ޔޫތު މިނިސްޓްރީގެ ހަމައެކަނި މަސައްކަތަކީ ފުޓްސެލް ދަނޑު އެޅުން ނޫން ކަން ސާބިތުކޮށްދެވިއްޖެ ކަމަށް ޔޫތު މިނިސްޓަރު އަހްމަދު މަހްލޫފް ވިދާޅުވެއްޖެއެވެ.
ފަރުމާ އިންޓަރނޭޝަނަލް އާރޓް ފެސްޓިވަލް ފެށުމުގެ ރަސްމިއްޔާތުގައި މަހްލޫފް ވިދާޅުވީ ޔޫތު މިނިސްޓްރީގެ މަސައްކަތަކީ ހަމައެކަނި ފުޓްސަލް ދަނޑުތައް އެޅުން ކަމަށް ބުނެ ވަރަށް ބޮޑަށް ފާޑު ކިޔާ ކަމަށް ވިދާޅުވިއެވެ.
އެހެންމަވެސްޔޫތު މިނިސްޓްރީގެ ހަމައެކަނި މަސައްކަތަކީ ފުޓްސަލް ދަނޑު އެޅުން ނޫންކަން ސާބިތުކޮށްދެވިފައިވާ ކަމަށާ، ރާއްޖޭގައި މިހާތަނަށް ބާއްވާ އެންމެ ފުރަތަމަ އާޓް ފެސްޓިވަލް މި ސަރުކާރުން ބޭއްވުމުން އެނގެނީ ކުރިން އަޅާ ނުލާ ވަރަށް އާޓިސްޓުންނަށް މި ސަރުކާރުން އަޅާލާކަންކަމަށް އޭނާ ވިދާޅުވިއެވެ.
"މިއަދު އަޅުގަނޑުމެން މިތާ އިހްތިފާލް ކުރަމުންދަނީ، މިހާތަނަށް ރާއްޖޭގައި ބާއްވާ އެންމެ ފުރަތަމަ އިންޓަރނޭޝަނަލް އާޓިސްޓުންގެ ފެސްޓިވަލް. މީގެން މި ދައްކުވައިދެނީ މީގެ ކުރިން ސަމާލުކަމެއް ނުދެވި އޮތް ކަމަކަށް އަޅުގަނޑުމެން ސަމާލުކަންދީގެން މިދާއިރާގެ ފަންނުވެރިންނަަށް އެހީތެރިކަމާއި އެއްބާރުލުންދީގެން ކުރިއަށް ގެންދަން މަސައްކަތް ކުރަންބޭނުންވާކަން."
އަހުމަދު މަހްލޫފް
މަހްލޫފް ވިދާޅުވީ އަދިވެސް އާޓިސްޓުން ބޭނުންވާ ހިސާބަށް އެ ފަންނާނުންގެ ކަންކަން ނުގެންދެވޭ ކަމަށެވެ. އަދި ފަރުމާ އިންޓަރނޭޝަނަލް އާރޓް ފެސްޓިވަލަކީ އާޓިސްޓުންގެ ކުރިއެރުމަށް އޮތް ފެށުމެއް ކަމަށާ، އެ ފެސްޓިވަލާއެކު ޤާއިމްވާ ބްރިޖުގެ އެހީގައި ފަންނާނުންގެ ކަންކަން ފުރިހަމަކުރުމަށް މަސައްކަތްކުރައްވަމުން ގެންދަވާ ކަމަށް ވެސް މިނިސްޓަރު ވިދާޅުވިއެވެ. މަހްލޫފް ވިދާޅުވީ އެފަދަ ކަންކަމަށް މިނިސްޓްރީގެ އެއްބާރުލުން އަބަދުވެސް ދެއްވާނެ ކަމަށެވެ.
ފަރުމާ އިންޓަރނޭޝަނަލް އާރޓް ފެސްޓިވަލް ފަށާފައިވަނީ 8 ގައުމަކުން 80އަށްވުރެ ގިނަ ފަންނުވެރިންނާއެކުއެވެ.
މިއީ ރާއްޖޭގައި ބާއްވާ ބައިނަލްއަގުވާމީ މިފަދަ ފުރަތަމަ ފެސްޓިވަލެވެ. މިފެސްޓީވަލް ކުރިޔަށްދާނީ މެއިމަހުގެ 8ން 13އަށް، ސޯޝަލްސެންޓަރުގައެވެ.
Advertisement
This content is created and paid for by advertisers and does not involve Voice Journalists
