ހއ. ހޯރަފުށީ ކައުންސިލާއި އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމެޓީން ކުރިއަށް ގެންދާ، ހއ. އަތޮޅުގައި ބޭއްވޭ އެންމެ އަގުބޮޑު ހޭންޑްބޯޅަ މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ.
"އެޗްއާރުއެފް ޑަބްލިއުޑީސީ ހޭންޑްބޯލް ޓޯނަމަންޓް 2023" ގެ ނަމުގައި ކުރިއަށް ގެންދާ މި މުބާރާތަކީ ހއ. އަތޮޅުގެ ހުރިހާ ރަށަކަށް އަމާޒުކޮށްގެން ކުރިއަށް ގެންދާ ހޭންޑްބޯލް މުބާރާތެކެވެެ. އެގޮތުން މި މުބާރާތުގައި ބައިވެރިވުމުގެ ފުރުޞަތު އެ އަތޮޅުގެ ކުލަބް ޖަމިއްޔާތަކަށާއި، ކޮމިއުނިޓީ ގްރޫޕްތަކަށާއި ސަރުކާރު މުއައްސަސާތަކުގެ އިތުރުން އަމިއްލަ ގޮތުން އެކުލަވައިލެވޭ ޓީމްތަކަށްވެސް އޮތް ކަމަށް ހޯރަފުށީ ޑަބްލިޔުޑީސީން މައުލޫމާތު ދެއެވެ.
މިއީ ހއ. އަތޮޅުގެ ކަނބަލުންގެ މެދުގައި އެކުވެރިކަމާއި އެއްބައިވަންތަކަން އާލާކޮށް އިޖުތިމާއީ ގުޅުން ބަދަހިކޮށް ކުޅިވަރުގެ ރޫހު އާލާކޮށް ދެމެހެއްޓުމުގެ މަގުސަދުގައި ބޭއްވޭ މުބާރާތެއް ކަމަށް ހޯރަފުށީ ޑަބްލިޔުޑީސީން ބުނެއެވެ.
މި މުބާރާތުގެ ޗެމްޕިއަން ޓީމަށް 25000 (ފަންސަވީސްހާސް) ރުފިޔާ، ރަނަރަޕް ޓީމަށް 7000 (ހަތްހާސް) ރުފިޔާ އަދި ފެއާޕްލޭ ޓީމަށް 1500 (ފަނަރަސަތޭކަ) ރުފިޔާގެ ފައިސާގެ އިނާމެއް ދިނުމަށް ވަނީ ނިންމާފައެވެ.
މި މުބާރާތުގައި ބައިވެރިވާން ބޭނުންވާ ޓީމްތަކުން އެކަމަށް ފުރިހަމަ ކުރަންޖެހޭ އޮންލައިން ފޯމް ފުރިހަމަ ކުރެއްވުމަށް ފަހު މި މަހުގެ 30 ވަނަ ދުވަހުގެ ކުރިން ސަބްމިޓް ކުރެއްވުމަށް ހޯރަފުށީ ޑަބްލިއުޑީސީން ވަނީ އެދިފައެވެ.
މި މުބާރާތުގެ ޤުރުއަތުލުން އޮންނާނީ އަންނަ ޖޫން މަހުގެ ފަސްވަނަ ދުވަހުއެވެ. އަދި މުބާރާތް ފެށުމަށް ހަމަޖެހިފައި ވަނީ މި އަހަރުގެ މިނިވަން (26 ޖޫން 2023) ދުވަހުއެވެ.
Advertisement
This content is created and paid for by advertisers and does not involve Voice Journalists
