ސިޔާސީ ގޮތުން ބަލިވެ ބާކީވާ ކޮންމެ ފަހަރަކު ސަޕޯޓަރުންނަށް އޮޅުވާލަން "ސިމްޕަތީ ކާޑް" ކުޅުމަކީ ބައެއް ސިޔާސީ ބޭފުޅުންގެ ސަގާފަތަކަށް ވެއްޖެ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.

ޒާހިރު މިހެން ވިދާޅުވެފައިވަނީ މިއަދު ކުރެއްވި ޓްވީޓެއްގައެވެ.

އެގޮތުން ޒާހިރު ވިިދާޅުވެފައިވަނީ ސިޔާސީ ގޮތުން ބަލިވެ ބާކީވާ ކޮންމެ ފަހަރަކު ސަޕޯޓަރުންނަށް އޮޅުވާލަން "ސިމްޕަތީ ކާޑް" ކުޅެ ސަރުކާރުގެ ބޮލުގަ ދޮގު ތުހުމަތުތައް އެޅުވުމަކީ ބައެއް ސިޔާސީ ބޭފުޅުންގެ ސަގާފަތަކަށް ވެއްޖެ ކަމަށެވެ.

Advertisement

"އެހެންކަމުން މިކަމަކީ ރައްޔިތުންނަށް ފަރިތަ ފެއިލް ވެފައިވާ އުކުޅަކަށް ނޫނީ ދެން ނުވާނެ" ޒާހިރު އިތުރަށް ވިދާޅުވިއެވެ.

ޒާހިރު މިހެން ވިދާޅުވެފައިވަނީ ސީދާ ކޮން ކަމަކާ ގުޅިގެން ކަން ނޭނގުނު ނަމަވެސް އިއްޔެ ޓްވިޓާގައި ވަނީ މެއި 6، 2021 ގައި ރައީސް ނަޝީދަށް އަމާޒުކޮށް ދިން ބޮމުގެ ހަމަލާއާއި ގުޅޭގޮތުން އެެމަނިކުފާނުގެ އަރިސް ބޭފުޅުން ވާހަކަ ދައްކަވާފައެވެ.

މިއާއިއެކު މިއަދުގެ މަޖްލިސް ޖަލްސާގައި ވެސް މި ހަމަލާއާއި ދޭތެރޭ ރައީސް ނަޝީދަށް ތާއީދު ކުރައްވާ މަޖްލިސް މެމްބަރުން ވާހަކަ ދައްކަވާ ތުހުމަތުތައް ކުރެއްވުމުގެ އިތުރުން، ސަރުކާރަށް ތާއިދު ކުރައްވާ މެމްބަރުންނާއި ރައީސް ނަޝިދަށް ތާއިދު ކުރައްވާ ބޭފުޅުން ދޭތެރޭ ބަހުގެ ހަމަލާތައް ވަނީ ރައްދު ކުރެވިފައެވެ.

އެގޮތުން މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ބޮމުގެ ހަމަލާއެއް ދިނުމުގައި ބައިވެރިވި، އުމުރުދުވަހަށް ޖަލަށްލުމަށް ހުކުމްކޮށްފައިވާ އަބްދުالله އަލިމަނިކު މާފުދިން ގޮތެއް މިހާތަނަށް ވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ހާމަކޮށްދީފައި ނުވާކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ވަނީ ވިދާޅުވެފައެވެ.

މީގެ އިތުރުން ރައްޔިތުންގެ މަޖިލީހުގެ މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވަނީ އެ ހަމަލާއަކީ ސީދާ ރައީސް ޞާލިޙު އަޑީގައި ހުންނަވައިގެން ދިން ހަމަލާއެއްކަމަށް ޔަގީންކުރެވޭކަމަށް ވިދާޅުވެފަ އެވެ.