ސަރުކާރު ހިންގާ މައި ޕާޓީ, އެމްޑީޕީ މިހާރު ވަނީ ވަގުންގެ ނެޓްވޯކް އަކަށް ވެފައި ކަމަށާ، އެ ނެޓްވޯކް ފުނޑާލައި، ދިވެހި ގައުމު ސަލާމަތް ކުރާނީ ދަ ޑިމޮކްރެޓްސް ޕާޓީން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
އެމްޑީޕީގެ މައި ހަރުގޭގެ ގޮތުގައި ހިންގި އިމާރާތުގެ ރީނދޫ ކުލަަ ހުދު ކުލައަށް ބަދަލުކޮށް، ދަ ޑިމޮކްރެޓްސްގެ ނަން ބޯޑު ޖަހައިގެން ރޭ ވަނީ އެތަނުގައި ދަ ޑިމޮކްރެޓްސް ގެ ފުރަތަމަ ޖަލްސާ ބާއްވާފައެވެ.
އެ ޖަލްސާގައި ވާހަކަ ދައްކަވަމުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ އެމްޑީޕީގެ އެ މައި ޖަގަހަގެ ވެރިފަރާތުން އެމްޑީޕީއަށް އެތަން ދިން މުއްދަތު ހަމަވުމުން، ސިއްރިއްޔާތުގައި ވެސް އެތަން ހޯދުމަށް ކޯޓު އަމުރު ނެރުމުގެ މަސައްކަތް އެމްޑީޕީން ކޮށްފައިވާ ކަމަށެވެ. އަދި އެޕާޓީއަށް "ބައި ބައި" ކިޔަންޖެހުނީ އެފަދަ ކޮރަޕްޝަންގެ އަމަލުތަކާއި ހުރެ ކަމަށްވެސް އޭނާ ވިދާޅުވި އެވެ.
"ބައި ބައި. ދި ވަގުންގެ ނެޓްވޯކް. ދިވެހިރާއްޖޭގެ ރައްޔިތުންގެ އިތުބާރުވަނީ އެމްޑީޕީއަށް ގެއްލިފައި. އެހެންވީމާ އަޅުގަނޑުމެން، އާ ރުހަކާއި އެކުގައި، އާ ހިތްވަރާއިއެކުގައި، އާ އަޒުމަކާއި އެކުގައި, މި ރާއްޖެ ސާފު މަގަށް ގެނެސްދިނުމަށްޓަކައި ދަ ޑިމޮކްރެޓްސް މި އުފެއްދީ މި ބޭނުމުގައި. އިރާދަކުރެއްވިޔާ އަޅުގަނޑުމެން މިކުރާ މަސައްކަތުގައި ކާމިޔާބު ލިބޭނެ."
އިމްތިޔާޒް ފަހުމީ
މިއާއެކު އިމްތިޔާޒް ވިދާޅުވީ، މީގެ ކުރިންވެސް ސިޔާސީ މައިދާނުގައި އޮތް ބިރުވެރިކަމުގެ ތެރެއިން، އެމްޑީޕީގެ އެ މައި ހަރުގެއަށް ވަދެ ތަގުރީރު ކުރައްވަން ކެރުނު އެކަނި އެކަކީ އޭނާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް މީގެ ކުރިން ވިދާޅުވެފައި ވާ ކަމަށާ، މިހާރުވެސް އޭނާ ހުރީ އެގޮތުގައި ކަމަށެވެ.
އިރާދަކުރެއްވިޔާ މި ޚުދުމުހުތާރު، މި އަނިޔާވެރި ސިފައެއްގައި ވެރިކަންކުރާ، އަދި މި އިންސާފާއި ހަމަހަމަކަން ނަގާލަމުންދާ ވައްކަނުގެ ނެޓްވޯކުގެ ކިބައިން އަޅުގަނޑުމެން، ޑިމޮކްރެޓްސް ނުކުމެ ސަލާމަތް ކުރާނަން މިގައުމު. އިރާދަކުރެއްވިޔާ އަޅުގަނޑުމެން ކާމިޔާބު ކުރާނަން.
އިމްތިޔާޒް ފަހުމީ
މީގެ އިތުރުންވެސް އިމްތިޔާޒް ވަނީ، އެމްޑީޕީގެ ތެރެއަށް އެހެނިހެން ޕާޓީ ތަކުގެ ފިކުރު ވަދެ، ޕާޓީގެ އެންމެ އިސްކޮށް އުޅުއްވާ ބައެއް މެންބަރުން ވެސް ނޭނގެ ފަރާތްތައް ޕާޓީގެ ނަމުގައި ރައްޔިތުންގެ މަޖިލީސް ތަމްސީލް ކުރައްވަމުންދާކަމަށް ވިދާޅުވެ، ވަރަށް ބޮޑަށް ފާޑުވިދާޅުވެފައެވެ. އަދި ތަކުރާރުކޮށް ވިދާޅުވަމުން ދިޔައީ އެމްޑީޕީއަކީ ވަގުންގެ ނެޓްވޯކެއް ކަމަށެވެ.
"އެމްޑީޕީއެއް ނޫން މިހާރު އެ ހިނގަނީ. އެއީ ވަގުންގެ ނެޓްވޯކް. އަދި އެ ނެޓްވޯކް އަޅުގަނޑުމެން ފުނޑާލާނަން. ދަ ޑިމޮކްރެޓްސްގެ ނުކުމެ އިރާދަކުރެއްވިއްޔާ، އެމްޑީޕީއާއި، މި ރާއްޖެއިގައި މި ހިނގާ ނާއިންސާފުން މި ގައުމު ސަލާމަތްކޮށްދޭނަން،"
އިމްތިޔާޒް ފަހުމީ
އިމްތިޔާޒް އިތުރަށް ވިދާޅުވީ، ރައީސް އިބްރާހީމް މުހައްމަދު ސޯލިހަށް "ތަބަކުން ވެރިކަން ދެއްވައި" އަދި އެއަށް ފަހު މަޖިލީހަށް މެމްބަރުން ހޮވުމަށް މުޅި ގައުމުގައި ނަޝީދު ދަތުރު ކުރައްވައި، އެމްޑީޕީއަށް ސުޕަ މެޖޯރިޓީ ހޯދައިދިނީމައި ވެސް ގޮއްވާލީ ބޮމެއް ކަމަށެވެ. އަދި މިހާތަނަށް އައިއިރު އެ މަނިކުފާނަށް އެކަމުގައި އިންސާފު ލިބިވަޑައިނުގަންނަވާ ކަމަށާއި އެހެންވެ، ނަޝީދަށް އިޝާރާތްކޮށް ޗުއްޕު ވެސް ބުނުމުގެ ހައްގު ލިބިގެންވޭތޯ އޭނާ ސުވާލު ކުރެއްވި އެވެ.
އަދި ރައީސް ޞާލިހުގެ ސަރުކާރަށް ވަރަށް ބޮޑަށް ފާޑުވިދާޅުވެ، ރައީސް ނަޝީދުގެ ހިތްވަރަށް ވަރަށް ބޮޑަށް އިންތި ވަނީ ތައުރީފް ކުރައްވައިފަ އެވެ.
Advertisement
This content is created and paid for by advertisers and does not involve Voice Journalists
