ދިވެހިރާއްޖޭގައި އެހީ ޖަމިއްޔާއި ހިންގަމުންދާ މަޝްރޫޢްތަކަށް ބޭރު ދުނިޔޭގެ އެހީ ލިބޭނެ މަގުތައް ހަމަޖެހި، އެ މަސައްކަތައް އިހުނަށްވުރެ ބާރަށް ކުރިއަށް ގެންދިޔުމަށް އެ ޖަމިއްޔާ އާއި އިންޓަނޭޝަނަލް އެއިޑް ކެންޕެއިން (އައިއޭސީ) އާއި އެކު އެއްބަސްވުމެއްގައި ސޮއިކޮށްފި އެވެ. 

އެހީ ޖަމިއްޔާއަކީ ދިވެހިރާއްޖޭގައި އިންސާނީ އެހީ ފޯރުކޮށްދިނުމުގެ މަޤްސަދުގައި އުފެދުނު އެންމެ ފުރަތަމަ ޖަމިއްޔާއެވެ. އެގޮތުން އެ ޖަމިއްޔާ އިން މިހާރުވެސް ރާއްޖޭގެ އެކި ސަރަހައްދުތަކުގައި އަންނަނީ ޕްރޮޖެކްޓްތައް ހިންގަމުންނެވެ. 

އައިއޭސީން ބުނީ އެހީ ޖަމިއްޔާގެ މަސައްކަތްތަކަށް އިތުރު ބާރަކާއި ހަލުވިކަމެއް ގެނެސްދިނުމުގެ މަޤްސަދުގައި، އައިއޭސީ އާއި އެހީ ޖަމިއްޔާ އެކުގައި މަސައްކަތް ކުރުމަށްޓަކައި އެއްބަސްވުމެއްގައި ސޮއިކޮށްފައިވާ ކަމަށެވެ. 

Advertisement

"މި އެއްބަސްވުމާއިއެކު ދިވެހިރާއްޖޭގައި އެހީ ޖަމިއްޔާއި ހިންގަމުންދާ މަޝްރޫޢްތަކަށް ބޭރު ދުނިޔޭގެ އެހީ ލިބޭނެ މަގުތައް ހަމަޖެހި، އެ މަސައްކަތައް އިހުނަށްވުރެ ބާރަށް ކުރިއަށް ދާނެކަމީ އަޅުގަނޑުމެން ޤަބޫލުކުރާކަމެކެވެ. އިންޝާالله" އައިއޭސީން ބުނެފައިވެއެވެ. 

މީގެ އިތުރުން އައިއޭސީން ބުނީ، މިއެއްބަސްވުމުގެ ސަބަބުން ބޭރު ދުނިޔޭގެ އެކި ޤައުމުތަކުގައި މިހާތަނަށް އައިއޭސީން ކުރިއަށް ގެންދިޔަ ފަދަ މުހިއްމު ބޮޑެތި މަޝްރޫޢްތަކެއް އެހީ ޖަމިއްޔާއާއެކު ކުރިއަށް ގެންދެވި، ދިވެހިންނަށް ގިނަގުނަ ފައިދާތަކެއް ކުރާނެކަމަށް ވަރަށް ބޮޑަށް އުއްމީދު ކުރާ ކަމަށެވެ.

އައިއޭސީ އާއި އެހީ ޖަމިއްޔާ އާއި އެކު އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން--ފޮޓޯ/އައިއޭސީ

އައިއޭސީ އަކީ ދިވެހި ރައްޔިތުންގެ އެހީ، ހާލުގައި ޖެހިފައިވާ ފަތާތްތަކަށް ފޯރުކޮށްދިނުމަށްޓަކައި ބައިނަލް އަޤްވާމީ ގޮތުން ހަރަކާތްތެރިވާ ޖަމްޢިއްޔާއެކެވެ. އެގޮތުން، ވޭތުވެދިޔަ 6 އަހަރު ދުވަހުގެ ތެރޭގައި ދުނިޔޭގެ އެތައް ޤައުމެއްގައި ދިވެހިންގެ އެހީ ފޯރުކޮށްދެވި، ދިވެހިންގެ ނަމުގައި އެތައް ގިނަގުނަ ބިޔަ މަޝްރޫޢްތަކެއް އެ ޖަމިއްޔާ އިން ވަނީ ހިންގާފައެވެ.

އައިއޭސީން ބުނީ އެ ޖަމިއްޔާ އިން ދިވެހިރާއްޖޭގައި ހަރަކާތްތައް ކުރިއަށް ނުގެންދާ މައިގަނޑު ސަބަބަކީ އެ ޖަމިއްޔާގެ ފައުންޑާ އެންޖީއޯ ކަމަށްވާ އެހީ ޖަމިއްޔާއިން ދިވެހިރާއްޖޭގައި ހަރަކާތްތަށް ހިންގާތީ ކަމަށެވެ. 

އަދި އައިއޭސީއަކީ ބައިނަލްއާޤްވާމީ ގޮތުން ސީދާ ހަރަކާތްތެރިވާނެ ވަކި ޕްލެޓްފޯމެއް އުފެއްދުމައްޓަކައި، އެހީ ޖަމިއްޔާ އިސްވެ އޮވެ އުފައްދާފައިވާ ޖަމިއްޔާއެއް ކަމަށްވެސް އެ ޖަމިއްޔާ އިން ފާހަގަކުރެއެވެ.