އަނެއްކާވެސް ދިވެހިރާއްޖެއަށް ރަންނަމާރި އަރައިފި ކަމަށާއި، މިއަދު އެ ރަންނަމާރި ގެންދަނީ، އަހަރެމެންގެ އަންހެން ދަރިންގެ ފުރާނަ ނޫން ކަމަށް ކުޅުދުއްފުށީ ދާއިރާގެ މެންބަރު ޔާސިރު ޢަބްދުއްލަތީފް ވިދާޅުވެއްޖެއެވެ.
އެމްޑީޕީގެ މައި ހަރުގޭގެ ގޮތުގައި ހިންގި އިމާރާތުގެ ކުލަ ބަދަލުކޮށް، ދަ ޑިމޮކްރެޓްސްގެ ނަން ބޯޑު ޖަހައިގެން އެ ޕާޓީގެ ފުރަތަމަ ޖަލްސާގައި ރޭ ބާއްވާފައިވާއިރު، އެ ޖަލްސާގައި ޔާސިރުގެ ވާހަކަ ފެއްޓެވީވެސް ރަންނަމާރި ވާހަކައިންނެވެ. އަދި ރަންނަމާރިގެ ކިބައިން ރާއްޖެ ސަލާމަތް ވެގެންދިޔައީ އަބުލް ބަރަކާތުލް ބަރުބަރީގެ މަސައްކަތްޕުޅުގެ ސަބަބުންކަންވެސް އޭނާ ފާހަގަކުރެއްވިއެވެ.
މިއަދު އަނެއްކާވެސް ރަންނަމާރި އަރައިފި. ހަގީގަތުގައި މިއީ އަޅުގަނޑުމެން އިންތިހާއަށް ކަންބޮޑުވާންޖެހޭ ކަމެއް. މިކަމާއި ކުރިމަތިލާންޖެހޭނީ ކިހިނެއްތޯ އަޅުގަނޑުމެން ވިސްނަންޖެހޭ ކަމެއް. މިއަދު ރަންނަމާރި އަރާ ގެންދަނީ ހަމައެކަނި އަޅުގަނޑުމެއް ބޮޑުކުރާ އަންހެން ކުއްޖާއެއް ނޫން. އެކުއްޖާގެ ފުރާނައެއް ނޫން. މިއަދު ރަންނަމާރި އަރާ ގެންދަނީ އަޅުގަނޑުމެން އެންމެން، ތުއްޕުޅު އިރުންފެށިގެން، އަޅުގަނޑުމެން ނުހަނު ރަނގަޅަށް ތައުލީމަށް ޚަރަދު ކޮށްގެން، ކިޔަވައިދީގެން ރަނގަޅު ވަޒީފާއެއް އަދާކުރާނެ ކަމަށް ބަލައިގެން ބޮޑުކުރާ ކުއްޖާގެ ވަޒީފާގެ ހައްގު. މިއަދު ރަންނަމާރި އަރާ ގެންދަނީ އެންމެ ކުޑައިރުންފެށިގެން އެކިއެކި އުނދަގުކުތެރޭގައި ދަރިން ބޮޑުކޮށްގެން އައިސް، މާދަމާ ގޯއްޗެއް ލިބޭނެ ކަމުގެ އުއްމީދުގައި ހުރި މީހާގެ އުއްމީދު. މިއަދު ރަންނަމާރި ގެންދަނީ އަޅުގަނޑުމެން އެތައް މަސައްކަތަކުން މިރާއްޖޭގައި ބިނާކުރި އިޖުތިމާއީ ރައްކާތެރިކަމުގެ ހައްގުތަކުގެ ތެރެއިން އަޅުގަނޑުގެ ބޮޑުދައިތައަށް ލިބޭ އައިނު ހެއްދުމުގެ ހައްގު. މިއަދު ރަންނަމާރި ގެންދަނީ އަޅުގަނޑުމެން ބަލި ވެއްޖެއްޔާމުން ލާން އޮތް ވެންޓިލޭޓަރ ގަނޑު. މިއަދު ރަންނަމާރި އަރާ ގެންދަނީ އަޅުގަނޑުމެންގެ ދަރިންނާއި ދަރިންގެ މުސްތަޤްބަލް.
ޔާސިރު ޢަބްދުއްލަތީފް
ޔާސިރު ވިދާޅުވީ، ދުނިޔޭގެ އެއްވެސް ތަނެއްގައި އިންގިލާބެއް ގެނައުމަކީ ފަސޭހަ ކަމެއް ނޫންކަމަށާ، އެއީ ރައްޔިތުން އިންތިހާއަށް ބުރަ މަސައްކަތް ކޮށްގެން ގެނެވޭ އެއްޗެއް ކަމަށެވެ. އަދި ދުނިޔެއަށް މިހާތަނަށް އައިސްފައިވާ ކޮންމެ އިންގިލާބެއް ވެސް ގެނެސްފައިވަނީ، އަނިޔާވެރިކަމާއި، ފިއްތުންތަކުން ސަލާމަތްވެ މިނިވަންކަން ހޯދުމަށް ކަމުގައި އޭނާ ވިދާޅުވި އެވެ.
މިއާއެކު ޔާސިރު ވިދާޅުވީ، މިއީ އަތް އުރާލައިގެން ތިބެންވީ ވަގުތު ނޫން ކަމަށާ ދިވެހިންގެ އަތުން އަތުލާފައިވާ އިޖުތިމާއީ ހަމަޖެހުމުގެ ވެށި އަލުން އަނބުރާ ހޯދައި ދިނުމަށް ޑިމޮކްރެޓްސް ޕާޓީން މަސައްކަތް ކުރައްވާނެ ކަމަށެވެ. އަދި ހައްގުތައް އޭގެ ހައްގުވެރި ފަރާތްތަކަށް ލިއްބައިދޭ ޕާޓީއަކަށް އެ ޕާޓީވާނެ ކަމަށްވެސް ޔާސިރު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
