އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ފިޔަވައި ދެން އެންމެ މެންބަރުން ގިނަ, ބޮޑު ޕާޓީއަކަށް ވާނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދަން އުޅޭ "ފިކުރެއްގެ ދިރުން" ޕާޓީ ކަމަށް ތޮއްޑޫ ދާއިރާގެ މެމްބަރު ޙަސަން ޝިޔާން ވިދާޅުވެއްޖެއެވެ.

ސަރުކާރު ހިންގާ މައި ޕާޓީ، އެމްޑީޕީ މިހާރު ހިނގަމުންދަނީ ޕާޓީ އުފެއްދި އަސާސްތަކާއި ޚިލާފަށް ކަމަށް ބުނެ ޝިޔާން ހިމެނިވަޑައިގަންނަވާ ގޮތަށް، އެމްޑީޕީގައި ހިމެނޭ ގިނަ މެންބަރުން ތަކެއް އެ ޕާޓީން ކެނޑި، އައު ޕާޓީއެއް އުފައްދަވާނެ ކަމަށް ފާއިތުވި ބުދަ ދުވަހު ވަނީ އިއުލާން ކޮށްފައެވެ. 

އެކަމާއި ގުޅިގެން ޝިޔާން ރޭ ކުރެއްްވި ޓުވީޓެއްގައި ވިދާޅުވީ، އޭނާ އަންދާޒާ ކުރައްވާ ގޮތުގައި، އިދިކޮޅު ޕީޕީއެމް ފިޔަވައި، ދެން ރާއްޖޭގައި އޮންނާނެ އެންމެ ބޮޑު ސިޔާސީ, ފިކުރެއްގެ ދިރުމުން އުފައްދަން މަސައްކަތް ކުރަމުންދާ ޕާޓީ ކަމަށެވެ. 

Advertisement

"އަޅުގަނޑުމެން ދާނީ ކުރިއަށް، ކުރިއަށް ބާރަށް ކުރިއަށް،" ޝިޔާން ވިދާޅުވިއެެވެ. 

މިއާއެކު ޝިޔާން ވިދާޅުވީ ލ، އެމްޑީޕީގައި ތިއްބެވި "ސާފު" މެންބަރުން އެ ޕާޓީ ދޫކޮށް، ފިކުރެއްގެ ދިރުމުން އުފައްދާ ޕާޓީއާއި ގުޅޭނެކަން ކަށަވަރުވެ ޔަގީންވާ ކަމަށެވެ. 

އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އާއި އެމްޑީޕީގެ ނާއިބު ރައީސް މުހައްމަދު ޝިފާޒު އާއި އެމްޑީޕީއަށް ނިސްބަތްވެވަޑައިގަންނަވާ 12 މަޖިލިސް މެންބަރުން ހިމެނޭހެން ޖުމްލަ 14 މެންބަރުން ބުދަ ދުވަހު ވަނީ އެމްޑީޕީން ވަކިވެވަޑައިގެންފައެވެ.

އެއަށްފަހު އެ މެންބަރުން ބޭއްވި ނޫސްވެރިންގެ ބައްދަލުވުމުގައި ވަނީ އެ ފެކްޝަނުން "ފިކުރެއްގެ ދިރުން" ނަމުގައި އައު ޕާޓީއެއް އުފެއްދުމަށް ނިންމާ ފައިވާ ކަމަށާ އެ ޕާޓީ އުފެއްދުމަށް އަންނަ ހަފްތާގައި ފޯމު ހުށަހެޅުމަށް ފަހު 3،000 މީހުންގެ ސޮއި ހޯދުމުގެ މަސައްކަތް ފައްޓާނެ ކަން އިއުލާންކޮށްފަ އެވެ. 

އަދި އެ ބައްދަލުމުގައި ވާހަކަ ދައްކަވަމުން މަޖިލީހުގެ ނާއިބު ރައީސް އީވާ އަބްދުالله ވަނީ ފިކުރެއްގެ ދިރުމުން އުފައްދާ ޕާޓީން ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ވާދަކުރައްވާނެ ކަންވެސް އިއުލާން ކުރައްވާފައެވެ. އަދި “ފިކުރެއްގެ ދިރުން” ގެ ކެނޑިޑޭޓު ކަނޑައަޅާނީ އެތެރޭގެ ފުރިހަމަ ޑިމޮކްރެޓިކް ނިޒާމެއްގެ ތެރެއިންކަމަށްވެސް އީވާ ވިދާޅުވި އެވެ.