ބިލެއްދޫ ދާޢިރާގެ އެމްޑީޕީ މެންބަރު އަހުމަދު ހަލީމް (ދޮންބިލެއް) ސަރުކާރަށް އެއްބާރުލުން ދެއްވާނަމަ، ދާއިރާގެ ތަރައްޤީގެ މަޝްރޫއުތައް ކުރިއަށް ގެންދަން ބޮޑުތަނުން ފަސޭހަ ވާނެ ކަމަށް ރައީސް އިބްރާޙިމް މުހައްމަދު ޞާލިހު ވިދާޅުވެއްޖެއެވެ. 

ރައީސް ޞާލިހު އެފަދައިން ވިދާޅުވީ، ފ. އަތޮޅަށް ކުރައްވަމުން ގެންދަވާ ދަތުރުފުޅުގައި މަގޫދޫއަށް ވަޑައިގެން އެ ރަށުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އެ ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވަނީ ސަރުކާރަށް ދޮންބިލެއް ދެއްވާ އެއްބާރުލުމަށް ޝުކުރު އަދާކުރައްވައި ކުރިއަށް އޮތް ތަނުގައިވެސް އެ އެއްބާރުލުން ދެއްވުމަށް އެދިވަޑައިގެންފައެވެ.

“އަޅުގަނޑު އެދެނީ ކުރިއަށް މި އޮތް ތަނުގައި ވެސް، މި ރަށުގެ ރައްޔިތުންނަށް އެއްވިސްނުމެއްގައި އިއްޒަތްތެރި މެމްބަރު ކުރިއަށް ވަޑައިގަތުމަށް. އެ އެއްބާރުލުމާ އެކީގައި ކުރިއަށް ވަޑައިގަތީމުން ދާއިރާއަށް ލިބޭ ތަރައްގީ މާ ބޮޑުތަނުން ފަސޭހަވެގެންދާނެ،” ރައީސް ވިދާޅުވިއެވެ.

ރައީސްގެ އެ އެދިލެއްވުން ގަބޫލުކުރައްވާކަން ހާމަކުރައްވައި އެ ޖަލްސާގައި ވާހަކަ ދައްކަވަމުން ދޮންބިލެއް ވިދާޅުވީ ސަރުކާރުން ރައްޔިތުންނަށް ކޮށްދެމުންދާ ކަންތައްތަކާ ގުޅިގެން، ކުރިން ދާއިރާގައި އޮތް މާޔޫސްކަން “މުޅިންހެން ހިނގައްޖެ” ކަމަށެވެ. އަދި ކުރިއެކޭވެސް އެއްގޮތަށް ކުރިއަށް އޮތްތަނުގައި ވެސް ސަރުކާރަށް ދެއްވާނެ ކަމުގެ 100 އިންސައްތަ ޔަގީންކަން އަރުއްވާ ކަމަށްވެސް ވިދާޅުވި އެވެ. 

“އަޅުގަނޑު 100 ޕަސެންޓް ޔަގީންކަން އަރުވަން މި ބިލެތްދޫ ދާއިރާގެ ބޮޑު މެޖޯރިޓީއެއް ރައީސުލްޖުމްހޫރިއްޔާ އިބްރާޙިމް މުހައްމަދު ސާލިހަށް މި އަންނަ ރިޔާސީ އިންތިހާބުގައި ލިބޭނެ. އެއީކީ އަޅުގަނޑުގެ މޮޅުކަމަކުންނެއް ނޫން، އެއީ މަނިކުފާނު މި ދާއިރާއަށް ކޮށްދެއްވި މަސައްކަތް،” ދޮންބިލެއް ވިދާޅުވިއެވެ.

ރައީސުލްޖުމްހޫރިއްޔާ މިފަދައިން ދޮންބިލެއް ގެ އަރިހުން އެދިލައްވާފައިވާއިރު އޭނާ އަކީ މީގެ ކުރިން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ފެކްޝަންގައި ހުންނެވި މެންބަރެއްކަން ފާހަގަކޮށްލަންޖެހެއެވެ. ނަމަވެސް ފަހުން އޭނާ ވަނީ ސަރުކާރު ފަޅިއަށް ޖެހިވަޑައިގެންފައެވެ.