ކުރިއަށް އޮތް ރިޔާސީ އިންތިހާބުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބަލިވާނެ ކަމަށާއި އެއަށްފަހު އެމަނިކުފާނު ރާއްޖެ ދޫކޮށް ފިއްލަވާނެ ކަމަށް އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ރޭ ވިދާޅުވެއްޖެއެވެ.
ވައްޑެ މިހެން ވިދާޅުވީ "ދަ ޑިމޮކްރެޓްސް" އިން ބޭއްވި ޖަލްސާގައި ވާހަކަ ދައްކަވަމުންނެވެ.
ވައްޑެ ވިދާޅުވީ ރައީސް ޞާލިހު މިހާރުވެސް ބަލިވެފައިވާ ކަމަށެވެ. އަދި އެމަނިކުފާނު ފިއްލަވަން ބާކީ އޮތީ ތިން މަހެއްހާ ދުވަސް ކަމަށެވެ.
ރައީސް ޞާލިހު ބަލިވެއްޖެ ކަމަށް، ކުރިއަށް އޮތް 84 ދުވަހަށްފަހު އީސީން އިއުލާނު ކުރާނެ ކަމަށް ވައްޑެ ވިދާޅުވިއެވެ.
މީގެ އިތުރުން ވައްޑެ ވިދާޅުވީ ރައީސް އިބްރާހިމް ނާސިރުގެ ވެރިކަން ނިމުމަށްފަހު ދިވާމި ހާލަތުން ރާއްޖެ ދޫކޮށް ވަޑައިގެންނެވީ ކަމަށާއި އޭގެ ފަހުން ރާއްޖެ ދޫކޮށް އަމިއްލައަށް ފިއްލަވާނެ ރައީސްއަކަށް އިބްރާހިމް މުހައްމަދު ޞާލިހު ވެވަޑައިގަންނަވާނެ ކަމަށެވެ.
ރާއްޖޭގެ ތާރީހުގައިވެސް އެންމެ ގިނަ ސިޔާސީ މަގާމު އުފެއްދީ މި ސަރުކާރުން ކަމަށް ވައްޑެ ވިދާޅުވިއެވެ. ނަމަވެސް އޭގެ ތެރެއިން މަދު މީހަކު ނޫނީ ރައީސް ޞާލިހަށް ތާއީދު ނުކުރައްވާނެ ކަމަށް ވައްޑެ ވިދާޅުވިއެވެ.
ރައީސް ޞާލިހު 'ބޮޑުތަނުން ބަލިވާނެ' ކަމަށް ވިދާޅުވެ ވައްޑެ ދެއްކި މިސާލަކީ މާލެ އާއި އައްޑޫއިން އެމްޑީޕީ ބަލިވުމެވެ. އަދި ތިނަދޫގެ މެޖޯރިޓީ ގެއްލިފައި ވާކަމެވެ.
ރިޔާސީ އިންތިހާބުގައި ގުޅެން ޖެހުނު ކޮންމެ ބަޔަކާ ގުޅިގެންވެސް ރައީސް ޞާލިހު ބަލިކުރައްވާނެ ކަމަށް ވައްޑެ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
