ވެރިކަމަކީ ކުރިމަތިކުރުވާ އިމްތިހާނެއް ކަމަށް ހޯމް މިނިސްޓަރު އަދި ސަރުކާރު ކޯލިޝަންގެ ހިއްސާދަރެއް ކަމަށްވާ އަދާލަތު ޕާޓީގެ ރައީސް އިމްރާނު އަބްދުالله ސިފަކުރައްވައިފި އެވެ. 

ޓްވީޓާގައި އަބަދުވެސް މާނަފުން ވާހަކަތަކެއް ވިދާޅުވަމުން ގެންދަވާ އިމްރާނު ވެރިކަމާއި ގުޅޭގޮތުން ކުރެއްވި ޓްވީޓެއްގައި ވިދާޅުވީ އެއީ ހަމަ ބޭނުންވާ އިރަށް މީހަކަށް ލިބޭ އެއްޗެއް ނޫން ކަމަށެވެ. 

އޭގެ ބަދަލުގައި ވެރިކަމަކީ އެކަން ދެއްވާ މީހުން އިމްތިހާނު ކުރުމަށް މާތްالله ދެއްވާ އެއްޗެއްކަމަށް އޭނާ ވިދާޅުވި އެވެ. 

އިމްރާނުގެ މި މާނަފުން ޓްވީޓަށްވެސް ގިނަ ބަޔަކު ވަނީ ރައްދުދީފަ އެވެ. 

އެގޮތުން ރައްދުދިން މީހަކު ބުނީ އިމްރާނަށް އެކަން ރަނގަޅަށް ވިސްނި ވަޑައިގެން ނަމަވެސް އިމްރާނު ހިތްޕުޅު ހަމަޖެހިވަޑައި ނުގަންނަވާ ވެރިންގެ ވެރިކަން ވައްޓާލުމަށް ބޮޑެތި ދޮގުތަކެއް ހަދާފައިވާ ކަމަށާއި، އެފަދަ ވެރިންގެ އަބުރު ކަތިލުމަށް އިސްކޮށް ހުންނަވާ ގިނަ މަސައްކަތްޕުޅުތަކެއް ކުރައްވާފައިވާކަން އިމްރާނު ހަނދުމަފުޅު ނެތީތީ ހިތާމަ ކުރާ ކަމަށެވެ. 

އިތުރު މީހަކު ބުނީ އިމްރާނު މިއަދު ތާއީދު ކުރާ ވެރިމީހާ މަގާމުގެ މަސްއޫލިއްޔަތުތައް އަދާކުރުމުގައި ފެއިލުވެފައިވާ ކަމަށެވެ. 

ވެރިކަމަކީ މާތްالله ކުރިމަތިކުރުވާ އިމްތިހާނެއްކަމަށް އިމްރާނު ސިފަކުރައްވާފައިވާއިރު، މި ވެރިކަން ހިމާޔަތް ކުރުމަށް އިމްރާނާއި އޭނާއަށް ތާއީދުކުރާ އަދާލަތު ޕާޓީގެ އެކްޓިވިސްޓުން ގެންދަވަނީ ވަރަށް ބުރަކޮށް މަސައްކަތްޕުޅު ކުރައްވަމުންނެވެ. 

އެގޮތުން މިހާރު ވެރިކަމުގައި ހުންނެވި ރައީސް އިބްރާހިމް މުޙައްމަދު ޞާލިހަކީ ރަސޫލާ ޞައްލައްالله ޢަލައިހި ވަސައްލަމް ކުރެއްވި ފަދަ ވެރިކަމެއް ކުރައްވަމުން ގެންދަވާ ބޭފުޅެއްކަމަށް އިމްރާނު ވަނީ ސިފަކުރައްވާފަ އެވެ. 

އޭގެ އިތުރުން އިބްރާހިމް މުޙައްމަދު ޞާލިހަށް ދެވަނަ ދައުރެއް ދޭން ޖެހޭކަމަށް ބުނެ އަދާލަތު ޕާޓީން ވަނީ ޞާލިހާއެކު މަސައްކަތް ކުރަން ނިންމާފަ އެވެ.