ފުވައްމުލަކު ސްކޫލްގެ ބާނީ އަދި އެސްކޫލްގެ ކުރީގެ ނާޒިރު ފުވައްމުލަކު ދޫޑިގަން، ލައިޓް ޢަބްދުލްޙަމީދު ޢަލީދީދީ ނިޔާވެއްޖެއެވެ.
ފުވައްމުލަކު ސްކޫލްގެ ބާނީ، ޢަބްދުލްޙަމީދު ޢަލީދީދީ ނިޔާވުމާއި ގުޅިގެން ފުވައްމުލަކަށް އުފަން، ނާއިބު ރައީސް ފައިސަލް ނަސީމް ކުރެއްވި ޓްވީޓެއްގައި ވިދާޅުވީ ޢަބްދުލްޙަމީދަކީ އެމަނިކުފާނު ގެވެސް އުސްތާޛެއް ކަމަށެވެ. އަދި އަބްދުލް ހަމީދު އަލި ދީދީއަކީ ރަށުގެ ތަޢުލީމަށް އަގުނުކުރެވޭ ފަދަ ހިދުމަތްތަކެއް ކުރެއްވި ބޭފުޅެއް ކަމަށްވެސް ނައިބު ރައީސް ވިދާޅުވި އެވެ.
"ހަމީދު ބޭބޭގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރު ކުރައްވައި އާއިލާއަށް ކެތްތެރިކަން މިންވަރު ކުރައްވާށި." ނާއިބު ރައީސް ކުރެއްވި ޓުވީޓުގައި ދުޢާ ކުރައްވާފައި ވެއެވެ.
ޢަބްދުލްޙަމީދު ޢަލީދީދީ ވަނީ ފުވައްމުލަކު ދަރިވަރުންނަށް ތަޢުލީމް ދެއްވުމަށް އަގުހުރި މަސައްކަތްތަކެއް ކޮށްދެއްވައިފައެވެ. އެގޮތުން ފުވައްމުލަކުގައި އަމިއްލައަށް ސްކޫލެއް ބިނާކުރައްވައި "މަކުތަބުއްނޫރާނިއްޔާ"ގެ ނަމުގައި 1969ވަނަ އަހަރު ސްކޫލެއް ރަޖިސްޓްރީ ކުރެއްވިއެވެ. އޭގެ ފަހުން ސްކޫލްގެ ނަން "ފުވައްމުލަކު މަކުތަބު"ގެ ނަމަށް ބަދަލުކުރެއްވިއެވެ. އޭގެ ފަހުން ސްކޫލަށް އައި ޢުމްރާނީ ތަރައްޤީއާއެކު 1989ވަނަ އަހަރު އެސްކޫލްގެ ނަން "ފުވައްމުލަކު ސްކޫލް"ގެ ބަދަލުކުރައްވައި 1992 ވަނަ އަހަރު ޕްރައިމަރީ ފެންވަރަށް ހިންގާ ސަރުކާރުގެ ސްކޫލެއްގެ ގޮތުގައި ހަމަޖެހިގެން ދިއުމާ ހަމައަށްވެސް ޢަބްދުލްޙަމީދު ޢަލީދީދީ ވަނީ ރައްޔިތުންގެ ސްކޫލެއްގެ ގޮތުގައި އަމިއްލައަށް ހުރިހާ ކަމެއް ކުރައްވައިގެން އެސްކޫލް ހިންގަވައިފައެވެ.
Advertisement
This content is created and paid for by advertisers and does not involve Voice Journalists
