްޔާތުގައި ޒޫމު ކޯލަކުން ބައިވެރި ވެވިދާނެކަމަށްވެސް ދުންޔާ ވިދާޅުވި އެވެ. 

Advertisement

ދުންޔާއަށް ރައްދު ދެއްވައި ރޮޒޭނާ ވަނީ ރާއްޖޭގެ ފޮރިން މިނިސްޓަރުކަމުގެ މަޤާމުގައި ދުންޔާ ހުންނެވިއިރު، ވިލާތު ވިލާތަށް ކުރެއްވި ދަތުރުތައް ކުރެއްވީ އަމިއްލަ ޖީބުން ޚަރަދުކޮށްގެންތޯ ސުވާލު ކުރައްވާފައެވެ.

"ވެއްޖެ ފިނޭންސް އިން މި ބޭފުޅާގެ ދަތުރުތަކަށް ދައުލަތުން ކޮށްފައިހުރި ޚަރަދު ބަލަން. ތަންދޮރު ނޭނގޭ މީހުން ދައްކާ ކަހަލަ ވާހަކަ ނުދައްކަވާ!." ރޮޒައިނާ ވިދާޅުވި އެވެ. 

މިއާއެކު ރޮޒައިނާ ވިދާޅުވީ ދުންޔާ ދަތުރު ތަކަށް ކުރެއްވި ހުރިހާ ޚަރަދެއް ކުރެއްވުމަށްފަހުވެސް ނަތީޖާވއަކަށްވީ ކޮމަންވެލްތުންވެސް ވަކިވެ، ދުނިޔޭގެ ގިނަ ޤައުމުތަކާއި ގުޅުން ކަނޑާލުންކަމަށެވެ. 

"އެކަމަކު ރާއްޖޭގެ ރައީސުލްޖުމްހޫރިއްޔާ ތަނަކަށް ވަޑައިގަތީމަ އެކަން ހަޖަމު ނުވެގެން ތިބޭފުޅާ ތިއުޅުއްވަނީ. ދައުވަތު ނުލިބުނީމަ މާބޮޑަށް ހިތްދަތިވީތޯ؟" ރޮޒައިނާ ވިދާާޅުވި އެވެ.