އިދިކޮޅު ފަރާތްތަކުން ކިތަންމެ ވަރަކަށް ހަޅޭ ލެވިޔަސް 2023 ވަނަ އަހަރުގެ ރިޔާސީ އިންތިޚާބު ކާމިޔާބުކުރައްވާނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުކަމަށް ހޯމް މިނިސްޓަރު އަދި މި ސަރުކާރުގެ ކޯލިޝަން ޕާޓުނަރު އިމްރާނު އަބްދުالله ވިދާޅުވެއްޖެ އެވެ. 

ރައްޔިތުންގެ މަޖިލީހަށް މިއަދު ހޯމް މިނިސްޓަރު އިމްރާނު ވަޑައިގެން މެމްބަރު އަބްދުالله ރިޔާޒުގެ ސުވާލަށް ޖަވާބުދެއްވަމުން ދިޔަ ވަގުތު އިދިކޮޅު ކޯލިޝަންގެ މަޖިލީސް މެމްބަރުން ވަނީ އެ ކޯލިޝަންގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ނުހައްގުން އަނިޔާކުރަމުންދާކަމަށް ތުހުމަތުކޮށް އަޑުއުފުލާފަ އެވެ. 

އެގޮތުން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމާއި، މާވަށު ދާއިރާގެ މެމްބަރު މުޙައްމަދު ސައީދުގެ އިތުރުން ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފު ވަނީ މިނިސްޓަރު އިށީނދެވަޑައިގެން އިންނެވި މޭޒުކޮޅު ކައިރިއަށް ވަޑައިގެން އިހުތިޖާޖުކޮށްފަ އެވެ. އިދިކޮޅު މެމްބަރުން ވަނީ ރައީސް ޔާމީން މިނިވަންކުރުމަށް ގޮވާލާފަ އެވެ. 

Advertisement

އިމްރާނުގެ ވާހަކަތަކަށް ހުރަސްއެޅޭގޮތަށް އިދިކޮޅުގެ މެމްބަރުން އިހުތިޖާޖު ކުރަމުން ދިއުމާއި ގުޅިގެން ރިޔާސަތުން ވަނީ އެ މެމްބަރުންގެ ނަން އިއްވާ މަޖިލީސް ކުރާ މާލަމުން ނެރެފައެވެ. 

މިއަދުގެ ޖަލްސާއަށް ފަހު އިމްރާނު ކުރެއްވި ޓްވީޓެއްގައި ވަނީ އެ މެމްބަރުންނަށް ރައްދުދެއްވާފަ އެވެ. 

އެގޮތުން އިދިކޮޅު މެމްބަރުން އިހުތިޖާޖު ކުރަމުން ދިޔަ ފޮޓޯއެއް ހިއްސާކުރައްވާ އިމްރާނު ވިދާޅުވީ އިދިކޮޅު ފަރާތްތައް ކިތަންމެ ވަރަށް ހަޅޭލެވިޔަސް ރިޔާސީ އިންތިޚާބު ރައީސް ޞާލިހު ކާމިޔާބުކުރައްވާނެ ކަމަށެވެ. 

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ހޯދަވާދެއްވުމުގެ މަސައްކަތް ކުރުމަށް، އެމްޑީޕީއާއެކު އެންމެ ފުރަތަނަ ކޯލިޝަން ހަދާފައިވަނީ އަދާލަތު ޕާޓީންނެވެ. 

ރިޔާސީ އިންތިޚާބާއި ގުޅޭގޮތުން ހިސާބުތައް ޖައްސަވާ އިމްރާނު ވަނީ މި އިންތިޚާބު ރައީސް ޞާލިހު އެއްބުރުން ކާމިޔާބު ކުރައްވާނެކަމުގެ ޔަގީންކަން ވެސް ދެއްވާފަ އެވެ.