ކުރީގެ ރައީސް މުހައްމަދު ނަޝީދުގެ ސިކުނޑި އެއް އިނދެގެން އެބޭނުން ކުރަން އިނގޭނަމަ އެމަނިކުފާނުގެ ވެރިކަމުގެ 5 އަހަރުގެ ދައުރު ނިންމާނެ ބުއްދި ހުުންނާނެ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.

ރޮޒައިނާ މިހެން ވިދާޅުވީ ކުރިން އެމްޑީޕީގެ މައި ހަރުގޭގެ ގޮތުގައި ހިންގި އިމާރާތުގައި، ރައީސް ނަޝީދުގެ ދަ ޑިމޮކްރެޓްސްއިން ރޭ ބޭއްވި އެ ޕާޓީގެ ފުރަތަމަ ޖަލްސާގައި ރައީސް ނަޝީދު އެ މަނިކުފާނުގެ ސިކުނޑި ބޭނުން ކުރައްވާނީ ރާއްޖެއަށް އިންގިލާބީ ބަދަލާއި ތަސައްވުރު ގެންނަވަން ކަމަށާއި، "ކަރާމާތުގެ ދުލި އެލުވަައިގެން" ސެލްފީ ނެންގެވުމަށް ނޫން ކަމަށް އެ ޕާޓީއިން ބުނުމުން އެ ކަމަށް ރައްދު ދެއްވަމުންނެވެ.

އެގޮތުން ރައީސް ނަޝީދަށް ފާޑު ވިދާޅުވަމުން ކުރެއްވި ޓްވީޓުގައި ރޮޒައިނާ ވިދާޅުވީ ރައީސް ނަޝީދުގެ ސިކުނޑި އެއް އިނދެގެން އެބޭނުން ކުރަން އިނގޭނަމަ މަޖިލީހުގެ ރައީސް ކަން ދިނުމުން އެމަނިކުފާނުގެ އިތުބާރު 5 އަހަރު ވަންދެން ހިފަހައްޓާނެ ބުއްދި ހުންނާނެ ކަމަށެވެ.

އަދި އެމްޑީޕީގެ އާންމު މެމްބަރުންގެ އިތުބާރުވެސް ހިފެއްޓުނީސް ކަމަށެވެ.

މިއާއިއެކު ކުރި އެހެން ޓްވީޓެއްގައި ރޮޒައިނާ ވިދާޅުވީ ރައީސް ނަޝީދު ގެ ހުރި ސިކުނޑިއެއް ބޭނުން ކުރައްވަނީ އެމަނިކުފާނުގެ އަމިއްލަ އެދުން ފުއްދާނެ ގޮތްގޮތް ހޯދަން ކަމަށެވެ.

އަދި މީހުންގެ މަޝްވަރާ އަޑު އެހުމެއް ނެތި، ހުރިހާ ކަމެއް ވާން ޖެހެނީ އެމަނިކުފާނު ބޭނުން ގޮތަކަށް ބޭނުން އިރަކު ކަމަށެވެ.

"އޭނީ ފެއިލް ވާން ދިމާވާ ސަބަބު. ނަމުން ޑިމޮކްރަޓިކް ކަމުން އޮޓޮކްރަޓިކް ވީމަ." ރޮޒައިނާ ވިދާޅުވިއެވެ.

މަޖިލީހުގެ ރައީސް ކަމުން ނަޝީދު ވަކިކުރަން 54 މެންބަރުންގެ ސޮއިއާ އެކު ބުދަ ދުވަހު ވަނީ ހުށަހަޅައިފަ އެވެ. އޭގެ ތެރޭގައި އެމްޑީޕީގެ މެންބަރުންގެ އިތުރުން އަމިއްލަ ބައެއް މެންބަރުން ވެސް ހިމެނެއެވެ. އެއީ؛

1) ދ. މީދޫ ދާއިރާގެ މެންބަރު އަހުމަދު ސިޔާމް

2) ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުالله 

3) ކާށިދޫ ދާއިރާގެ މެންބަރު އަބްދުالله ޖާބިރު 

4) ތުލުސްދޫ ދާއިރާގެ މެންބަރު އިބްރާހިމް ނަސީރު

އަމިއްލަ މެންބަރުން ނަޝީދު ވަކިކުރަން ސޮއި ކުރި އިރު، އެމްޑީޕީ ބައެއް މެންބަރުން އެމަނިކުފާނު ވަކިކުރަން ސޮއި ކޮށްފައެއް ނުވެއެވެ. އެއީ؛ 

1) ކުޅުދުއްފުށީ ދެކުނު ދާއިރާގެ މެންބަރު ޖަމްޝީދު މުހައްމަދާއި

2) ބިލެއްދޫ ދާއިރާގެ މެންބަރު އަހުމަދު ހަލީމް (ދޮންބިލެއް)

3) ހިތަދޫ މެދު ދާއިރާގެ މެންބަރު އަހުމަދު ރަޝީދު (ޗެކްމާކް)

4) ފޮނަދޫ ދާއިރާގެ މެންބަރު މޫސާ ސިރާޖު 

5) އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ)