މީދޫ ޖަމްޢިއްޔަތުއް ޞަލާޙް ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓަރ ރިސޯޓް ފުޓްސަލް ޗެލެންޖު " އާރުޑީސީ ރާބަދި ޗެލެންޖް 2023" ގެ ގުރޫޕް "ބީ" ގައި މިރޭ 5-1 ގެ ނަތީޖާއަކުން މާމުނަގައު ބަލިކޮށް ގުރޫޕްގެ ދެވަނަ ޓީމުގެ ގޮތުގައި ކުޑަފުށި މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފިއެވެ.

މިރޭގެ މެޗުގެ ފުރަތަަމަ ހާފުގައި ކުޑަފުށި ޓީމުން ހަތަރު ލަނޑުގެ ލީޑެއް ނެގިއިރު، އެޓީމުގެ ފުރަތަމަ ލަނޑު މެޗުގެ 10 ވަނަ މިނެޓުގައި ކާމިޔާބުކޮށްދިނީ އިބްރާހިމް އަޒުމޫން އެވެ. އަދި އެޓީމުގެ ދެވަަނަ ލަނޑު 14 ވަނަ މިނެޓުގައި ކާމިޔާބުކޮށްދިނީ ހުސެއިން މަގްސޫދު އެވެ. އަދި ޖެހިގެންއައި މިނެޓުގައި ލިބުނު ހިލޭ ޖެހުމަކުން އެޓީމުގެ ތިންވަނަ ލަނޑު ކާމިޔާބުކޮށްދިނީ މުހައްމަދު އާސިފްއެވެ. އަދި ފުރަތަމަ ހާފުގެ އެންމެ ފަހު މިނެޓްގައި އެޓީމުގެ ހަތަރު ވަނަ ލަނޑު ކާމިޔާބުކޮށްދިނީ ހުސެއިން މަގްސޫދު އެވެ.

ދެވަަނަ ހާފުގައި މާމުނަގައު އިން އެޓީމުގެ ކުޅުން ރަގަޅުކުރި އިރު، މި މެޗުގައި އެޓީމުން ކާމިޔާބުކުރި ހަމައެކަނި ލަނޑު ދެވަނަ ހާފުގެ 09 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ މުހައްމަދު ސިރާޖް އެވެ. އަދި މެޗު ނިމެން ދެ މިނިޓަށްވެފައި ވަނިކޮށް  ކުޑަފުށީގެ ފަސްވަނަ ލަނޑު ކާމިޔާބުކޮށްދިނީ އެޓީމުގެ ކެޕްޓަން މުހައްމަދު އާސިފްއެވެ.

މި މެޗުގެ މޭން އޮފް ދަ މެޗަކަށް ހޮވުނީ ކުޑަފުށީ ޓީމަށް މި މެޗުގައި ދެ ލަނޑު ކާމިޔާބުކޮށްދިން އެޓީމުގެ ކެޕްޓަން މުހައްމަދު އާސިފްއެވެ.

މިރޭގެ މެޗުން ލިބުނު ތިން ޕޮއިންޓާއެކު ތިން މެޗު ކުޅެގެން ކުޑަފުށި ޓީމަށް 07 ޕޮއިންޓް ލިބިފައިވާއިރު، މިގުރޫޕްގެ އެއްވަނައިގައި އޮތް ޖޯލި މޯލްޑިވްސް އަށް ވެސް ތިން މެޗުން ވަނީ 07 ޕޮއިންޓް ލިބިފައެވެ. މި ގުރޫޕުން މި ދެޓީމު ކުއާޓާ ފައިނަލުން ޖާގަ ކަށަވަރުކޮށްފައިވާ އިރު، ގުރޫޕްގެ ތިންވަނަ ލިބެނީ ތިން މެޗު ކުޅެގެން ލިބުނު ތިން ޕޮއިންޓާއެކު ރީތިފަރަށެވެ. އަދި މި ގުރޫޕްގެ ފުލަށް ދިޔައީ ކުޅުނު ތިން މެޗުން ވެސް ބަލިވި މާމުނަގައު އެވެ.

މި މުބާރާތުގެ ގްރޫޕް ސްޓޭޖުގެ މެޗުތައް ނިމިފައިވާ އިރު، މާދަމާރޭ 21:00 ގައި ކުޅޭ ގުރޫޕް "ޑީ" ގެ ޕްލޭއޮފްގައި ވާދަކުރާނީ ޔޫ އެންޑް މީ އާއި އާރަށެވެ. މި މެޗުން މޮޅުވާ ޓީމަކަށް މުބާރާތުގެ ކުއާޓާ ފައިނަލުގެ ފަހުޖާގަ ލިބޭއިރު، ކުއާޓާ ފައިނަލުގެ މެޗުތައް ކުޅުމަށް ހަމަޖެހިފައިވަނީ މިމަހުގެ 18 އަދި 19 ވަނަ ދުވަހުގެރޭ އެވެ.