އެމްޑީޕީގެ ސްލޮޓްގައި ސަރުކާރުގެ މަގާމުތަކަށް އައްޔަން ކުރި މެންބަރުންގެ ތެރެއިން އެ ޕާޓީން ކެނޑެމުންދާ މެންބަރުން މަގާމުން ވަކިކުރުމުގެ މަސައްކަތް ސަރުކާރުން ފަށައިފި އެވެ.

އެގޮތުން އެމްޑީޕީގެ ސްލޮޓްގައި އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އައްޔަނު ކުރެވުނު މުހައްމަދު އަންސާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުގެ ޕާޓީ، "ދަ ޑިމޮކްރެޓްސް" އަށް ސޮއި ކުރުމާއި ގުޅިގެން އޭނާ ވަނީ މަގާމުން ވަކިކޮށްފަ އެވެ. 

އަދި މީގެ އިތުރުން އެމިނިސްޓްރީގެ ސީނިއާ އެގްޒެކެޓިވް މުހައްމަދު ހަމްދާން އާއި ހޯމް މިނިސްޓްރީގެ ސީނިއާ ޕޮލިސީ ޑިރެކްޓަރ އާޝިޔަތު އަލައިކާ އަދުނާން ވެސް މިއަދު ވަނީ ވަޒީފާ އިން ވަކިކޮށްފައެވެ. އަލައިކާ އާއި ހަމްދާނަކީ ދެމަފިރިންނެވެ. އެ ދެ ބޭފުޅުން ވެސް ވަނީ މިދިޔަ ހަފްތާގައި ދަ ޑިމޮކްރެޓްސް އަށް ސޮއި ކުރައްވާފައެވެ.

Advertisement

މިކަމާއި ގުޅޭ ގޮތުން، ވޮއިސް އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، އެމްޑީޕީ ސްލޮޓްތަކުގައި ސަރުކާރުގެ މަގާމުތަކުގައި ތިއްބެވި ބައެއް ބޭފުޅުންނަކީ މިހާރު އެ ޕާޓީގެ މެންބަރުން ނޫން ކަމަށް އެ ޕާޓީން ސަރުކާރަށް އަންގާފައިވާ ކަމަށެވެ. އެހެންކަމުން، އެ ބޭފުޅުން މަގާމުން ވަކިކޮށްފައިވާ ކަމަށްވެސް މިއުވާން ވިދާޅުވިއެވެ.

ސަރުކާރުގެ ސިޔާސީ މަގާމު ތަކަކީ، ރައީސުލްޖުމްހޫރިއްޔާ އަށް ލިބިދީފައިވާ ބާރެއްގެ ދަށުން އުފައްދާ މަގާމުތަކަށް ވާއިރު، އެ މަގާމުތަކަށް މީހުން އައްޔަނު ކުރައްވަނީވެސް ސަރުކާރުންނެވެ. 

އެމްޑީޕީ ދެބައިވެ، ޕާޓީ ތެރެއިން "ފިކުރެއްގެ ދިރުން" ފެކްޝަން އުފެދުމާއި އެކުވެސް އެ ފެކްޝަނުގައި އަމަލީގޮތުން މަސައްކަތް ކުރަމުން އަންނަ ގިނަ މެންބަރުން ވަނީ މަގާމުން ވަކިކޮށްފައެވެ. އޭރު އެ މެންބަރުން ޕާޓީން ވަކިވެސް ނުވެއެވެ. އޭރު ސަރުކާރުން ބުނީ، އެފަރާތްތައް މަގާމުން ވަކިކުރީ، ސަރުކާރުގެ ސިޔާސަތު ތަކަށް ފާޑުވިދާޅުވާ ބަޔަކު ސަރުކާރުގެ ސިޔާސަތުތައް ތަންފީޒުކުރުމަށް މަގާމުތަކުގައި ނުބެހެއްޓޭނެކަމަށް ބުނެއެވެ.