ސަރުކާރުގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗް އިން މީހެއްގެ އޮޕަރޭޝަނެއް ކުރިއިރު ބޭނުން ކުރި ބުރުމާގެ ކައްޓެއް ހަށިގަނޑު ތެރޭގައި އޮތް މަންޒަރު ފެންނަ އެކްސްރޭއެއްގެ ފޮޓޯތަކެއް ސޯޝަލްމީޑިއާގައި އާއްމުވެއްޖެއެވެ.

އެ ފޮޓޯތައް އާންމު ކޮށްފައިވަނީ ފެނަކައިގެ ކުރީގެ ޑިރެކްޓަރ މުއާޒް ހަލީމެވެ.

ހެލްތު މިނިސްޓްރީގެ މީޑިއާ އޮފިޝަލް ޓެގް ކުރައްވައި އޭނާ ކޮށްފައިވާ އެ ޓުވީޓުގައި ވަނީ ދާދިފަހުން އޭނާގެ ޢާއިލާގެ ކަނބަލަކު އެކްސިޑެންޓްވެ ކޮނޑުގެ ކަށިގަނޑަށް ލިބުނު ގެއްލުމެއްގެ ސަބަބުން ކަށިގަނޑަށް ބޯލްޓްތަކެއް ޖަހަންޖެހުނު ކަމަށެވެ.

Advertisement

އަދި އެކަމަށްޓަކައި ކުރެވުނު ސާޖަރީގައި ބޭނުންކުރި ބުރުމާގެ ކަށި ބިންދައިގެން ގޮސްފައިވާ އެނގިފައިވާ ކަން ފާހަގަކުރައްވައި އޭނާ ވިދާޅުވީ, ސާރޖަރީއަށް އެތައްދުވަހެއް ވީފަހުން، މިމަހުގެ 21 ވަނަ ދުވަހު، އެނގިގެން ދިޔައީ އެ ބިންދައިގެންދިޔަ ބުރުމާ ކަށި އޮތީ ހަށިގަނޑު ތެރޭގައިކަމަށެވެ. 

އެއަށްފަހު އިއްޔެ، ކޮނޑުގެ އެކްސްރޭ ބެލުމަށްފަހު، ކަށި އެތެރޭގައި އޮތަސް " އޯކޭ " ކަމަށް ޑޮކްޓަރ ވިދާޅުވެފައިވާ ކަމަށް އޭނާ ވިދާޅުވި އެވެ.

"އިންސާނުންގެ ކަށްޓަށް ޖަހާ ބޯލްޓް ހަދާފައި ހުންނަނީ "އޯކޭ" ވާގޮތަށްކަން އެނގޭ. އެކަމަކު ބޯލްޓްޖަހަން ގެންގުޅޭ ބުރުމާގެ ކަށި އެތެރެއަށް ދޫކޮށްލާފައި ފަހާލީމާ އެވިދާޅުވާ "އޯކޭ" ވުމަކީ ކޮބައިކަން އެނގުނު އެއްވެސް ޑޮކްޓަރަކާއި ދިމަލެއް ނުވި." މުއާޒުގެ ޕޯސްޓުގައި ވެއެވެ. 

މުއާޒު އިތުރަށް ވިދާޅުވީ، އައިޖީއެމްއެޗަކީ އާސަންދައިން ޗާޖުކޮށްގެން ރައްޔިތުންނަށް ޚިދުމަތްދޭ، ދައުލަތުގެ ހޮސްޕިޓަލް ކަމަށެވެ. ވީއިރު އެ ހޮސްޕިޓަލުގެ މިފަދަ ކަންކަމާއި ގުޅޭ ވާހަކަ ނުދައްކައި މަޑުން ހުންނަންވީތޯވެސް އޭނާ ވަނީ ސުވާލު ކުރައްވާފައެވެ. 

އަދި އެ ޕޯސްޓަކީ "ސިޔާސީ" ނުވަތަ "އަގުވައްޓާލުމަށް ދައްކާ ވާހަކައެއް" ކަމަށް ނިންމަވާނީތޯވެސް އޭނާ ވަނީ ހެލްތު މިނިސްޓްރީއާއި ސުވާލުކުރައްވާފައެވެ.

އެކަމާއި ގުޅިގެން "ވޮއިސް" އަށް މައުލޫމާތު ދެއްވަމުން އައިޖީއެމްއެޗްގެ މީޑިއާ އޮފިޝަލް ވިދާޅުވީ، އެ ހޮސްޕިޓަލުންދޭ ފަރުވާ އާއި ގުޅިގެން ޕޭޝަންޓުންގެ ހުންނަ ޝަކުވާ އާއި، އެފަދަ މައްސަލަތައް ހުށަހެޅުމަށް ޑިޕާޓްމަންޓެއް އިންނަ ކަމަށެވެ. އަދި ބުރުމާ ކަށި ހަށިގަނޑު އެތޭރަގައި އިން ކަމަށް ބުނާ، މައްސަލަ އާއި ގުޅިގެން ބަލިމީހާ ނުވަތަ އާއިލާގެ ފަރާތުންވެސް އެއްވެސް ޝަކުވާއެއް މިހާތަނަށް ވެސް ލިބިފައި ނުވާކަމަށް މީޑިއާ އޮފިޝަލް ވިދާޅުވި އެވެ.