ހއ.ދިއްދޫގައި އިސްލާމިކް ސެންޓަރެއް އިމާރާތްކުރުމަށް ކުންފުންޏާކާ ހަވާލުކޮށްފިއެވެ.
މިކަމަށްޓަކައި މިއަދު ހެނދުނު އިސްލާމިކް މިނިސްޓްރީގެ ހޯލުގައި ބޭއްވި ރަސްމިޔާތެއްގައި “ދިއްދޫ އިސްލާމިކް ސެންޓަރު” އިމާރާތްކުރުމަށް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްއާ އެވެ.
މި އެއްބަސްވުމުގައި ކުންފުނީގެ ފަރާތުން ސޮއިކުރެއްވީ އާރުސީސީގެ ޑިރެކްޓަރ އާދަމް ރަޙީމެވެ. އިސްލާމިކް މިނިސްޓްރީގެ ފަރާތުން ސޮއި ކުރެއްވީ މިނިސްޓަރ ޑރ. އަޙްމަދު ޒާހިރު ޢަލީއެވެ.
މި ސެންޓަރަކި އެއްފަހަރާ 1500 މީހުނަށް ނަމާދުކުރެވޭ، 450 މީހުންގެ ޖާގައިގެ މަލްޓިޕާޕަސް ހޯލެއް ހިމެނޭ އަދި އިދާރީ އޮފީހަކާއި ލައިބްރަރީއެއް ހިމެނޭގޮތަށް ފަރުމާ ކުރެވިފައިވާ ސެންޓަރެކެވެ.
މީގެ އިތުރުން މި ސެންޓަރުގައި ހަތަރު ކްލާސް ރޫމާއި ދެ ސެމިނަރ ރޫމްގެ އިތުރުން ޕޭންޓްރީއެއްވެސް ހިމެނޭނެ ކަމަށް އިސްލާމިކް މިނިސްޓްރީން މައުލޫމާތު ދެއެވެ.
މިސްކިތް އޭސީ ކުރުމަށް ހަމަޖެހިފައިވާ މި ސެންޓަރިުގައި ކަރަންޓަށް ކުރާ ޚަރަދު ކުޑަކުރަން އިއާދަކުރަނިވި ހަކަތަ ބޭނުންކުރެވޭނެ ކަމަށް އިސްލާމިކް މިނިސްޓްރީން ބުނެއެވެ.
ދިއްދޫ އިސްލާމިކް ސެންޓަރު އިމާރާތްކުރުމަށް ހަވާލުކޮށްފައިވަނީ 540 ދުވަހުގެ ތެރޭގައި ނިންމާގޮތަށް، 50،895،299.07 ރުފިޔާއަށެވެ.
Advertisement
This content is created and paid for by advertisers and does not involve Voice Journalists
