ސަރުކާރުގެ މަގާމުތަކުގައި ތިބި މެންބަރުންގެ ތެރެއިން ދަ ޑިމޮކްރެޓްސް އަށް ސޮއި ކުރާ މެންބަރުން މަގާމުން ވަކިކުރަނީ އެ ޕާޓީގެ ތާޢީދާއި، މެންބަރުން އިތުރުވާ މިންވަރު ފެނި، އިންޒާރު ދިނުމަށާއި، ބިރުދެއްކުމަށް ކަމަށް އެ ޕާޓީން ބުނެފި އެވެ. 

އެމްޑީޕީގެ ސްލޮޓްގައި އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އައްޔަނު ކުރެވުނު މުހައްމަދު އަންސާރުއާއި، އެމިނިސްޓްރީގެ ސީނިއާ އެގްޒެކެޓިވް މުހައްމަދު ހަމްދާން އާއި ހޯމް މިނިސްޓްރީގެ ސީނިއާ ޕޮލިސީ ޑިރެކްޓަރ އާޝިޔަތު އަލައިކާ އަދުނާން "ދަ ޑިމޮކްރެޓްސް" އަށް ސޮއި ކުރުމާއި ގުޅިގެން ވަނީ އިއްޔެ ވަޒީފާ އިން ވަކިކޮށްފައެވެ.

އެކަން ކުށްވެރިކޮށް ދަ ޑިމޮކްރެޓްސް އިން ނެރުނު ބަޔާނެއްގައި ވަނީ އެއީ  ނާއިންސާފު އަދި ބިރުދެއްކުމުގެ ޢަމަލެއްގެ ގޮތުގައި ސިފަކޮށްފައެވެ. 

Advertisement

އަދި އިއްޔެ މަގާމުން ވަކިކުރެވުނު އާސިޔަތު އަލައިކާ ޢަދްނާންއާއި، މުޙައްމަދު ޙަމްދާން އަދި އަންޞާރު ޢަބްދުއްސައްތާރަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ކެންޕެއިންގައި ދިވެހިރާއްޖޭގެ އެކިކަންކޮޅުތަކަށް ދަތުރުކުރުމުގެ އިތުރުން ކެންޕެއިން ރޭވުމާއި ހިންގުމުގެ އިސް ޙަރަކާތްތެރިން ކަމަށާ، އަދި ފަންނީގޮތުންނާއި، ޢިލްމީގޮތުން ޤާބިލު، ހީވާގިކަމާއެކު މަޤާމުގެ މަސްއޫލިއްޔަތު ފުރިހަމައަށް އުފުލަމުންދިޔަ ބޭފުޅުން ކަމަށް ބަޔާނުގައި ވެއެވެ. 

މިއާއެކު އެ ބަޔާނުގައި ބުނީ، ސިޔާސީގޮތުން ޚިޔާލު ތަފާތުވުމުން ތަޢުލީމާއި ތަޖުރިބާގެ ގޮތުން ޤާބިލު ފަރާތްތަކަށް ޚިދުމަތްކުރުމުގެ ފުރުސަތު ބަންދުކުރުމަކީ ޤައުމުގެ މުސްތަޤްބަލަށް އެޅޭ ހިޔަންޏެއް ކަމަށާ އެއީ މިވެރިކަން ގެންނަމުން ނުކުރާންކަމަށް ވަޢުދުވީ ކަމެއް ކަމަށެވެ. 

"9 ސެޕްޓެންބަރު 2023 އަށް ތާވަލުކޮށްފައިވާ ރިޔާސީ އިންތިޚާބުގައި ސަރުކާރުގެ މައި ކޯލިޝަން ޕާޓްނަރަކުވެސް ރައީސުލްޖުމްހޫރިއްޔާއަށް ތާޢީދު ނުކުރައްވާނެ ކަމަށާއި، ރިޔާސީ ރޭހަށް ނުކުންނަވާނެކަން އިޢުލާންކުރައްވާފައި ވެއެވެ. އަނެއް ކޯލިޝަން ޕާޓްނަރަކުވެސް ރައީސުލްޖުމްހޫރިއްޔާއަށް ރިޔާސީ އިންތިޚާބުގައި ތާޢީދެއް ނުކުރެއްވިއެވެ. އެހެނަސް އެޕާޓީތަކުގެ މެންބަރުން ތިބީ ސިޔާސީ މަޤާމުތަކުގައި، އާރާއި ބާރު ހިންގުމުގައެވެ. އެއްވެސް މެންބަރަކަށް އިންޒާރުދީ، ވަތްކެއް ނުކުރެއެވެ." ދަ ޑިމޮކްރެޓްސް ގެ ބަޔާނުގައިވެއެވެ.

އެހެންކަމުން ދަ ޑިމޮކްރެޓްސް ގެ މަޤާމުން ވަކިކުރި ސިޔާސީންނަކީ ކޮންމެހެން ރައީސުލްޖުމްހޫރިއްޔާއަށް ތާޢީދުނުކޮށްގެން ވަކިކުރި ބައެއް ނޫން ކަން ފާހަގަކޮށް އެ ބަޔާނުގައި ބުނީ، އެއީ ދަ ޑިމޮކްރެޓްސްގެ ތާޢީދާއި، މެންބަރުން އިތުރުވާ މިންވަރު ފެނި، އިންޒާރު ދިނުމަށާއި، ބިރުދެއްކުމަށް ވަކިކުރި މީހުން ކަމަށެވެ. އަދި އެއީ އެ ޕާޓީއަށް ފައުޅުގައި ތާޢީދުކުރުން ހުއްޓުވުމުގެ ނިޔަތުގައި ކުރިކަމެއް ކަމަށްވެސް ބުނެފައިވެއެވެ.

"ދަ ޑިމޮކްރެޓްސް ދެކޭގޮތުގައި މިމަގުން މަޤާމުތަކުން ވަކިކުރަމުން ދިޔުމުން ރަމްޒުކޮށްދެނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ފިނޑިކަމެވެ. މިޕާޓީގެ މެންބަރުންނާމެދު ޒާތީވެ ތަޢައްސުބު ގެންގުޅޭ ކަމެވެ. ސަރުކާރުގެ އަނިޔާވެރިކަމާއި، ތަފާތުކުރުމާއި، ނަހަމައެވެ. ދަ ޑިމޮކްރެޓްސް އަށް ލިބެމުންދާ ހިފެހެއްޓުމެއްނެތް ތަރުޙީބާއި، ތާޢީދަށް އިތުރު ވަރުގަދަކަން މެނުވީ މާތްالله ގެ އިރާދަފުޅުން މިކަމަކުން ނުލިބޭނެއެވެ."

ސަރުކާރުގެ މަގާމު ތަކުގައި ތިބި އެ މެންބަރުން ވަކިކުރުމާއި ގުޅިގެން، ވޮއިސް އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، އެމްޑީޕީ ސްލޮޓްތަކުގައި ސަރުކާރުގެ މަގާމުތަކުގައި ތިއްބެވި ބައެއް ބޭފުޅުންނަކީ މިހާރު އެ ޕާޓީގެ މެންބަރުން ނޫން ކަމަށް އެ ޕާޓީން ސަރުކާރަށް އަންގާފައިވާ ކަމަށެވެ. އެހެންކަމުން، އެ ބޭފުޅުން މަގާމުން ވަކިކޮށްފައިވާ ކަމަށްވެސް މިއުވާން ވިދާޅުވިއެވެ.