އެމްއެންޕީގެ ކެންޑިޑޭޓު މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމުގެ ވެރިކަމުގައި ރާއްޖޭގެ ރައްޔިތުންނަށް "އުޖާލާ ޒަމާނެއް" ހޯއްދަވާ ދެއްވާނެކަމަށް އެމަނިކުފާނު ވިދާޅުވެއްޖެ އެވެ. 

ނާޒިމު މިފަދައިން ވިދާޅުވެފައިވަނީ އެމް.އެން.ޕީގެ ރިޔާސީ ޓިކެޓު ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ނެވެ. 

ނާޒިމު ވިދާޅުވީ ސިޔާސީ މައިދާނުގައި ހަގު ލީޑަރަކަށް ވީ ނަމަވެސް، ވާދަކުރަން ތިބި އެހެން ސިޔާސީ ޕާޓީތަކުގެ މައްޗަށް ކުރި ހޯދާނެ ގޮތް އެނގިވަޑައިގަންނަވާ ކަމަށެވެ. 

Advertisement

އެގޮތުން ސިޔާސީ ޕާޓީތައް އުފައްދައިގެން މިވީ 15 އަހަރު ރާއްޖެއަށް ދިމާވެފައިވާ މައްސަލަތަކަށް ލިބުނު މާބޮޑު ކުރިއެރުމެއް ނެތް ކަމަށާއި، އެމަނިކުފާނު މަސައްކަތްޕުޅު ކުރައްވާނީ ޤައުމީ ފިކުރު އިސްކުރައްވައިގެން ކަމަށެވެ. 

ޤައުމީ ފިކުރު އިސްކޮށްގެން ކުރާ މަސައްކަތުގެ ތެރެއިން ރައްޔިތުންގެ ދިރިއުޅުން މިހާރަށްވުރެ އެތައް ގުނައެއް ކުރިއަށް ޖައްސާ ދިވެހިރާއްޖެއަކީ ރައްޔިތުން ފަޚުރުވެރިވާ ޤައުމަކަށް ހެދިދާނެކަމުގެ ޔަގީންކަން އޮތްކަމަށް ނާޒިމު ވިދާޅުވި އެވެ. 

ނާޒިމް ވިދާޅުވީ ހާލަތު ބަދަލުކުރެވޭނީ ރައްޔިތުން ބޭނުންވެގެން ހާލަތު ބަދަލުކުރުމުގެ މަސައްކަތް ކޮށްގެން ކަމަށެވެ. 

އޭނާއަށް ވުރެ ވަކި އިތުރަށް ޤައުމުދެކެ ލޯބިވާ އެއްވެސް ލީޑަރެއް ނުހުންނާނެ ކަމަށާއި، ރިޔާސީ އިންތިޚާބަށް ނިކުތީ ތަސައްވަރެއް އޮވެގެން ހާލަތު ބަދަލުކުރުމަށްކަމަށް ނާޒިމް ވިދާޅުވި އެވެ. 

އެގޮތުން ރައްޔިތުންގެ ދިރިއުޅުން ފާގަތިކޮށް ނެތެމުންދާ ގައުމިއްޔަތު ކޮޅަށް ޖެހުމަކީ އޭނާ އެންމެ އިސްކަން ދެއްވާނެ މަސައްކަތްތަކުގެ ގޮތުގައި ނާޒިމްގެ ވާހަކައިގައި ފާހަގަކުރެއްވި އެވެ.