މިއަހަރުގެ ފުރަތަމަ އެއާޕޯޓް ރެސްކިއު އަދި ފަޔާފައިޓިން ބޭސިކް ކޯސް ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ފަށައިފި އެވެ.

މިމަހުގެ ހަތްވަނަ ދުވަހު ހދ. ހަނިމާދޫގައި ފަށައިގެން ކުރިއަށް ގެންދާ މި ކޯހަކީ އާރްއޭސީއެލްއާ އަލަށް ގުޅުނު ފަޔަރުގެ ސްޓާފުންނަށް އަމާޒުކޮށްގެން ކުރިއަށް ގެންދާ ބޭސިކް ލެވެލް ކޯހެކެވެ. އެގޮތުން މި ކޯހުގައި ޖުމުލަ 20 ދަރިވަރުން ވަނީ ބައިވެރިވެފައިވެ އެވެ.

އެއް މަސް ދުވަހުގެ މުއްދަތައް ކުރިއަށް ގެންދާ މި ކޯހަކީ އާރްއޭސީއެލް އިން ހިންގާ އެއާޕޯޓްތަކުގައި އަމަލުކުރުމަށް ގާއިމްކޮށްފައިވާ އެއާޕޯޓް އެމަޖެންސީ ޕްލޭނަށް އަމަލުކުރަން ދަސްކޮށްދިނުމަށާއި އަދި މަތިންދާ ބޯޓު އޮޕަރޭޓް ކުރާ ސަރައްދަށް ދިމާވެދާނެ އެކިއެކި އަލުފާނާއި ގުޅުން ހުރި ހާދިސާތަކުން ރައްކާތެރިވުމަށް ދަސްކޮށް ދިނުމުގެ މަގުސަދުގައި ހިންގޭ ކޯހެއް ކަމަށް އާރްއޭސީއެލް އިން މައުލޫމާތު ދެއެވެ.

Advertisement

އެގޮތުން މި ކޯހުގެ ބައިވެރިންނަށް ޕްރެކްޓިކަލް އަދި ތިއަރީއިން އިމްތިހާނު ކުރާނެ ކަމަށާ ކޯހުގައި ކިޔަވައިދޭނީ ކުންފުނީގެ ޓްރެއިނަރުން ކަން އާރްއޭސީއެލް އިން ފާހަގަކުރެއެވެ.

އާރްއޭސީއެލް އިން ބުނީ ކުރިއަށް އޮތްތަކުގައި އެކުންފުނިން ހިންގާ ކޯސްތަކުގައި އެހެން ކުންފުނިތަކާއި އާންމުންނަށް ހުޅުވާލާނެ ކަމަށެވެ. އަދި މީގެ އިތުރުން އެ ކުންފުނީގެ ޓްރޭނިން އެކެޑެމީއެއް ގާއިމްކުރުމުގެ ތައްޔާރީތައް ވަމުން އަންނަ ކަމަށް ބުންޏެވެ.