ސަރުކާރު ހިންގާ މައި ޕާޓީ، އެމްޑީޕީން މިހާރު ދަނީ ކަލްޓް ސިފަ ކެނޑެމުން ކަމަށާއި، އަދި އެ ސިފަ ކެނޑެމުންދާ ވަރަށް ޕާޓީއާ ގުޅޭ މެންބަރުން ވެސް އިތުރުވާނެ ކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.

ރިޔާސީ އިންތިހާބުގެ ކެންޕެއިން އެމްޑީޕީން މިހާރު ފަށާފައިވާއިރު، ކެމްޕެއިންގެ ތެރެއިން ޕާޓީ ބޮޑު ކުރުމުގެ މަސައްކަތް ވެސް އެ ޕާޓީން އަންނަނީ ކުރަމުންނެވެ. އެގޮތުން 12 ދާއިރާ އަކުން އެޕާޓީއާ އަލަށް ގުޅުން 2،500 މެމްބަރުންގެ ފޯމް ޕާޓީގެ ސެކްރެޓޭރިއަޓާއި ހަވާލުކޮށްފައިވާ ކަމަށް އެ ޕާޓީން އިއްޔެ ވަނީ މައުލޫމާތު ދީފައެވެ. 

އެކާމާއި ގުޅިގެން ރޮޒައިނާ ކުރެއްވި ޓްވީޓެއްގައި ވިދާޅުވީ، ކަލްޓް ސިފަ ކެނޑެމުންދާ ވަރަށް އެ ޕާޓީއަށް ވަންނަ މީހުންވެސް އިތުރުވަމުންދާނެ ކަމަށާ، ޕާޓީ ދާނީ ބާރަށް ކުރިއަށް ކަމަށެވެ.  އަދި މިއަހަރުުގެ ރިޔާސީ އިންތިހާބުވެސް އެއްބުރުން އެ ޕާޓީ ކާމިޔާބު ކުރާނެ ކަމަށް އޭނާ ވިދާޅުވި އެވެ. 

Advertisement

އެމްޑީޕީން 'ކަލްޓް' ސިފަ ކެނޑެމުންދާ ކަމަށް ރޮޒައިނާ ވިދާޅުވެފައި މިވަނީ، އެޕާޓީގައި ތިބި، މެންބަރުންގެ ތެރެއިން، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވަފާތެރި މެންބަރުންތައް ޕާޓީން ވަކިވެ، 'ދަ ޑިމޮކްރެޓްސް'ގެ ނަމުގައި ޕާޓީއެއް އުފެއްދުމާއި ގުޅިގެން ކަމަށް ބެލެވެއެވެ. 

ޗެއާޕާސަން އިންތިޚާބުގެ ފެށުމުގެ ކުރިންވެސް ދެކަފިވާން ފެށި އެމްޑީޕީ، އެ އިންތިހާބަށްފަހު، އިތުރަށް ދެކަފިވެގެން ދިޔައެވެ. އެއަށްފަހު، އެމްޑީޕީގެ ރިޔާސީ ޕްރައިމަރީގެ ތެރެއިން ޕާޓީގެ އެތެރޭގެ ހަމަނުޖެހުންތައް އެތައް ގުނަ އަކަށް އިތުރުވެގެންގޮސް، ޕްރައިމަރީ އަށްފަހު ރައީސް ނަޝީދާއި އެމަނިކުފާނަށް ތާއީދުކުރާ މެންބަރުން ވަނީ ޕާޓީގެ ތެރެއިން، ފިކުރެއްގެ ދިރުން ނަމުގައި އިތުރު ގޮތްޕެއްވެސް ހަދާފައެވެ. 

އެފަހުންވެސް، އެ މެންބަރުން ސަރުކާރަށް ފާޑުވިދާޅުވެ، ސަރުކާރުގެ ސިޔާސަތުތައް ތަންފީޒުކުރުމަށް ދެކޮޅު ހަދަމުންދާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަފާތެރި މެންބަރުން ދިޔައީ ބުނަމުންނެވެ. އަދި އެ ސަބަބުތަކާއި ހުރެ، މެދު ހެންވޭރު ދާއިރާގެ މެންބަރު ޢަލީ އާޒިމް އެ ޕާޓީން ވަކިވެސް ވަނީ ކޮށްފައެވެ. އެއާއެކު ފެނިގެން ދިޔައީ ފިކުރެއްގެ ދިރުން ފެކްޝަނުގެ އެހެން މެންބަރުންވެސް ޕާޓީން ވަކިވެ އައު ޕާޓީއެއް ހަދާކަން އިއުލާން ކުރި ތަނެވެ. 

އެ މެންބަރުން އެމްޑީޕީން ވަކި ވުމުން، އެކަމާއި ހިތްހަމަ ޖެހުނު މިންވަރު ސިފަ ކުރައްވައި ޕާޓީގެ ޗެއާޕާސަން ފައްޔާޟް އިސްމާއިލް ވިދާޅުވީ، "ހީވީ ރިހޭ ދަތެއް އުފުލެވުނުހެން" ކަމަށެވެ. 

އެމްޑީޕީގެ ރައީސް، ނަޝީދަށް ތާއީދު ކުރާ މެންބަރުން ޕާޓީން ވަކިވި ނަމަވެސް އެމަނިކުފާނު އަދިވެސް ހުންނެވީ އެ ޕާޓީގައެވެ.