ދިމާވި ޓެކްނިކަލް މައްސަލައަކާއި ގުޅިގެން ޕާސްޕޯޓު ހެދުމުގެ ޚިދުމަތް ވަގުތީގޮތުން މެދުކަނޑާލާފައިވާކަމަށް މޯލްޑިވްސް އިމިގްރޭޝަނުން ހާމަކޮށްފި އެވެ.
އެކަން ހާމަކޮށް އިމިގްރޭޝަނުން ކުރި ޓްވީޓެއްގައި ބުނެފައިވަނީ ދިމާވި ޓެކްނިކަލް މައްސަލަތަކާއި ގުޅިގެން ޕާސްޕޯޓު ހެދުމުގެ ޚިދުމަތް ވަގުތީގޮތުން މެދުކަނޑާލާފައިވާ ކަމަށެވެ.
އެ މައްސަލަ ޙައްލުކުރުމަށް އެ އިދާރާއިން މަސައްކަތް ކުރަމުންދާ ކަމަށާއި، މައްސަލަ ޙައްލުވިހާ އަވަހަކަށް ޚިދުމަތް އަލުން ފަށާނެކަމަށް އިމިގްރޭޝަނުން ވަނީ ބުނެފަ އެވެ.
އެ އިދާރާއިން އިތުރަށް ބުނީ މިއަދު މެންދުރު ކުރިން އަލުން އެ ޚިދުމަތް ދިނުން ފެށުމަށް މަސައްކަތް ކުރަމުން އަންނަ ކަމަށެވެ.
ޕާސްޕޯޓް ޚިދުމަތް މެދުކެނޑިފައި މިވަނީ ޗުއްޓީއާ ދިމާކޮށް މި ދުވަސްވަރު ޕާސްޕޯޓު ހަދަން ހުށަހަޅާ މީހުންގެ އަދަދު ވަރަށް ބޮޑަށް އިތުރުވެފައިވަނިކޮށެވެ.
އިމިގްރޭޝަނުން ބުނީ މި ދުވަސްވަރު ދުވާލަކު އެވްރެޖުކޮށް 300 ޕާސްޕޯޓު ހަދަން ހުށަހަޅާއިރު 200 އަށް ވުރެ ގިނަ ޕާސްޕޯޓު އެ ޚިދުމަތުން ދޫކުރާކަމަށެވެ.
Advertisement
This content is created and paid for by advertisers and does not involve Voice Journalists
