ޚަބަރެއް ނުވެގެން ހޯދަމުން އައި "ޖަންބޯ" ދޯނި އަޑިއަށް ގޮސްފައިވާ ކަމަށް ފަޅުވެރިން މައުލޫމާތުދޭ ކަމަށް އެމްއެންޑީއެފުން ބުނެފިއެވެ. 

އިއްޔެ ހެނދުނު 10:40 ހާއިރު ކ.ގާފަރުން ފުރައިގެން ބ.ދަރަވަންދޫއަށް ދަތުރުކުރި "ޖަންބޯ" ނަމަކަށް ކިޔާ ދޯނި ގެއްލިގެން ހޯދުމަށް ހިންގި އޮޕަރޭޝަންގެ ތެރެއިން އެ ދޯނިން ދަތުރުކުރި ދެ މީހުން ކަނޑުވެފައި ތިއްބާ ސަލާމަތްކޮށް، ލޯންޗަކަށް ނަގާފައިވާކަމަށާއި ކަމަށް އެމްއެންޑީއެފްއިން މިއަދު ވަނީ ބުނެފައެވެ. 

އެކަމާއި ގުޅޭ އިތުރު ތަފްސީލް ދެއްވަމުން އެމްއެންޑީއެފްއިން ބުނީ، ކަނޑުމަތިން ނެގި މީހުން، ގެއްލުނު ޖަންބޯ ދޯނި އަޑިއަށް ގޮސްފައިވާކަމަށް އެމީހުންނެގި ލޯންޗުގެ ކެޕްޓަނަށް މަޢުލޫމާތު ދީފައިވާ ކަމަށެވެ.

"ލޯންޗުންނެގި މީހުން މިހާރު އެހެން ދޯންޏެއްގައި މާލެއަށް ދަތުރުކުރަނީ. އިތުރު ތަފްޞީލްތައް ލިބޭނީ ހަވީރު 16:30 ހާއިރު މިމީހުން މާލެ އައުމުން." އެމްއެންޑީއެފް އިން ބުނެފައިވެއެވެ. 

މިއާއެކު އެމްއެންޑީއެފްއިން ބުނީ, ގެއްލުނު ޖަންބޯ ދޯނި ހޯދުމުގެ މަސައްކަތުގައި ރެއިން ފެށިގެން އެމްއެންޑީއެފް ކޯސްޓްގާޑް ނޫރައްދީން ލޯންްޗް ހަރަކާތްތެރިވަމުންދާ ކަމަށާއި، މީގެ އިތުރުން މިއަދު ހެނދުނު އެމްއެންޑީއެފް ޑޯނިއަރ އެއަރކްރާފްޓް ވެސް މި ދޯނި ހޯދުމުގެ މަސައްކަތުގައި ހަރަކާތްތެރިވެފައިވާ ކަމަށެވެ. 

ގެއްލިގެން ހޯދަމުން ދިޔަ "ޖަންބޯ" ދޯންޏަކީ، ކ.ގާފަރުން މުދާ ބަރުކޮށްގެން ބ.ދަރަވަންދުއަށް ދަތުރުކުރި ދޯންޏެކެވެ.