އެމްޑީޕީގެ ސިޔާސަތުގައި ވާގޮތުން ރާއްޖޭގެ ކަނޑުން ބައެއް އުނިވި މައްސަލައަކީ އިހްތިޖާޖުކުރަންޖެހޭ ކަމެއް ކަމަށް އެމްޑީޕީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާ ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ. 

ޗާގޯސް މައްސަލައިގައި އުފައްދަފައިވާ ކޯލިޝަންއިން ބޭއްވި ނޫސް ވެރިންގެ ބައްދަލުވުމުގައި ބައިވެރިވެ، ބަންޑާރަ ނައިބް އިބްރާހިމް ރިއްފަތް ގެ އިތުބާރުނެތް ކަމުގެ މައްސަލަ މަޖިލީހަށް ހުށައެޅުމަށް ސޮއި ކުރެވުނު ޕެޓިޝަންގައި އޭނާ ސޮއި ކޮށްފައި ވާތީ އެމްޑީޕީގެ ފިޔަވަޅު އަޅާ ކޮމިޓީން އާޒިމް ވަނީ އެ ޕާޓީން ވަކިކޮށްފައެވެ. 

އެ މައްސަލާގައި އާޒިމް ކުރެއްވި ޓުވީޓެއްގައި ވިދާޅުވީ ގާނޫނު އަސާސީއިން ރައްޔިތުންގެ މަޖްލިސް މެންބަރުންގެ މައްޗަށް މަތިކޮށްފައިވާ މަސްއޫލިއްޔަތު އަދާކުރުން ހުއްޓުވުމުގެގޮތުން އެމްޑީޕީން އޭނާ ދޭތެރޭ ފިޔަވަޅު އަޅަން ހިތައް އެރުމަކީވެސް ކުށެއް ކަމަށެވެ.

Advertisement

"ޕާޓީގެ ރައީސް (ނަޝީދު) ވިދާޅުވަނީ ރާއްޖޭގެ ކަނޑުން ބައެއް އުނިވި މައްސަލައަކީ ޕާޓީގެ ސިޔާސަތުގައި އިހްތިޖާޖުކުރަންޖެހޭ ކަމެއް ކަމަށް." ޢާޒިމް ވިދާޅުވި އެވެ. 

ޢާޒިމް އެމްޑީޕީ އިން ވަކިކުރީ އެ ޕާޓީގެ އަސާސީ ގަވާއިދުގެ 19 ވަނަ މާއްދާ އާއި 20 ވަނަ މާއްދާގެ ދަށުން ކަމަށް ވޮއިސް އަށް މައުލޫމާތު ދެއްވި އެމްޑީޕީގެ އިސް އޮފިޝަލަކު "ވޮއިސް" އަށް ވަނީ މައުލޫމާތު ދެއްވާފައެވެ.

އެމްޑީޕީގެ ޤަވާއިދުގެ 19 ވަނަ މާއްދާގައި ބުނަނީ އެމްޑީޕީގެ މެމްބަރަކު އެހެން ސިޔާސީ ޕާޓީއެއްގައި ބައިވެރިވެއްޖެ ނަމަ ނުވަތަ ހަރަކާތްތެރިވެއްޖެ ނަމަ ޕާޓީން ވަކިވާނެ ކަމަށެވެ.

އަދި ޤަވާއިދުގެ 20 ވަނަ މާއްދާގައި ބުނެފައި ވަނީ ޕާޓީގެ މަސްލަހަތު ގެއްލުވާލުމަށް މަސައްކަތްކުރާ މެމްބަރެއް ނަމަ ވަކި ކުރެވޭނެ ކަމަށެވެ.