އައްޑޫ ސިޓީ ގަން އެއާޕޯޓު ތަރައްގީ ކުރުމުގެ މަޝްރޫއުއަކީ އިންޑިއާއާއި ދިވެހިރާއްޖެ އާއި ދެމެދު އޮތް ޒަމާންވީ ގުޅުން ރަމްޒުކޮށްދޭ މަޝްރޫއެއްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ ގަން އެއާޕޯޓު ތަރައްގީކުރުމުގެ މަޝްރޫއުގެ އަމަލީ މަސައްކަތް ފައްޓަވާދެއްވާ، އެކަމަށްޓަކައި ބޭއްވި ޚާއްސަ ހަފްލާގައި ވާހަކަދައްކަވަމުން ނެވެ.
ރައީސް ޞާލިހު ވިދާޅުވީ ގަން އެއާޕޯޓު ތަރައްގީކުރުމުގެ މަޝްރޫއުއަކީ ކުރިއަށް އޮތް 10 އަހަރުން އިގްތިޞާދު ދެގުނަ ކުރުމަށް ކުރިއަށް ގެންދާ މުހިންމު މަޝްރޫއުއެއް ކަމަށެވެ.
ރާއްޖޭގެ ތަރައްގީއަށް ކުރިއަށް ގެންދާ އެ ބިޔަ މަޝްރޫއުއަކީ އިންޑިއާގެ އެހީތެރިކަމާއި އެކު ކުރިއަށް ގެންދާ މަޝްރޫއެއް ކަމަށާއި، އިންޑިއާއިން ދޭ އެހީތެރިކަމަށް ވަރަށް ބޮޑަށް ޝުކުރު އަދާކުރައްވާކަމަށް ރައީސް ޞާލިހު ވިދާޅުވި އެވެ.
"މި މަޝްރޫއު އަކީ ދިވެހިރާއްޖެއާއި އިންޑިއާ އާއި ދެމެދު އޮތް ޒަމާންވީ ގުޅުން ރަމްޒުކޮށްދޭ މަޝްރޫއެއް. މި މަސައްކަތް ކުރިއަށް ގެންދިއުމުގައި އިންޑިއާ ސަރުކާރާއި، އިންޑިއާ އެގްޒިމް ބޭންކުން ދެއްވާ އެހީތެރިކަން އަޅުގަނޑު ފާހަގަކުރަން"
ރައީސް ޞާލިހު
އިންޑިއާއަކީ ރާއްޖޭގެ ތަރައްގީއަށް މުހިންމު ހިއްސާދާރެއް ކަމަށް ރައީސް ޞާލިހު ވަނީ ވިދާޅުވެފަ އެވެ. އައްޑޫ ސިޓީގެ މަގުހެދުމުގެ މަޝްރޫއަކީ ވެސް އިންޑިއާގެ އެހީތެރިކަމާއެކު ކުރިއަށް ގެންދާ މަޝްރޫއުއެ ކެވެ.
ރައީސް ޞާލިހު މިފަދައިން ވިދާޅުވެފައިވާއިރު، މި ސަރުކާރުން އަންނަނީ އިންޑިއާއާއެކު ގާތް ގުޅުމެއް ދަމަހައްޓަމުން ނެވެ. މި ސަރުކާރަށް މިހާތަނަށް އެންމެ ގިނަ ލޯނު އެހީތެރިކަމެއް ވެސް ފޯރުކޮށްދީފައި ވަނީ ވެސް އިންޑިއާއިން ކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
