ޖުމްހޫރީ ޕާޓީގެ ހަމަ އެކަނި އަންހެން ޑެޕިއުޓީ ލީޑަރު، އަދި ޓްރާންސްޕޯޓް މިނިސްޓަރު އައިޝަތު ނަހުލާ، ޖުމްހޫރީ ޕާޓީގެ ލީޑަރު އަދި ފިރިކަލުން ޤާސިމް އިބްރާހިމަށް 2023 ފޯމު ހަވާލު ކުރައްވައިފިއެވެ.

"ފުރަވީރުން" ނަމުގައި ރޭ ހުޅުމާލޭގެ ސެންޓްރަލް ޕާކްގައި އޮތް ޒުވާނުންގެ ހާއްސަ އިވެންޓުގައި ޖުމްހޫރީީ ޕާޓީއާއި އަލަށް ގުޅުނު 2023 މެމްބަރުން ފޯމު ޤާސިމާއި، ހަވާލު ކުރައްވަމުން ނަހުލާ ވިދާޅުވީ، އެ ޕާޓީގެ ޑެޕިޔުޓީ ލީޑަރެއްގެ މަގާމަށް އޭނާ އިންތިހާބު ވުމާއި އެކު ޒިންމާތައްވެސް ބޮޑުވެގެން ގޮސްފައިވާ ކަމަށެވެ. އެހެން ކަމުން ޕާޓީގެ މެންބަރުން އޭނާއަށް ވޯޓު ދިން މިންވަރަށް މަސައްކަތް ވެސް ކުރައްވުމަށްވެސް އަޒުމް ކަނޑައެޅުއްވި ކަމަށް ވިދާޅުވި އެވެ.

އެހެންކަމުން، ފުރަތަމަ ކަމަކަށްވެސް ފެއްޓެވީ ޕާޓީ ފުޅާ ކުރުމުގެ މަސައްކަތް ކަމަށާ، އެ 2023 މެންބަރުންނަކީ އެގޮތުން ކުރެވުނު މަސައްކަތުން ވޭތުވެދިޔަ ހަތަރު ވަރަކަށް ހަފްތާ ތެރޭގައި އެ ޕާޓީއަ ގުޅުނު މެންބަރުން ކަން ނަހުލާ ފާހަގަ ކުރެއްވި އެވެ.

މިއިވެންޓާއި ގުޅޭގޮތުން ޖޭޕީގެ ތަރުޖަމާނު ޢަލީ ސޯލިހު ކުރެއްވި ޓްވީޓެއްގައި ވިދާޅުވީ، ޖުމްހޫރީޕާޓީގެ ޙަޔާތުގައި ފުރަތަމަ ފަހަރަށް މެމްބަރުން އިންތިޙާބު ކުރެއްވި އަންހެން ޑެޕިއުޓީ ލީޑަރު ދިވެހި ސިޔާސީ މަސްރަހު ގުޑުވާލައި، އާންމުންނާއި ޕާޓީއާއި އެހެނިހެން ސިޔާސީ ފަރާތްތަކަށް ހައިރާން ގެނުވައި، ސިއްސުވާލައިފި ކަމަށެވެ. 

މި އަހަރުގެ ރިޔާސީ އިންތިހާބު އަންނަ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ނިންމާފައިވާއިރު އިންތިހާބަށް ތައްޔާރުވުމުގެ މަސައްކަތް ޖޭޕީން މިހާރު ވަނީ ފަށާފައެވެ. އެގޮތުން ޕާޓީގެ މެންބަރުން އިތުރު ކުރުމުގެ މަސައްކަތް އެ ޕާޓީން ފަށާފައިވާއިރު، ޕާޓީގެ ރިޔާސީ ކެންޑިޑޭޓް ގާސިމަށް ރިޔާސީ ޓިކެޓް ހަވާލުކުރުން އަންނަ މަހު 9 ވަނަ ދުވަހު ބޭއްވުމަށް ވަނީ ހަމަޖެހިފައެވެ.