ރާއްޖޭގައި އޮތް އެންމެ ގިނަ ދުވަސްވީ، އަދި އެންމެ ބޮޑު ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ފުނޑާލީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދިފާއުކުރުމަށް ކަމަށް މަޖިލީހުގެ ނައިބު ރައީސް އީވާ އަބްދުالله ވިދާޅުވެއްޖެ އެވެ.
އެމްޑީޕީގެ ފިކުރެއްގެ ދިރުން ގޮފީގެ ގިނަ މެމްބަރުންތަކެއް އިސްތިއުފާދެއްވުމަށްފަހު މިއަދު ބޭއްވި ޕްރެސް ކޮންފަރެންސްގައި ވާހަކަދައްކަވަމުން އީވާ ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދިފާއުކުރަމުން ގޮސް އެމްޑީޕީގެ އޭގެ މައްޗަށް ބިނާވެފައިވާ ހުރިހާ އަސާސްތަކެއް މުގުރާލާފައިވާ ކަމަށެވެ.
އީވާ ވިދާޅުވީ އެމްޑީޕީ އުފެދުނީއްސުރެ މިހާތަނަށް އެ ޕާޓީގައި މެންބަރުން ތިބީ އެމީހުން ޤަބޫލުކުރާ އަސާސްތަކެއް ހިފަހައްޓަމުން އައިސްފައިވާތީ ކަމަށެވެ. އަދި މިއަދު އެމްޑީޕީއަށް އެތައް ޚިދުމަތްތަކެއް ކޮށްދީފައިވާ އިޚްލާސްތެރި މެމްބަރުންތަކެއް ޕާޓީން ވަކިވާން ޖެހުނީ އެ އަސާސްތައް މުގުރާލާފައިވާތީ ކަމަށެވެ.
"އަޅުގަނޑުމެންގެ ދާއިރާއާއި ބެހޭގޮތަކުން އަޅުގަނޑުމެންނަކަށް ވަކާލާތެއް ނުކުރެވޭ، އިންތިޚާބުވަމުން ވީ ވައުދުތަކާއި ގުޅޭގޮތުން ވަކާލާތެއް ނުކުރެވޭ، އެމްޑީޕީގެ އަސާސްތަކާއި އެއްކޮޅަށް ވަކާލާތުކުރުމަށް ފުރުސަތެއް ނުލިބޭ، ވައްކަމުގެ ވާހަކަ ދެއްކުމުގެ ފުރުސަތެއް އެއްވެސް ގޮތަކަށް އެމްޑީޕީގެ ޕީޖީ އަކުން މިހާރު ނުދޭ، ބޯހިޔާވަހިކަމުގެ ވާހަކަ، މަސްވެރިންނަށްވީ ވައުދުތަކުގެ ވާހަކަ، ދަނޑުވެރިންނަށް ވީ ވައުދުތަކުގެ ވާހަކަ، ސަރުކާރު ކުންފުނިތަކުގެ ވައްކަމުގެ ވާހަކަ، މިއިން އެއްވެސް ވާހަކައެއް.. ރާއްޖޭގެ ކަނޑުވިއްކާލި ވާހަކަ.. މިއިން އެއްވެސް ކަމަކަށް ބަހުސްކޮށްލުމުގެ ފުރުސަތުވެސް ނުދޭ"
މަޖިލީހުގެ ނައިބު ރައީސް އީވާ އަބްދުالله
އެމްޑީޕީން ނަގަހައްޓަމުން އައި އަސާސްތައް މުގުރާލާ ޕާޓީ ފުނޑާލީ މި ސަރުކާރާއި ރައީސް ޞާލިހު ހިންގަވަމުންދާ ޖަރީމާތައް ދިފާއުކުރުމަށްކަމަށް އީވާ ވިދާޅިވި އެވެ.
"ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދިފާއުކުރުމަށްޓަކައި މުޅި އެމްޑީޕީ ފުނޑާލައިފި، ދިވެހިރާއްޖޭގެ އެންމެ ބޮޑު ސިޔާސީ ޕާޓީ ފުނޑާލައިފި"
މަޖިލީހުގެ ނައިބު ރައީސް އީވާ އަބްދުالله
އީވާ ވަނީ އެމްޑީޕީން ނިކުމެ ސިޔާސީ ޕާޓީއެއް އުފެއްދުމަށް ފެށިގެން މި ދިޔަ މަސައްކަތަކީ "ސިޔާސީ ކަސްތޮޅަކުން" ލިބިގެންދިޔަ މިނިވަންކަމެއްގެ ގޮތުގައި ސިފަކުރައްވާފަ އެވެ. އަދި އެ މިނިވަންކަން އިހުސާސް ކުރެވެމުންދާކަމަށް އޭނާ ވިދާޅުވި އެވެ.
ރައީސް ޞާލިހު ދިފާއުކުރުމަށް އެމްޑީޕީ ފަޅިކޮށްލި ނަމަވެސް، އަލަށް ފަށައިގަތް ސިޔާސީ މަސައްކަތާއެކު ކުރިއަށްވުރެ ބޮޑަށް ސަރުކާރު ޖަވާބުދާރީ ކުރުވުމުގެ މަސައްކަތް ކުރިއަށް ގެންދަވާނެކަމަށް އީވާ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
