ކުރިއަށް އޮތް ރިޔާސީ އިންތިހާބުގައި މޯލްޑިވްސް ނެޝަނަލް ޕާޓީ(އެމްއެންޕީ)ގެ ކެންޑިޑޭޓު މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމަށް ތާއީދު ކުރައްވަން ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އާއިޝަތު އާޒިމާ ޝުކޫރު ނިންމަވައިފިއެވެ.

އާޒިމާ މިކަން ހާމަ ކުރައްވާފައި ވަނީ އިއްޔެ އާއްމު ކުރެއްވި ނޫސްބަޔާނެއްގައެވެ.

އާޒިމާ ވިދާޅުވީ ނާޒިމަށް ތާއީދު ކުރަން ނިންމައި، އޭނާގެ ކެމްޕެއިނުގައި ރަސްމީކޮށް ބައިވެރިވާން ފަށާފައިވާ ކަމަށެވެ. ނާޒިމަށް ތާއީދު ކުރަން ނިންމާފައިވާ ސަބަބުތައް ވެސް އާޒިމާ ވިދާޅުވެދެއްވިއެވެ.

އެގޮތުން މިއަދު ރާއްޖޭގެ ކަންކަން ކުރިޔަށްދާ ގޮތުން، ޤާނޫނުއަސާސީގެ ޙުކޫމާތު ގެއްލިފައިވާތިއްޔާއި، އަދި ދައުލަތުގެ އެންމެ މަތީ މަޞްލަޙަތުތައް މިހާރު ޙިމާޔަތްކުރެވޭ ކަމަށް އެކަމަނާއަށް ޤަބޫލުނުކުރެވޭއިރު، އެތައް ދުވަހެއްގެ ބުރަ މަސައްކަތުން ދިވެހިން ލިބިގަތް ޑިމޮކްރަސީގެ އަސާސްތައް ފުނޑުފުނޑުވެ، ޚުދުމުޚްތާރު ވެރިކަމެއް ޤާއިމުވެ، ދައުލަތުގެ އެންމެ މަތީ މަޞްލަޙަތުތައް ޙިމާޔަތްކުރުމަށް އުފައްދާފައިވާ މުއައްސަސާތައް ސަރުކާރުގެ ބާރުގެ ދަށަށް ގެންގޮސްފައި ވާކަމަށް އާޒިމާ ފާހަގަ ކުރެއްވިއެވެ.

އަދި ރާއްޖޭގެ މިނިވަންކަމާއި ޤައުމުގެ ރައްކާތެރިކަން  ޤަބޫލުނުކުރެވޭ މިންވަރަށް ބަލިކަށިކުރެވިފައިވާ ކަމަށާއި، މިއަހަރު ބޭއްވޭ ރިޔާސީ އިންތިޚާބުގައި، މިސަރުކާރު ބަދަލުވާންޖެހޭ ކަމަށް ގަބޫލު ކުރައްވާކަމަށް އާޒިމާ ވިދާޅުވިއެވެ.

ދިވެހިރާއްޖޭގައި ވެރިންގެ އާ ޖީލަކަށް، އަދި ވެރިކަމުގެ އެންމެ މަތީ ފަންތީގައި އާ ވިސްނުންތަކަކަށް ފުރުޞަތު ލިބެންޖެހޭ ވަގުތު އަތުވެއްޖެ ކަމަށް އާޒިމާ ވިދާޅުވިއެވެ.

މީގެ އިތުރުން އެކަމަނާ ވިދާޅުވީ، ދިވެހިރާއްޖޭގައިވެސް ގައުމީ ވިސްނުންތަކާއެކު ބައިނަލްއަގުވާމީ މައިދާނުގައި ބަސްބުނެވޭނޭ ދަރިން އެބަތިބިކަމަށެވެ. އަދި ދިވެހި ގައުމުގެ ވެރިންނަށް ދުނިޔޭގެ ފެންވަރުގައި އިޙްތިރާމާއި ގަދަރު ލިބިގަނެ، ދުނިޔޭގެ މަސްރަޙުގައި ދިވެހިރާއްޖެ އަމިއްލަ ފައިމައްޗަށް ތެދުވެ، އަމިއްލަވަންތަ ދައުލަތެއް ބިނާކުރުމަށްޓަކައި، މިހާރުގެ ސިޔާސީ ވިސްނުންތަކުގެ މައްޗަށް ތަޢުލީމީ، އީޖާދީ އަދި ޒަމާނީ ވިސްނުންތަކަކަށް ފުރުޞަތު ލިބެންޖެހޭކަމަށް ގަބޫލު ކުރެވުމަކީ ނާޒިމަށް ތާއީދު ކުރަން ނިންމި އެއް ސަބަބު ކަމަށެވެ.

މިވަގުތު ޤައުމު އޮތް ހާލަތުން ގައުމު ނަގައި ކޮޅަށް ޖަހައި، ރައްޔިތުންގެ އަސާސީ ހައްގުތައް ރައްކާތެރިކޮށް، ގައުމުގެ ކަންކަން ހަމަ މަގަށް އެޅުވޭނެ ގާބިލުކަން ނާޒިމްގެ ކިބައިގައި އެބަހުރި ކަމަށް އާޒިމާ ވިދާޅުވިއެވެ.