ފުޅާ ދާއިރާއެއްގައި ހަށި ވިއްކާ ކަމަށް ތުހުމަތުގައި ފުލުހުން ހައްޔަރުކުރި މީހުންގެ ތެރެއިން އެއް އަންހެނަކު ރާއްޖެ އައީ ފިރިމީހާއާ އެކު ޗުއްޓީ ހޭދަކުރަން ކަމަށް އޭނާ ބުނެފިއެވެ.

ބަންގްލަދޭޝް އަށް ނިސްބަތްވާ އުމުރުން 28 އަހަރުގެ އެމްއެސްޓީ ބްރިސްޓީ އަހްތަރު ނަމަކަށް ކިޔާ އެ މީހާ ފުލުހުން ހައްޔަރު ކޮށްފައި ވަނީ މިދިޔަ މަހުގެ 14 ވަނަ ދުވަހު އެވެ.

އެ އަންހެން މީހާގެ ބަންދުގެ މުއްދަތު އިތުރު ކުރުމަށް، ފުލުހުން އޭނާ ކޯޓަށް ހާޒިރުކުރުމުން، އޭނާ ދިން ބަޔާނުގައި ވާގޮތުން، އެމީހާ ރާއްޖެ އައީ ޓޫރިސްޓް ވިސާގައި ފިރިމީހާއާ އެކު ޗުއްޓީ ހޭދަކުރާށެވެ. 

ނަމަވެސް ފުލުހުން ކޯޓުގައި ބުނެފައިވާ ގޮތުގައި، އަންހެން މީހާ ބުކިން ހެދި "ތްރީ އިން ހޮޓެލް" އަށް އޭނާއެއް ނުދެއެވެ. އަދި އޭނާ ހައްޔަރުކޮށް ބަލައި ފާސްކުރެވުނު ތަނަކީ ގެސްޓްހައުސްއެއް ގޮތަށް ބޭނުން ކުރަމުންދާ ތަނެއް ނަމަވެސް އެ ތަނަކީ ހުއްދަ ނަގައިގެން ހިންގާ ތަނެއް ނޫންކަން ފުލުހުން ވަނީ ފާހަގަ ކޮށްފައެވެ.

އަދި އެތަނުގައި ހަށި ވިއްކުމުގެ ވިޔަފާރި ކުރިއަށް ގެންގޮސްފައި ވަނީ ދުރާލައި ރޭވިގެން ކަން ފުލުހުންނަށް ހޯދިފައިވާއިރު، އަންހެން މީހާގެ މައްޗަށް ތުހުމަތު ކޮށްފައިވާ ކުށަށް ކޮންމެވެސް ވަރަކަށް ހެއްކާއި ގަރީނާ ލިބިފައިވާ ކަމަށް ފުލުހުން ބުންޏެވެ. 

އެގޮތުން އިންޓެލިޖެންސް ރިޕޯޓާއި ހާދިސާ ރިޕޯޓާއި ތަހުގީގަށް ލިބިފައިވާ ބަޔާންތަކާ ހަވާލާދީ ފުލުހުން ބުނީ ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރުމުގައި ބައިވެރިވާ ކަމަށް ތުހުމަތު ކޮށްފައިވެ އެވެ. ހަށި ވިއްކާ ކަމަށް ބަލެވޭ ތަންތަން ބަލައިފާސްކުރިއިރު ހަށިވިއްކުމުގައި ގެންގުޅޭ ސާމާނު ގެސްޓް ހައުސްއެއްގެ ކޮޓަރިން ފެނިފައިވާ ކަމަށް ވެސް ފުލުހުންގެ ބަޔާނުގައިވެ އެވެ.

މި މައްސަލާގައި މުޖުތަމައުގެ ސަލާމަތާއި ރައްކާތެރިކަމަށްޓަކައި، އެ އަންހެން މީހާގެ ބަންދުގެ މުއްދަތު ކޯޓުން ވަނީ 15 ދުވަސް އިތުރުކޮށްފައެވެ.