ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޕާލަމެންޓަރީ ގްރޫޕުގެ ފަރާތުން ރައްޔިތުންގެ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމްގެ މައްޗަށް ހުށަހަޅާފައިވާ މައްސަލަ އެ ޕާޓީގެ ފިޔަވަޅުއަޅާ ކޮމިޓީން ބެލުމަށްފަހު، އޭނާ ޕާޓީން ވަކިކުރުމަށް ނިންމި ސަބަބުތަކުގެ ތަފްސީލް ހާމަކޮށްދީފިއެވެ. 

އެމްޑީޕީން އާޒިމްގެ މައްޗަށް ހުށަހަޅާފައިވާ މައްސަލަ ބެލި ގޮތުގެ ރިޕޯޓު އެޕާޓީން މިއަދު ވަނީ އާއްމުކޮށްފަ އެވެ. 

އެ ރިޕޯޓުގައި ވާގޮތުން، މެންބަރު ޢާޒިމްގެ މައްސަލާގައި ޕާލަމެންޓްރީ ގްރޫޕުން މައިގަނޑު ދެ މައްސަލައެއް ވަނީ ހުށަހަޅާފައެވެ. އެގޮތުން ފުރަތަަމަ ހުށަހެޅި މައްސަލަ އަކީ އޭޕްރިލް 11 ވަނަ ދުވަހު ރައްޔިތުންގެ މަޖިލީހަށް ހުށަހަޅާފައިވާ، ބަންޑާރަ ނާއިބު އިބްރާޙީމް ރިފްޢަތު ގެ އިތުބާރު ނެތް ކަމުގެ މައްސަލަ ހުށަހެޅުމަށް ތާއިދުކުރައްވާ މެމްބަރުންގެ ލިސްޓުގައި ޢާޒިމް ސޮއިކުރެއްވި މައްސަލަ އެވެ. 

ދެވަނައަށް އާޒިމް އާއި ދެކޮޅަށް ހުށަހެޅުނު މައްސަލައަކީ، ސިޔާސީ ގޮތުން އެމްޑީޕީއާއި އިދިކޮޅު ފަރާތްތަކުން، އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ފާޑުވިދާޅުވެ، ބޭއްްވި ނޫސްވެރިންގެ ބައްދަލުވުމުގައި އާޒިމް ބައިވެރިވެވަޑައިގެންނެވި މައްސަލަ އެވެ. 

ޕީޖީ ގުރޫޕުން ޢާޒިމް ބައިވެރިވެވަޑައިގެންނެވި ކަމަށްބުނާ ބައްދަލުވުންތަކުގައި އޭނާ ބައިވެރިވެވަޑައިގެންނެވި ކަން ފިޔަވަޅު އަޅާ ކޮމިޓީއަށް ކަށަވަރުވެފައިވާ ކަމަށް އެ ކޮމިޓީން ފާހަގަކޮށްފައިވެއެވެ. 

އަދި ބަންޑާރަ ނާއިބު ރިފްޢަތަކީ ރައީސް ޞާލިހުގެ ކެބިނެޓްގައި ހިމެނިވަޑައިގަންނަވާ އެމްޑީޕީ މެންބަރެއްކަމަށްވާއިރު, އޭނާގެ އިތުބާރު ނެތް ކަމަށް އެ ޕާޓީގެ އެއްވެސް ގުނަނަކުން ނިންމާފައި ނުވާ ކަމަށް ފިޔަވަޅު އަޅާކޮމިޓީން ފާހަގަ ކޮށްފައިވެއެވެ. އަދި ބަންޑާރަ ނާއިބު ގެ އިތުބާރު ނެތް ކަމަށް ބުނެ އާޒިމް ހުށަހެޅު މައްސަލާގައި އާޒިމް ސޮއި ކުރެއްވުމަކީ ޕާޓީގެ ސިޔާސަތު ތަކާއި ދެކޮޅު ކަމެއް ކަމަށްވެސް ފިޔަވަޅު އަޅާ ކޮމިޓީން ވަނީ އިއްތިފާގު ވެފައެވެ. 

އަދި މީގެ އިތުރުން، ރައީސުލްޖުމްހޫރިއްޔާގެ ސިޔާސަތު ތަކަށް ފާޑުވިދާޅުވެ، އިދިކޮޅުން ބޭއްވި ދެ ނޫސްވެރިންގެ ބައްދަލުވުމެއްގައިވެސް އާޒިމް ބައިވެރިވެފައިވާއިރު، ޕާލަމެންޓްރީ ގްރޫޕްގެ މެންބަރެއް އިދިކޮޅުން އިންތިޒާމްކުރާ އެފަދަ ސިޔާސީ ހަރަކާތެއްގައި ބައިވެރި ވުމަކީ ޕާޓީގެ އަސާސީ ގަވާއިދާއި ކަނޑައެޅިގެން ޚިލާފް ކަމެއް ކަންވެސް އެ ކޮމިޓީގެ ހުރިހާ މެންބަރުންވެސް އިއްތިފާގުވާ ކަމެއްކަން ނިންމުމުގައި ފާހަގަކޮށްފައިވެއެވެ. އަދި އެއީ މެންބަރަކު ޕާޓީން ވަކިކުރެވިދާނެ ސަބަބެއް ކަމުގައި ޕާޓީގެ އަސާސީ ގަވާއިދުގެ 19 ވަނަ މާއްދާ އާއި 95 ވަނަ މާއްދާގައިވާ ކަމަށްވެސް ބުނެފައިވެއެވެ.

އަދި ހަމައެހެންމެ، ޢާޒިމް އަކީ ޕާލަމެންޓްރީ ގްރޫޕްގެ މެންބަރެއް ކަމުގައިވާއިރު، ޕާޓީގެ އެފަދަ މަގާމެއްގައި ހުރި މީހަކު ޕާޓީގެ އަސާސީ ގަވާއިދުތަކާއި ޚިލާޕް ވުމަކީ ސީރިއަސް މައްސަލައެއް ކަމަށްވެސް އެ ކޮމިޓީން ފާހަގަކޮށްފައިވެއެވެ. އަދި އެ މައްސަލައިގައި ފިޔަވަޅު ނާޅައިފިނަމަ، އެހެން މެންބަރުންގެ ފަރާތުންވެސް އެކަންކަން ފެނުމަކީ އެކަށީގެންވާ ކަމެއްކަމަށް ބުނެފައިވެއެވެ. 

އެ ސަބަބު ތަކަށްޓަކައި، އެއް އަހަރު ދުވަހުގެ މުއްދަތަށް އާޘިމް ވަނީ އެމްޑީޕީން ވަކިކޮށްފައެވެ. އަދި ދެން އެ ޕާޓީއަށް ވަންނަން ބޭނުން ނަމަ، އޭނާއަށް ވަދެވޭނީ އެއް އަހަރު ފަހުން، 100 މެންބަރުންގެ ސޮއި ހޯދައިގެން ކަމަށްވެސް ބުނެފައިވެއެވެ. މީގެ އިތުރުން، ޕާޓީއަށް ވަތް ނަމަވެސް، 5 އަހަރު ވަންދެން ޕާޓީގެ އެއްވެސް މަގާމަކަށް، ނުވަތަ އެއްވެސް ޕްރައިމަރީ އެއްގައިވެސް އޭނާއަށް ބައިވެރިނުވެވޭނެކަމަށް ނިންމުމުގައިވެއެވެ.