ކުރިއަށް އޮތް ރިޔާސީ އިންތިޚާބުގައި މޯލްޑިވްސް ނެޝަނަލް ޕާޓީ (އެމްއެންޕީ)ގެ ފަރާތުން ވާދަކުރައްވާ އެ ޕާޓީގެ ރިޔާސީ ކެންޑިޑޭޓު ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމަށް އަރުވައިފި އެވެ. 

ނާޒިމަށް ރިޔާސީ ޓިކެޓު އަރުވާފައިވަނީ އެކަމަށްޓަކާ އަރޓިފިޝަލް ބީޗުގައި ބޭއްވި ޚާއްސަ ޖަލްސާގަ އެވެ. އެމް.އެން.ޕީގެ ރިޔާސީ ޓިކެޓު ޕާޓީގެ ރާއީސަށް އަރުވާފައި މިވަނީ އެމް.އެން.ޕީގެ ރިޔާސީ ޕްރައިމަރީއަށް ހުޅުވާލި ފުރުޞަތުގައި ނާޒިމް ފިޔަވައި އިތުރު ބޭފުޅަކު ވާދަކުރައްވާފައެއް ނުވެއެވެ. 

ރިޔާސީ ޓިކެޓާއި ހަވާލުވެވަޑައިގަތުމަށް ފަހު، ސަޕޯޓަރުންނާއި މުޚާތަބުކުރައްވާ އެމް.އެން.ޕީގެ ރިޔާސީ ކެންޑިޑޭޓު މުޙައްމަދު ނާޒިމު ވަނީ ކުރިއަށް އޮތް ރިޔާސީ އިންތިޚާބުގެ ރޭހަށް ނިކުމެވަޑައިގަތުމަށް އެމަނިކުފާނު ބޭނުންފުޅުވި ސަބަބުތަކާއި، މެނިފެސްޓޯގައި ހިމެނޭ މުހިއްމު ކަންކަމާއި، އެމަނިކުފާނު ގެންގުޅުއްވާނެ މުހިއްމު ސިޔާސަތުތަކުގެ މައްޗަށް އަލިއަޅުއްވާލައްވާ ވާހަކަދައްކަވާފަ އެވެ.

Advertisement

އެންއެންޕީގެ ރިޔާސީ ކެންޑިޑޭޓު ނާޒިމް 

ރިޔާސީ ޓިކެޓު ނާޒިމަށް އެރުވުމަށްފަހު، ނާޒިމުގެ ކެމްޕޭނު ވެސް ވަނީ ރަސްމީކޮށް ލޯންޗުކޮށްފަ އެވެ. 

އެގޮތުން ކެމްޕޭން ލޯގޯއާއި، ޝިޢާރުކަމުގައިވާ "އުޖާލާ ޒަމާން" އަދި ކެމްޕޭންގެ ރަސްމީ ލަވަ މި ޖަލްސާގައި ވަނީ އިފްތިތާޙްކޮށްފަ އެވެ.

2023 ވަނަ އަހަރުގެ ރިޔާސީ އިންތިޚާބު ސެޕްޓެމްބަރު 9 ވަނަ ދުވަހު ބާއްވާނެކަން އިލެކްޝަން ކޮމިޝަނުން އިއުލާނުކޮށްފައިވާއިރު، މި އިންތިޚާބުގައި ނާޒިމުގެ އިތުރުން 5 ބޭފުޅަކު ވާދަކުރައްވާނެކަން ވަނީ އިއުލާނުކުރައްވާފަ އެވެ. 

އެގޮތުން އެމްޑީޕީން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އަދި ޕީޕީއެމުން ރައީސް އަބްދުﷲ ޔާމީން އަބްދުލްގައްޔޫމަށް ވަނީ ރަސްމީކޮށް ރިޔާސީ ޓިކެޓު ހަވާލުކުރައްވާފަ އެވެ.