‏މާލެ އާއި ވިލިމާލެ، ގުޅީފަޅު އަދި ތިލަފުށި ގުޅާލާ ގްރޭޓާ މާލޭ ކަނެކްޓިވިޓީ ބްރިޖު (ތިލަމާލެ ބްރިޖު) މަޝްރޫއުގެ މަސައްކަތުގެ ސްޕީޑު އެ މަސައްކަތް ކުރާ ކުންފުނިން ކިތަންމެ ލަސްކުރި ކަމުގައި ވިޔަސް، އެކަމުގައި ސަރުކާރަށް އެއްޗެއް ބުނެވޭކަށް ނެތް ކަމަށް ރާއްޖޭގެ ކުރީގެ ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ. 

ބްރިޖު ލަސްކަމުން އަވަހަށް ނިންމުމަށް އިތުރު 25 މިލިއަން ޑޮލަރު ދީފައިވާ ކަމަށް މައުލޫމާތު ލިބިފައިވާކަން ފާހަގަކުރައްވާ ބްރިޖު މަޝްރޫއު ނިމޭނެ ތާރީހާ ގުޅޭ ގޮތުން އިއްޔެގެ މަޖިލީހުގައި މާފަންނު މެދު ދާއިރާގެ ކުރީގެ އެމްޑީޕީ މެމްބަރު އިބްރާހިމް ރަޝީދު ވަނީ ސުވާލު ކުރެއްވާފަ އެވެ.

މި ސުވާލަށް ޖަވާބުދެއްވަމުން އަސްލަމް ވިދާޅުވީ މަސައްކަތުގެ ޝެޑިއުލަށް ބަލާ އިރު ލަސްތަކެއް އެބަ އުޅޭ ކަމަށެވެ. އެކަމަކު މަސައްކަތް ނިންމަން ދީފައިވާ ތާރީހު އިތުރަށް ދިގުކުރުމުގެ ވިސްނުމެއް ނެތް ކަމަށް ވިދާޅުވި އެވެ.

"ކޮންޓްރެކްޓަރުގެ މަސައްކަތުގެ ޝެޑިއުލަށް ބަލާފައި އެބަ ހުރި ޑިލޭ. މިހާތަނަށް އަންނަންވާ މިންވަރަކަށް ނޫން [މަސައްކަތް] އައިސްފައި ހުރީކީ. ކެޗަޕް ކުރެވޭނެ ކޮންމެވެސް މިންވަރަކަށް. އެއްކޮށް ކެޗަޕް ނުކުރެވޭނެ. އެކަމަކު އަދި އަޅުގަނޑުމެން އެކްސްޓެންޝަނެއް ދޭކަށް ގަސްތެއް ނުކުރަން،" އަސްލަމް ވިދާޅުވި އެވެ.

އެކަމާއި ގުޅިގެން ދުންޔާ މިއަދު ކުރެއްވި ޓްވީޓެއްގައި ވިދާޅުވީ ބްރިޖުގެ މަސައްކަތް ކުރާ ކޮންޓްރެކްޓަރަކީ ކަނޑު ހުރަސްކޮށް ބުރިޖެއް ހެދުމުގެ ތަޖުރިބާ ހުރި ބައެއްނޫން ކަމަށެވެ. 

އަދި ބުރިޖުގެ މަސައްކަތް ކިތަންމެލަސްކުރިއަސް ސަރުކާރަށް އެއްޗެކޭ ބުނެވެން ނެތް ކަމަށާ، ބުނެފި ނަމަ ލޯނު އިންޓަރެސްޓު މަތިވާ ކަމަށް ދުންޔާ ވިދާޅުވި އެވެ. 

"މަސައްކަތް ކިތަންމެލަސްކުރިއަސް ސަރުކާރަކަށް ނެތް އެއްޗެކޭބުނެވެން. ބުނެފިއްޔާ ލޯނު އިންޓަރެސްޓު މަތިވޭ. ލޯނުއެގްރީމެންޓާއި ކޮންޓްރެކްޓުއެވޯޑުކުރިގޮތް ހާމަކުރުން މުހިންމު." ދުންޔާ ވިދާޅުވިއެވެ. 

ދުންޔާ ވަނީ ބްރިޖު މަސައްކަތަކީ "އަސްލު" ދަރަނި ދަންތުރަ އެއްގެ ގޮތުގައި ސިފަ ކުރައްވާފައެވެ. 

އިންޑިއާގެ އެފްކޮންސް އިންފްރާސްޓްރަކްޗާ ލިމިޓެޑާއި ދިވެހި ސަރުކާރާއެކު ތިލަމާލެ ބްރިޖުގެ މަޝްރޫއުގެ އެއްބަސްވުމުގައި ސޮއިކުރީ 2021 ވަނަ އަހަރު އެވެ. އެ މަޝްރޫއު ކުރިއަށްގެންދަނީ އިންޑިއާއިން ދޭ 100 މިލިއަން ޑޮލަރުގެ ހިލޭ އެހީ އާއި އެ ގައުމުގެ އެގްޒިމް ބޭންކުން ދޫކުރާ 400 މިލިއަން ޑޮލަރުގެ ލައިން އޮފް ކްރެޑިޓްގެ އެހީގަ އެވެ. އޭގެ އިތުރުން ބްރިޖުގެ މަސައްކަތް އަވަސްކުރުމަށް އިތުރު 100 މިލިއަން ޑޮލަރުގެ ލޯނެއް ސަރުކާރުން ވަނީ އިންޑިއާއިން ނަގާފައެވެ.