ރާއްޖޭގެ 21 ވަނަ އެއަރޕޯޓަކަށް ވާނީ މަގޫދޫ އެއަރޕޯޓް ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ ފ.މަގޫދޫގެ ފެނަކަ އޮފީހާއި، އެ ރަށުގެ ފެނާ ނަރުދަމާގެ ހިދުމަތް ރަސްމީކޮށް އިފްތިހާހު ކުރުމަށް ބޭއްވި ޖަލްސާގައި ދެއްކެވި ވާހަކައިގައެވެ.

މި ޖަލްސާގައި ވާހަކަ ދައްކަވަމުން އަސްލަމް  ވިދާޅުވީ ރާއްޖޭގައި 19 އެއާޕޯޓެއް އަޅާފައިވާއިރު، އޭގެ ތެރެއިން ދެ އެ އާޕޯޓު އެޅީ މި ސަރުކާރުން ކަމަށެވެ. އަދި މިހާރުވެސް މި ސަރުކާރުން 5 އެއާޕޯޓެއް އެޅުމުގެ މަސައްކަތް ކުރަމުންދާކަމަށެވެ.

މިނިސްޓަރު އިތުރަށް ވިދާޅުވީ ކަނޑު މަގުންނާއި ވައިގެ މަގުން ދަތުރުފަތުރު ކުރުން ފަސޭހަ ކުރުމަށް ހިންގާ މަޝްރޫއުތައް ނިމުމުން، އެއް ރަށުން އަނެއް ރަށަށް ނުދެވޭނެ އެއްވެސް ރަށެއް ރާއްޖޭގައި ނޯންނާނެ ކަމަށެވެ.

އަސްލަމް ވިދާޅުވީ ރައީސް ޞާލިޙްވެސް އަދި އެބޭފުޅާވެސް އެއްވެސް މަޝްރޫޢެއްގަ ބިންގާ އަޅާ ރަސްމިއްޔާތެއްގައި ބައިވެރިވެ ވަޑައި ނުގަންނަވާ ކަމަށެވެ. އަދި ބައިވެރިވެ ވަޑައިގަންނަވަނީ މަޝްރޫޢު ނިމި ރައްޔިތުންނަށް ޚިދްމަތް ދެވެން ފެށުމުން އެކަމުގެ އުފާ ފާޅުކުރާ ޖަލްސާގައި ކަމަށެވެ.

"އަޅުގަނޑު މެންނަކީ ވަޢުދު ވާ ބައެއް، ހުވަފެން ދައްކާ ބައެއް ނޫން، ވަޢުދު ވެފަ ވަޢުދު ފުއްދާފަ އެކަމުގެ އުފާ ފާޅު ކުރަން އަޅުގަނޑުމެން އަންނަނީ" އަސްލަމް ވިދާޅުވިއެވެ.

ރޭގެ ހަފްލާގައި ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙާއި ބިލަތްދޫ ދާއިރާގެ މެމްބަރު އަހްމަދު ހަލީމްވެސް ވާހަކަފުޅު ދެއްކެވިއެވެ.