ހުޅުމާލޭ ޚާންޖީ ރެސްޓޯރެންޓުގައި މަސައްކަތް ކުރި ވެއިޓަރަކު މަރާލި މައްސަލައިގައި އެ ރެސްޓޯރެންޓްގެ ޕާކިސްތާނު ކައްކާ، މުޙައްމަދު އާބިދުގެ މައްޗަށް އުފުލާފައިވާ ދައުވާއާ ގުޅިގެން މިއަދު ބޭއްވުމަށް ތާވަލްކުރި އަޑުއެހުން ކެންސަލް ކޮށްފިއެވެ.

ޕާކިސްތާނުގެ ކެއުންތަކަށް ހާއްސަ 'ހާންޖީ' ރެސްޓޯރަންޓުގެ ތެރޭގައި 16 އޭޕްރިލް، 2022ގައި ހިނގި ހަމަނުޖެހުމެއްގައި ބަންގްލަދޭޝް ވެއިޓަރެއް ކަމަށްވާ އެމްޑީ ޝަމީމް މަރާލުމުގެ ތުހުމަތުގައި އާބިދު، 26، ހައްޔަރުކުރީ ފިލައިގެން އުޅެނިކޮށް އެ ދުވަހުގެ ރޭ ދަންވަރު، ހުޅުމާލޭ ދެވަނަ ފޭސްގެ އަތިރިމަތީގައި ހުއްޓަ އެވެ. 

ދައުލަތުން އާބިދުގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ދައުވާއެވެ. 

މި މައްސަލާގެ މީގެ ކުރިން އޮތް އަޑުއެހުމުގައި އާބިދުގެ ވަކީލު ވަނީ އާބިދު އާއި ވެއިޓަރާައި ދެމެދު ހިނގި ހަމަނުޖެހުމުގެ ތެރޭގައި ބޮލަށް ހަމަލާއެއް ލިބުމުން އާބިދު ހުރީ "ބުރާންތި"ވެފައި ކަމަށާ، އާބިދު މަސައްކަތް ކުރަމުން ދިޔައީ އަމިއްލަ ދިފާއުގައި ކަމަށް ބުނެފައެވެ. އަދި ހަމަނުޖެހުމުގެ ތެރޭގައި ވަޅި ހޫރި އިރު އެއީ ވަޅިއެއް ކަމެއް ވެސް އޭނާއަށް ޔަގީން ނުވާ ކަމަށާ، އެހެންކަމުން، ގަސްތުގައި ޝަމީމް މަރާލާފައި ނުވާނެ ކަމަށް ބުނެ ވަނީ ދައުވާއަށް އިންކާރު ކޮށްފައެވެ. 

އެ މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ޖެނުއަރީ މަހުގެ 29 ވަނަ ދުވަހުއެވެ. އެ ދުވަހު ވަނީ ހެކިންގެ ހެކިބަސް ނަގާ ނިންމާލާފައިވާއިރު މިއަދުގެ އަޑުއެހުމެއްގައި އޮންނާނީ ހެއްކާ ގުޅޭ ގޮތުން ވާހަކަ ދައްކައި ޚުލާސާ ބަޔާން އިއްވުން ކަމަށް ގާޒީ ވިދާޅުވިއެވެ.

ނަމަވެސް މިއަދު ބާއްވަން ތާވަލްކޮށްފައިވާ އަޑުއެހުން ވަނީ ދައުލަތާއި ދިފާއުގެ އެދުމުގެ މަތިން ކެންސަލްކޮށްފައި ކަމަށް ކްރިމިނަލް ކޯޓުން ވަނީ ބުނެފައެވެ.

މައްސަލައިގައި ހެއްކާ ގުޅޭ ގޮތުން ވާހަކަ ދައްކައި ޚުލާސާ ބަޔާން ހުށަހެޅުމަށްފަހު ދެން އޮންނާނީ މައްސަލަ ނިންމުމަށް ބާއްވާ އަޑުއެހުމެވެ.