ހދ. މަކުނުދޫ ގެއެއްގައި އަލިފާން ރޯވެ، އެގެ ބޭނުން ނުކުރެވޭ ވަރަށް އަނދާ ހުލިވެއްޖެއެވެ.
މަކުނުދޫ ކައުންސިލްގެ ރައީސް އައުޒަމް އާދަމް "ވޮއިސް" އަށް ވިދާޅުވީ، މި ހާދިސާ ހިނގާފައި ވަނީ މިރޭ 7:45، 8 ޖަހާކަންހާއިރު ކަމަށާއި 9:45 ހާއިރު އަލުފާންގަނޑު ނިވާލެވިފައިވާ ކަމަށެވެ.
މި ހާދިސާ ހިނގާފައިވާ "އަލްފާ" ގޭގައި، ކުޑަކުއްޖަކު ހިމެނޭހެން ހަތަރު މީހުން ދިރިއުޅޭއިރު، ހާދިސާ ހިނގި ވަގުތުވެސް އެ ގޭގައި މީހުން އުޅުނު ކަމަށާއި ނަމަވެސް އެންމެންވެސް ސަލާމަތްތެރިކަމާއެކު ރައްކާތެރި މާހައުލަކަށް ގެންގޮސްފައި ވާކަމަށް އައުޒަމް ވިދާޅުވިއެވެ.
މި ހާދިސާގައި މީހަކަށް ގެއްލުމެއް ލިބިފައި ނުވި ނަމަވެސް އެ ގެ ވަނީ އެއްކޮށް ބޭނުން ނުކުރެވޭ ވަރަށް އަނދާފައި ކަމަށް އައުޒަމް ވިދާޅުވިއެވެ. އަދި ގެއާއި އިންވެގެން ހުރި، ކުރިން ފިހާރައެއް ގޮތުގައި ބޭނުންކުރި ތަނެއްވެސް އެއްކޮށް އަނދާފައި ވާކަމަށް އައުޒަމް ވިދާޅުވިއެވެ.
ހާދިސާ ހިނގި ސީދާ ސަބަބު ދެނެގަނެވިފައި ނުވާކަމަށް އައުޒަމް ވިދާޅުވިއެވެ.
"އަލްފާ" ގޭގެ މީހުން މިވަގުތު ތިބީ އާއިލާ ބައެއްގެ ގޭގައެވެ.
Advertisement
This content is created and paid for by advertisers and does not involve Voice Journalists
