ނ. ލަންދޫގައި ކުނި މެނޭޖްކުރަން ފެށުމަށް ތައްޔާރީތައް ވެފައި ވަނިކޮށް ކުނި އުކަން ގެންގޮސްފައިވާ ޕިކަޕުގައި އަލިފާން ރޯކޮށްލައިފިއެވެ.

ފުލުހުންގެ މީޑިއާ އޮފިޝަލް "ވޮއިސް" އަށް މައުލޫމާތު ދެއްވަމުން ވިދާޅުވީ، ލަންދޫ ކައުންސިލްގައި ބޭނުންކުރާ ޕިކަޕެއްގައި އަލިފާން ރޯ ކޮށްލާފައިވާ ކަމަށް ރޭ 4:22 ކަންހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. 

އަދި މި މައްސަލައާއި ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ނުވާ ކަމަށާ، ފުލުހުން މި މައްސަލަ ތަހުގީގު ކުރަމުން ގެންދާ ކަމަށްވެސް މީޑިއާ އޮފިޝަލް ވިދާޅުވި އެވެ. 

ލަންދޫގެ ކުނި މެނޭޖްކުރުމަށް ހަދިޔާ ކުރި ޕިކަޕުގައި ރޯވެ އަނދަނީ / ފޮޓޯ: ލަންދޫ ކައުންސިލް

މިކަމާއި ގުޅިގެން "ވޮއިސް" އިން ލަންދޫ ކައުންސިލަށް ގުޅުމުން، އެކާމާއި ގުޅޭ އެއްވެސް މައުލޫމާތެއް މިވަގުތު ނުދެއްވާނެ ކަމަށް އެ ކައުންސިލުން ވަނީ ބުނެފައެވެ.  

ވޮއިސް އަށް މައުލޫމާތު ލިބިފައިވާ ގޮތުގައި އެ ޕިކަޕަކީ ކުނި މެނޭޖްކުރުމުގެ ބޭނުމަށް ސަރުކާރުން އެރަށަށް ހަދިޔާ ކޮށްފައިވާ ޕިކަޕެކެވެ. އަދި އެ ޕިކަޕުގައި ރޯ ކޮށްލުމުގެ ސަބަބުން ބޭނުން ނުކުރެވޭ ވަރަށް ޕިކަޕު ވަނީ އަނދާފައެވެ. 

ޕިކަޕުގައި ރޯ ކޮށްލި ސީދާ ސަބަބެއް ނޭނގުނު ނަމަވެސް، ކުނީގެ ފީ ބޮޑު ކުރުމުން އެ ރަށު ބައެއް ރައްޔިތުން ނުރުހުން ފާޅުކޮށްފައިވާ ކަމަށް މައުލޫމާތު ލިބެ އެވެ. އެގޮތުން އެންމެ ކުރިން ކުނީގެ ފީގެ ގޮތުގައި 150ރ ނަގާގޮތަށް ހަމަޖެއްސުމަށް ފަހު ކައުންސިލުން އެ ފީ 200ރ އަށް ބޮޑު ކުރުމުން އެ ރަށު ބައެއް މީހުން އެކަމާއި ނުރުހުން ފާޅުކޮށްފައިވާކަމަށް މައުލޫމާތު ލިބެއެވެ.