އއ. ތޮއްޑޫއިން ގޯތި ލިބޭ މީހުންގެ ދާއިމީ ލިސްޓު ނެރެފިއެވެ.

ތޮއްޑޫއިން ދޫކުރަން ހަމަޖެހިފައި ވަނީ 100 ގޯއްޗެވެ. އެ ގޯތިތަކަށް 524 މީހުން ފޯމު ހުށަހަޅާފައި ވާއިރު، އޭގެ ތެރެއިން 504 މީހުންގެ ޝަރުތު ހަމަވެއެވެ.

ދާއިމީ ލިސްޓުގައި ހިމެނޭ މީހުންގެ މެދުގައި ގުރުނެގުން އޮންނާނީ މާރދަމާރޭގައެވެ.

Advertisement

ތޮއްޑޫއިން 100 ގޯތި ދޫކުރުމަށް އެރަށު ކައުންސިލުން ނިންމި ނިންމުން މަޑުޖައްސާލާ، ގޯތި ދޫނުކުރުމަށް ތޮއްޑޫ ކައުންސިލްގެ މައްޗަށް ތޮއްޑޫ މެޖިސްޓްރޭޓް ކޯޓުން މީގެ ކުރިން އަމުރެއް ނެރުނެވެ.

އެއީ ވަގުތީ ލިސްޓުގައި ނަން ނުހިމެނޭ ހަތަރު މީހަކު ކޯޓަށް ހުށަހެޅުމުންނެވެ.

ކައުންސިލާއި ދެކޮޅަށް މައްސަލަ ހުށައެޅި ފަރާތްތައް ބުނެފައިވަނީ، ގޯތި ދޫކުރުމަށް ކައުންސިލުން އެކުލަވާލި އުސޫލުތައްވެސް ގޯސްކަމަށެވެ. އަދި ލިސްޓު އެކުލަވާލިއިރު މާކްސް ދީފައިވަނީވެސް އިންސާފުވެރިކޮށް ނޫންކަމަށް އެ ފަރާތްތައް ވަނީ ތުހުމަތުކޮށްފަ އެވެ. 

މައްސަލަ ހުށައެޅި ފަރާތްތަކުން ވަނީ އެ މައްސަލަ ވަކި ގޮތަކަށް ނިމެންދެން ގޯތި ދޫކުރުން ވަގުތީގޮތުން މަޑުޖައްސާލުމުގެ އަމުރަކަށްވެސް އެދިފައެވެ.

އެއާއެކު ތޮއްޑޫ މެޖިސްޓްރޭޓު ކޯޓުން ނެރުނު ބަޔާނެއްގައި ބުނީ މައުލޫއީ މައްސަލަ ވަކި ގޮތަކަށް ނިމެންދެން ގޯތި ލިބޭ މީހުންގެ ލިސްޓަށް އަމަލު ނުކުރުމަށް ކައުންސިލްގެ މައްޗަށް އަމުރު ކުރާކަމަށެވެ. 

މެޖިސްޓްރޭޓު ކޯޓުގެ އެ އަމުރުގައި ބުނެފައިވަނީ ކައުންސިލުން ގޯތި ދޫކުރާ ފަހުން މި މައްސަލަ ދައުވާ ކުރާ ހަތަރު މީހުންނާ އެއްކޮޅަށް ނިމިއްޖެނަމަ އެމީހުންނަށް އިޔާދަ ނުކުރެވޭ ވަރުގެ ބޮޑު ގެއްލުމެއް ލިބިދާނެ ކަމަށެވެ.

ކޯޓު އަމުރާ އެއްގޮތަށް ރަށު ކައުންސިލުން ވަނީ ލިސްޓު އަލުން އިވެލުއޭޓް ކޮށްފައެވެ.

ތޮއްޑޫން އެންމެ ފަހުން ގޯތި ދޫކުރި 2016 ވަނަ އަހަރު އެވެ. އޭގެ ފަހުން 2020 ގައި ވެސް ގޯތި ދޭން އިއުލާނު ކުރި އެވެ. ނަމަވެސް މައްސަލަތަކެއް ފާހަގަ ކުރެވުމާއި ގުޅިގެން އެފަހަރުވެސް ވަނީ ގޯތި ދޫކުރުމުގެ މަޝްރޫއު ހުއްޓާލާފަ އެވެ.