އިންޑިއާގައި ހުކުރު ދުވަހުގެ ރޭ ހިނގި ނުރައްކާތެރި ރޭލު އެކްސިޑެންޓާ ގުޅިގެން މަރުވި މީހުންގެ އާއިލާތަކަށް ރައީސް އިބްރާހީމް މުހައްމަދު ޞާލިހު ތައުޒިޔާގެ މެސެޖެއް ފޮނުއްވައިފިއެވެ.
އިންޑިއާގެ އޮޑިޝާ ސްޓޭޓްގެ ބަލަސޯ ސަރަހައްދުގައި ހުކުރު ދުވަހުގެ ރޭ ދުއްވާފައި ދިޔަ ރޭލެއް ޕާކު ކޮށްފައި އޮތް ރޭލެއްގައި ޖެހިގެން ހިނގާ ދިޔަ އެކްސިޑެންޓްގައި 200 އަށްވުރެ ގިނަ މީހަކު މަރުވެފައިވާއިރު، 900 އަށްވުރެ ގިނަ މީހުންނަށް ވަނީ އެކިވަރުގެ އަނިޔާ ވެފައެވެ.
އެކަމާއި ގުޅިގެން ރައީސް ޞާލިހް މިއަދު ކުރެއްވި ޓްވީޓެއްގައި ވަނީ އިންޑިއާގެ އޮޑިޝާ ސްޓޭޓްގައި ހިނގި ނުރައްކާތެރި ރޭލުގެ އެކްސިޑެންޓްގެ ޚަބަރު އަޑު އެއްސެވީ ހިތާމަ އާ އެކުގައި ކަމަށް ވިދާޅުވެފައެވެ.
އަދި މި ހިތާމަވެރި ހާދިސާގެ އަސަރު ކުރި ފަރާތްތަކަށް ދިވެހިންގެ ނަމުގައި ރައީސް ޞާލިހު ވަނީ ތައުޒިޔާ ދަންނަވާފައެވެ.
"އަޅުގަނޑުގެ ހެޔޮ ދުއާތައް ވަނީ ބޮޑު ވަޒީރު ނަރެންދްރާ މޯދީއާއި އިންޑިއާ ސަރުކާރާއި އިންޑިއާގެ ރައްޔިތުންގެ އެކީގައި" ރައީސް ސޯލިހް ކުރެއްވި ޓްވީޓްގައި ވިދާޅުވެފައިވެއެވެ.
އިންޑިއާގެ މި ރެއިލް އެކްސިޑެންޓްގައި އަނިޔާ ލިބުނު މީހުންނަށް ފަރުވާ ދިނުމަށް ކައިރި ހުރިހާ ހިސާބެއްގެ ހޮސްޕިޓަލްތައް ކުއްލި ހާލަތަށް ގެނެސްފައެވެ.
Advertisement
This content is created and paid for by advertisers and does not involve Voice Journalists
