ރާއްޖޭގައި ބާއްވާ އެންމެ ބޮޑު ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގައި މިއަދު ހަވީރު ކުޅެވުނު ދެވަނަ މެޗުގައި ގުރޫޕް "ބީ" ގައި ކާލްޓަންއާއި ވާދަކުރި މެޗު ފަސޭހަކަމާއި އެކު 6-0 ގެ ނަތީޖާއަކުން ބަނޑޮސް ކާމިޔާބުކޮއްފިއެވެ.

މިމެޗުގެ ފުރަތަަމަ 08 މިނެޓު ތެރޭގައި ބަނޑޮހުން ތިން ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ދެލަނޑު ކާމިޔާބުކޮށްދިނީ މުހައްމަދު އިކްރާމް އެވެ. މެޗުގެ ފުރަތަަމަ ލަނޑު މެޗު ފެށިގެން ފަސްވަނަ މިނެޓްގައި އިކުރާމް ކާމިޔާބުކުރިއިރު، އޭގެ ދެ މިނެޓު ފަހުން އޭނާ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މި މެޗުގައި ބަނޑޮހުން ކާމިޔާބުކުރި ތިންވަނަ ލަނޑު ފުރަތަމަ ހާފުގެ 08 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ޝަމީމް އެވެ.

މެޗުގެ ދެވަނަ ހާފުގައި ބަނޑޮހުން އިތުރު ތިން ލަނޑު ކާމިޔާބުކުރިއިރު، އެޓީމުގެ ހަތަރުވަނަ ލަނޑު ދެވަނަ ހާފުގެ 07 ވަނަ މިނެޓުގައި ކާމިޔާބުކޮށްދިނީ އަހުމަދު ޝަމީމް އެވެ. އަދި މެޗު ނިމެން ތިން މިނިޓަށްވެފައި ވަނިކޮށް ޝަމީމް ވަނީ އިތުރު ލަނޑެއް ކާމިޔާބުކޮށް މި މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި ޖެހިގެން އައި މިނެޓުގައި އެޓީމުގެ ހަވަނަ ލަނޑު ކާމިޔާބުކޮށްދިނީ އަހުމަދު ނަޝީދު އެވެ.

މި މެޗުގެ މޭން އޮފް ދަ މެޗަކަށް ހޮވުނީ ބަނޑޮސް ޓީމުގެ އަހުމަދު ޝަމީމް އެވެ.

މި ގުރޫޕްގެ ކޮންމެ ޓީމެއް މިހާރު އެއް މެޗު ކުޅެފައިވާއިރު، މިވަގުތު ގުރޫޕް "ބީ" ގެ އެއްވަނައިގައި ތިން ޕޮއިންޓާއި ފައިދާ 06 ގޯލާއެކު އޮތީ ބަނޑޮސް އެވެ. އަދި ދެވަނައިގައި އޮތް ހިލްޓަން އަށް ވެސް ތިން ޕޮއިންޓް ލިބިފައިވާއިރު، އެޓީމަށް ލިބިފައިވަނީ ފައިދާ އެންމެ ގޯލެކެވެ. 

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ. 

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.