ރައީސް އިބްރާހިމް މުހައްމަދު ޞާލިހުގެ ވެރިކަން އިންތިހާބަކުން ބަލިކުރާނެ ކަމަށް ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދި ޕާޓީ "ދަ ޑިމޮކްރެޓްސް" އިން ބުނެފިއެވެ.

އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ ދަ ޑިމޮކްރެޓްސްއަށް ސޮއި ކޮށްފައިވާ، ސަރުކާރުގެ ކުންފުނިތަކުގެ މުވައްޒަފުންނަށް ގުޅައިގެން ވަޒީފާގެ ބިރު ދައްކާ ކަމަށެވެ.

"މިހާވަރަށް މިކަމުގެ ތެރެއަށް ވަދެ މި ޕާޓީ އުފެއްދިޔަ ނުދިނުމަށް ކުރާ މަސައްކަތް. ޝައްކެއްނެތް، ސެޕްޓެމްބަރު ނުވަ ވަނަ ދުވަހު ރައީސް އިބްރާހިމް މުހައްމަދު ޞާލިހުގެ ވެރިކަން، އިންތިހާބަކުން އަޅުގަނޑުމެން ބަލިކުރާނަން" އިލްޔާސް ލަބީބް ވިދާޅުވިއެވެ.

Advertisement

އޭނާ ވިދަޅުވީ ދިވެހިރާއްޖޭގެ ރައްޔިތުން ތިބީ ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ދޭގޮތަކަށް ނޫން ކަމަށެވެ. އަދި ދަ ޑިމޮކްރެޓްސް އުފައްދާފައި ވަނީ އެމްޑީޕީން ކުރަމުންދާ ހަޑި، ހުދުމުހުތާރު ކަންކަމުން ނުކުމެ، ރައްޔިތުންގެ ހައްގުގައި މަސައްކަތް ކުރުމަށް ކަމަށެވެ.

ކިތައްމެ ހުރަހެއް އެޅިޔަސް، އަދި ކިތަންމެ ގޮންޖެހުމެއް ކުރިމަތިވިޔަސް، އަދި ކިތަންމެ ބިރެއް ދެއްކިޔަސް ޕާޓީ އުފެއްދުމުގެ މަސައްކަތް ހުއްޓާ ނުލާނެ ކަމަށް އިލްޔާސް ލަބީބް ވިދާޅުވިއެވެ.