ގޭސްފުޅިއެއް ގޮވައިގެން ޒަޚަމްވި މީހާގެ ހާލު ސީރިއެސްކަމަށް އެ މީހާއަށް ފަރުވާދެމުންދާ އުނގޫފާރު ހޮސްޕިޓަލުން ހާމަކޮށްފި އެވެ.

އެ ހާދިސާ ހިނގާފއިވަނީ ރ. މަޑުއްވަރީގެ ގެއެއްގެ ތެރޭގައި ގޭސް ފުޅިއެއް ގޮވާ ހިނގި އަލިފާނުގެ ހާދިސާއާއި ގުޅިގެން. އެ ހާދިސާގައި އަނިޔާ ލިބުނު އަންހެން މީހާގެ ހާލު ސީރިއަސް ކަމަށާއި، އޭނާގެ ހަށިގަނޑުގެ 40 އިންސައްތައާ 45 އިންސަތަ ފިހިފައިވާކަމަށް އުނގޫފާރު ހޮސްޕިޓަލުން ބުނެފި އެވެ.

ރޭ ދަންވަރު 12:30 ހާއިރު ގޭސް ފުޅިއެއް ގޮވައި ހިނގި މިހާދިސާގައި އަނިޔާ ލިބުނީ މަޑުއްވަރު ހޮސްޕިޓަލުގައި މަސައްކަތް ކުރާ އުމުރުން 36 އަހަރުގެ އިންޑިއާގެ އަންހެން ނަރުހަކަށެވެ.

ހާދިސާ ހިނގުމާއެކު ފުރަތަމަ ފަރުވާއަށް ގެންދިޔައީ މަޑުއްވަރީ ހޮސްޕިޓަލަ ށެވެ.

އިތުރު ފަރުވާ ބޭނުންވާތީ އެ އަންހެން މީހާ ރޭ ދަންވަރު 1:30 ހާއިރު އުނގޫފާރު ރީޖަނަލް ހޮސްޕިޓަލަށް ގެންގޮސް އެމެޖެންސީގައި ފަރުވާ ދިނުމަށްފަހު، ހާލަތު ރަގަޅުނުވާތީ ހެނދުނު އައިސީޔޫއަށް ބަދަލުކޮށް އެތަނުގައި ފަރުވާދެމުން އަންނަކަމަށް އުނގޫފާރު ރީޖަނަލް ހޮސްޕިޓަލުން މައުލޫމާތުދެ އެވެ.

މި ހާދިސާ ހިނގާފައިވަނީ ހޮސްޕިޓަލުގެ ޑިއުޓީ ނިންމާފައި ގެއަށްގޮސް އޭނާ ކެއުމަށް ތައްޔާރުވި ވަގުތުގައިކަމަށް ބައެއް މީޑިއާތަކުން ވަނީ ރިޕޯޓުކޮށްފަ އެވެ. އޭނާ އުޅޭ ގޭގެ ބަދިގެ ބޭނުން ނުކުރެވޭ ވަރަށް އަނދާފަ އެވެ.

މި ހާދިސާއާއި ގުޅޭގޮތުން ފުލުހުން ބުނީ އެ ހާދިސާ ފުލުހުން ތަހުޤީގު ކުރަމުންދާ ކަމަށެވެ.