މި އަހަރުގެ ޖަނަވަރީ މަހުގެތެރޭގައި ހިންގި މާރާމާރީއެއްގައި، ތުހުމަތު ކުރެވޭ މީހާއާއި އޭނާ ފޮރުވިމީހުނަށް ދައުވާކުރަން ފޮނުވައިފިއެވެ.

ޕީޖީ އޮފީހުން ބުނީ، ޖަނަވަރީ 14 ވަނަ ދުވަހުގެރޭ ދަންވަރު އިއްޒުއްދީން މަގުގައި ހުންނަ ކެފޭ ޑި ޕަބްލިކް ތެރޭގައި ބަޔަކު މާރާމާރީ ހިންގައި، އެތަނުގައި ހުރި މީހަކަށް ތޫނުއެއްޗަކުން ހަމަލާދީ ޒަޚަމްކޮށްލާފައިވާ މައްސަލައިގެ ތުހުމަތުކުރެވޭ މީހެއްކަމަށްވާ ސ.މަރަދޫފޭދޫ، ރަށްދެބައިގެ، އިބްރާހީމް ފައިޙް ނިޡާމު ކޯޓު އަމުރެއްގެ ހައްޔަރުކުރުމަށްޓަކައި އޭނާ ހޯދާ ނުފެނިގެން، ފެބްރުވަރީ މަހުގެ ތެރޭގައި މީޑިއާ މެދުވެރިކޮށް ފުލުހުން އިއުލާންކޮށްފައިވަނިކޮށް ބަޔަކު އޭނާ ހައްޔަރުކުރިއަނުދިނުމަށްޓަކައި ފޮރުވައިގެން ގެންގުޅުނު މައްސަލައިގައި ދައުވާ ކުރަން ކްރިމިނަލް ކޯޓަށް ހުށަހަޅައިފީމެވެ. 

އެގޮތުން ދައުވާ ކުރަނީ ލ. ގަން، ތުނޑި، ނެވަރކޯން، ޢަބްދުالله ޖުނައިދުއާއި، ރ. ކަނދޮޅުދޫ، ފީރޯޒުގެ، މުޙައްމަދު ޝަބީބްގެ މައްޗަށެވެ.

Advertisement

އެމީހުންގެ މައްޗަށް ކުރަނީ، ކުށެއް ކޮށްފައިވާ މީހަކު ހައްޔަރުކުރިއަނުދިނުމަށްޓަކައި، ކުށްކޮށްފައިވާ މީހާ ތަނެއްގައި ބެހެއްޓުމުގެ ކުށުގެ ދަޢުވާއެވެ.

އަދި މާރާމާރީ ހިންގި ކަމުގެ ތުހުމަތު ކުރެވޭ ފައިޙްގެ މައްޗަށް ކުރަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމާއި، ގައިގާ އަތްލުމާއި މުވައްޒަފެއްގެ މަސައްކަތައް ޤަޞްދުގައި ހުރަސްއެޅުމުގެ ދައުވާއެވެ.

މީގެ އިތުރުން ހަމަ އެ މާރާމާރީއާ ގުޅިގެން ހ. ދިއްގާމާގެ، ޢަލީ ފާރިޟްއާއި، މއ. އާދިއްޕަރު، މާއިން މުޙައްމަދު ޢަޒީމްގެ މައްޗަށްވެސް، ގައިގާ އަތްލުމުގެ ކުށުގެ ދަޢުވާ ކުރުމަށް ފޮނުވާފައި ވާކަމަށް ޕީޖީ އޮފީހުން ބުންޏެވެ.