ލ. ކަލައިދޫ ރަށްވެހިންގެ ރަޖިސްޓްރީގައި އަލަށް އުފަންވެ ރަށްވެހިވާ ކޮންމެ ކުއްޖަކަށް ހަދިޔާ ވަށި ދިނުމަށް ނިންމައި އެކަމުގެ އުސޫލެއް އާއްމު ކޮށްފިއެވެ.

މިއަދު ގެޒެޓުގައި އާއްމުކޮށްފައިވާ ކަލައިދޫ ރަށްވެހިންގެ ރަޖިސްޓްރީގައި އަލަށް އުފަންވެ ރަށްވެހިވާ ކޮންމެ ކުއްޖަކަށް ހަދިޔާ ވަށި ދިނުމުގެ އުޞޫލުގައިވާގޮތުން، މި އުސޫލު ފާސްކޮފައިވަނީ އެރަށު ކައުންސިލްގެ 04 ވަނަ ދައުރުގެ 2023 ވަނަ އަހަރުގެ 15 ވަނަ ޢާއްމު ޖަލްސާއިންނެވެ. އަދި މިއުސޫލަށް މިއަދުން ފެށިގެން ވަނީ އަމަލު ކުރަން ފަށާފައެވެ. ނަމަވެސް މިއުސޫލުގެ ދަށުން 2023 ޖެނުއަރީ 01 ގެ ފަހުން އުފަންވެފައިވާ ކުދިންނަށް ވެސް ހަދިޔާ ދޭނެ ކަމަށްވެސް އެ ކައުންސިލުން ބުނެފައިވެއެވެ. 

އެ އިއުލާނުގައި ވާގޮތުން، މިއުޞޫލްގެ ދަށުންދޭ ހަދިޔާ ވަށީގައި ހުންނާނީ 700-1000 ދިވެހި ރުފިޔާ އާ ދޭތެރޭ އަގުގެ އެންމެ ތުއްތު ކުދީންނަށް ބޭނުން ކުރެވޭ ޒާތުގެ ތަކެއްޗެވެ. އަދި ހަދިޔާވަށި ހުންނަން ވާނީ ޕާރުސަލު ކުރެވިފައެވެ.

Advertisement

އަދި މި އުސޫލުގެ ދަށުން ހަދިޔާ ލިބޭނީ އުފަންވާ ކުދީންގެ ތެރެއިން ރަށުގައި ރަޖިސްޓްރީ ކުރާ ކޮންމެ ކުއްޖަކަށް ކަމަށާ،  ރަށުގައި ވިހޭނަމަވެސް ރަށުގައި ރަޖިސްޓްރީ ނުކުރާނަމަ މިއުޞޫލުގެ ދަށުން ހަދިޔާއެއް ނުލިބޭނެ ކަމަށް ބުނެފައިވެއެވެ. އެހެން ރަށަކަށް ރަޖިސްޓްރީކޮށް އަލުން ރަށަށް ރަޖިސްޓްރީ ކުރާ ކުދީންގެ ތެރެއިން މިހަދިޔާ ވަށި ލިބޭނީ އުމުރުން 1 އަހަރުން ދަށުގެ ކުދީންނަށް ކަމަށްވެސް އިއުލާނުގައިވެއެވެ.

މީގެ އިތުރުން، ހަދިޔާ ވަށި ހަވާލު ކުރެވޭނީ ކުއްޖާގެ އުފަން ދުވަހުގެ ސެޓްފިކެޓް އަދި އުފަން ދުވަހުގެ ރަޖިސްޓްރީގެ ކޮޕީ ކައުންސިލަށް ހުށަހަޅައި އެކުއްޖާ ރަށުގެ ރައްވެއްސެއްގެގޮތުގައި ރަށުގެ ގޭގެ މީހުންގެ ރަޖިސްޓްރީގައި ކުއްޖާ ހިމެނުމުން ކަމަށް އުސޫލުގައި ބުނެފައި ވެއެވެ.

ހަދިޔާ ވަށި ލިބޭ ފަރާތަކީ ރަށުން ބޭރުގައި ދިރިއުޅޭފަރާތެއްނަމަ ބަދަލުގައި ބެލެނެވެރިޔާ ހުށަހަޅާ ފަރާތަކަށް ހަދިޔާ ވަށި ހަވާލު ކުރެވޭނެ ކަންވެސް ފާހަގަކޮށްފައިވެއެވެ.

"އުފަންވާ ކޮންމެ ކުއްޖަކަށް ހަދިޔާ ފޮށްޓެއް" ވައުދަކީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރިޔާސީ ވައުދު ތަކުގެ ތެރެއިން ގިނަ ބައެއްގެ ސަމާލުކަން ލިބުނު ވައުދެކެވެ. އެހެން ނަމަވެސް، ރިޔާސީ ދައުރު ނިމިގެންދާއިރު ވެސް އެ ވައުދު އަދި އަދަށްވެސް ފުއްދާފައެއް ނުވެއެވެ.