ޔުއެފާ ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި ރޭ އިންޓަ މިލާނުން 2-0 ގެ ނަތީޖާއަކުން އޭސީ މިލާން ބަލިކޮށް، ފައިނަލުގެ ޖާގައަކާ ގާތަށް ޖެހިލައިފި އެވެ.

ރޭ ކުޅުނު ފުރަތަމަ ލެގުގެ ނަތީޖާއާ އެކު، އަންނަ އަންގާރަދުވަހުގެ ރޭ ކުޅޭ ދެ ވަނަ ލެގުން މިލާނާ އެއްވަރުކޮށްލައިގެން، ނޫނީ އެއް ގޯލުގެ ފަރަގުން ބަލިވިއަސް އިންޓައަށް ފައިނަލުގެ ފުރުސަތު ލިބިގެންދާނެއެވެ.

އިންޓަ މިލާން އެންމެ ފަހުން ޗެމްޕިއަންސްލީގުގެ ފައިނަލުގައި ކުޅެފައިވަނީ 2010 ވަނަ އަހަރުގައެވެ. އެފަހަރު ހޯސޭ މޮރީނިއޯގެ ކޯޗުކަމުގައި ބަޔާން މިއުނިކް ބަލިކޮށް މުބާރާތުގެ ޗެމްޕިއަންކަން އެޓީމުން ހޯދި ފަހުން، އިޓަލީގެ ޓީމަކަށް މުބާރާތުގެ ފައިނަލާއި ހަމައަށް ދެވިފައި ވަނީ ޔުވެންޓަސް އަށް އެކަނިއެވެ. އެޓީމު ވަނީ 2015 އަދި 2017 ވަނަ އަހަރު މުބާރާތުގެ ފައިނަލްގައި ކުޅެ ސްޕެއިންގެ ބާސެލޯނާ އަދި ރެއާލް މެޑްރިޑް އަތުން ބަލިވެފައެވެ. 

Advertisement

އިޓަލީގެ މިލާނަށް ނިސްބަތްވާ މިދެޓީމުގެ މެޗުތައް ވެސް ކުޅެނީ މިލާންގެ ސަންސީރޯގައެވެ. ރޭގައި ކުޅެވުނީ އޭސީ މިލާނުގެ ހޯމް މެޗެވެ. ރޭގެ މެޗު ބެލުމަށްޓަކައި 75,532 ސަޕޯޓަރުން ދަނޑަށް ވަން އިރު، މެޗުގެ ފުރަތަމަ 11 މިނިޓް ތެރޭގައި އިންޓަ މިލާން ވަނީ ދެ ލަނޑުގެ ލީޑެއް ނަގާފައެވެ.

އިންޓަގެ ފުރަތަމަ ލަނޑު މެޗު އަށް ވަނަ މިނިޓްގައި އެޑިން ޖެކޯ ކާމިޔާބުކޮށްދިނީ އެޓީމުގެ ތަޖުރިބާކާރު ފޯވާޑް އެޑިން ޖެކޯ އެވެ. މިއީ އެޓީމުގެ ތުރުކީ މިޑްފީލްޑަރު ހަކަން ޗަނޮނޮގްލޫ ކޯނަރަކުން ގޯލު ކުރިމައްޗަށް ހުރަސްކޮށްދިން ބޯޅައެއް އޭރިއާތެރޭގައި ހުރެފައި، ގޯލުގެ މަތީ ކަނަށް ބޯޅަ އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ

އިންޓަގެ ލީޑު ފުޅާކޮށްދިނީ 11 ވަނަ މިނެޓުގައި އެޓީމުގެ އަރްމޭނިއާ މިޑްފީލްޑަރު ހެންރިކް މިކިތާރްޔަން އެވެ. މިއީ އެޓީމުގެ އިޓަލީ ޑިފެންޑަރު ފެޑެރީކޯ ޑިމާކޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އިންޓަ އިން މެޗުގެ 15 ވަނަ މިނިޓްގައި ތިން ވަނަ ލަނޑެއް ޖެހުމާ ގާތަށް ޖެހިލި އެވެ. އެ ގޮތުން، އޭސީ މިލާނުގެ ޕެނަލްޓީ އޭރިއާބޭރުން ޗަނޮނޮގްލޫ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އަދި ޖެހިގެން އައި މިނެޓުގައި އޭސީ މިލާނުގެ ޕެނަލްޓީ އޭރިއާ ތެެރެއިން މިކިތާރްޔަން އަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ މިލާންގެ ކީއްޕަރު ވަނީ ދިފާއުކޮށްފައެވެ.

އަނިޔާގެ ސަބަބުން އޭސީ މިލާނުގެ އެންމެ މުހިންމު އެއް ކުޅުންތެރިޔާ ރަފައެލް ލެއާއޯ އާއި ނުލައި އެޓީމުން ކުޅެން ޖެހުނު މި މެޗުގެ ފުރަތަަމަ ހާފުގައި އިންޓަ މިލާންގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

މެޗުގެ ދެވަަނަ ހާފުގައި އޭސީ މިލާނުން އެ ޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި އެވެ. މި ގޮތުން، ދެވަނަ ހާފުގެ 49 ވަނަ މިނެޓުގައި އެޓީމުގެ ސްޕެނިޝް މިޑްފީލްޑަރު ބްރަހިމް ޑިއާޒް ފޮނުވާލި ހަމަލާ ގޯލާއި އަމާޒުނުވެ ބޭރަށް ދިޔައިރު، ކައުންޓަ އެޓޭކެއްގައި މެޗުގެ 50 ވަަނަ މިނިޓްގައި އެޓީމުގެ ޖޫނިއާ މެސިއަސް އަށް ލިބުނު ފުރުސަތެއްގައި އޭނާ ފޮނުވާލި ހަމަލާ ވެސް ދިޔައީ ގޯލާއި އަމާޒުނުވެ ދަނޑިކައިރިން ބޭރުންނެވެ. އަދި 63 ވަނަ މިނިޓްގައި އޭރިއާ ރޮނގުކައިރީގައި ހުރެފައި، ސަންޑްރޯ ޓޮނާލީ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. 

ދެވަނަ ހާފުގައި އިންޓަގެ ލީޑު ފުޅާކުރުމަށް ލިބުނު ފުރުސަތުތަކުގައި ޖެކޯ އަދި މިކިތާރްޔަން ފޮނުވާލި ހަމަލާތައް މިލާންގެ ގޯލު ކީޕަރު މައިކް މައިގްނަން ވަނީ ދިފާއުކޮށްފައެވެ.