މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން ލިމިޓެޑް (އެމްއެމްޕީއާރސީ) މައްސަލައިގައި އެންޓިކޮރަޕްޝަންއަށް ހާޒިރުކުރަނީ ސަރުކާރުން އިންތިހާބަށް ނުފޫޒު ފޯރުވަން ކަމަށް  މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް އަދި ރިޔާސީ ކެންޑިޑޭޓެ މުހައްމަދް ނާޒިމް (ކާނަލް ނާޒިމް) ވިދާޅުވެއްޖެއެވެ.

2014 ވަނަ އަހަރުގެ ފެބްރުއަރީ މަހުން ފެށިގެން 2015 ވަނަ އަހަރުގެ އޮކްޓޯބަރު މަހުގެ ނިޔަލަށް، އެމްއެމްޕީއާރސީ މެދުވެރިކޮށް ދައުލަތުގެ ފައިސާއަށް ޚިޔާނާތްތެރިވެފައިވާ ކަމަށާއި، އެދުވަސްވަރު ޓޫރިޒަމްގެ ބޭނުމަށް ރަށްތަކާއި ފަޅުތައް ކުއްޔަށް ދޫކޮށްގެން ލިބުނު ފައިސާއަށް ޚިޔާނާތްތެރިވެފައިވާކަމަށް ބުނާ މައްސަލައެއްގެ މަޢުލޫމާތު ސާފުކުރުމަށް ނާޒިމް ވަނީ މިިދިޔަ ދެ ދުވަހު އެންޓި-ކޮރަފްޝަން ކޮމިޝަނަށް ހާޒިރު ކޮށްފައެވެ.

އެކަމާ ގުޅިގެން ނާޒިމް ވިދާޅުވީ އެމްއެންޕީގެ ރިޔާސީ ޓިކެޓާ ޙަވާލުވެ ރިޔާސީ އިންތިޚާބަށް ކެމްޕެއިން ކުރަމުން ދަނިކޮށް، މީގެ 9 އަހަރު ކުރިން ހިނގާފައިވާ ކަމަށް ބުނާ މައްސަލައެއްގައި އެންޓި-ކޮރަފްޝަން ކޮމިޝަނަށް ޙާޟިރުކުރީ، ސިޔާސީ ގޮތުން ނާޒިމް ކުރަމުން އަންނަ މަސައްކަތް ރައްޔިތުން ބަލައިގަންނަމުންދާތީ، އެމަނިކުފާނުގެ އަގުވައްޓާލައި އަދި ރައްޔިތުން ކުރަމުން އަންނަ އިތުބާރާއި ތާއީދު ކަނޑުވާލުމުގެ ނިޔަތުގައި ސިޔާސީ ފަރާތްތަކެއްގެ ނުފޫޒުންކަމަށް ދެކޭ ކަމަށެވެ.

އަދި މިއީ ސީދާގޮތުން މިއަހަރުގެ ރިޔާސީ އިންތިޚާބަށް ނުފޫޒު ފޯރުވުމަށް ސަރުކާރު ފަހަތުގައި އޮވެގެން ކުރައްވާކަމެއް ކަމަށް ނާޒިމް ވިދާޅުވިއެވެ.

"އަޅުގަނޑަކީ 30 އަހަރަށްވުރެ ގިނަ ދުވަހު އެކި ފެންވަރުގެ މަޤާމުތަކުގައި ދިވެހި ދައުލަތަށް ޚިދުމަތްކޮށްފައިވާ މީހަކަށްވާއިރު، މިހާ ހިސާބަށް އައިއިރު، އަޅުގަނޑުގެ ޚިޔާނާތުގެ ނުވަތަ ފައިސާގެ މައްސަލައެއް ދުވަހަކުވެސް ޖެހިފައިނުވާއިރު، މިނިވަން މުއައްސަސާތައް މެދުވެރިކޮށް ސަރުކާރުން ހިންގަވާ މިފަދަ ޢަމަލުތަކަކީ ދިވެހި ރައްޔިތުންވެސް ޤަބޫލުކުރާނޭ ކަމެއްނޫން ކަމުގައި އަޅުގަނޑު ދެކެން" ނާޒިމް ވިދާޅުވިއެވެ.

މީގެ އިތުރުން ނާޒިމް ވިދާޅުވީ، ދިވެހި ދައުލަތުގެ ކަންކަން މިއަދު ހިނގަމުންދާ ގޮތުން، މިނިވަން މުއައްސަސާތަކަށް ޤާނޫނުއަސާސީގައި ބުނާ ގޮތަށް މިނިވަންކަމާއެކު މަސައްކަތްކުރުމުގެ ފުރުޞަތު ގެއްލި، އެކޮމިޝަންތަކުން ކުރަމުންދާ މަސައްކަތްތަކަށް ސަރުކާރުން ނުފޫޒު ފޯރުވަމުންދާތީ އެކަމާ ކަންބޮޑުވާ ކަމަށެވެ.

"އަޅުގަނޑަކީ ދައުލަތުން ގެއްލިފައިވާ ފައިސާ ހޯދުމަށް ވަކާލާތުކުރާ މީހަކީމެވެ. އެކަމަށް އިސްނަގާނޭވެސް މީހަކީމެވެ. އެހެންކަމުން، މި ތަޙްޤީޤަށް މިހާތަނަށްވެސް އަޅުގަނޑުގެ ފުރިހަމަ އެއްބާރުލުން ދީފައިވާނޭކަމާއި ކުރިއަށް އޮތްތާނގައިވެސް ދޭނޭ ވާހަކަ ތިޔަ އެންމެ ބޭފުޅުންނަށް ދަންނަވަން" ނާޒިމް ވިދާޅުވިއެވެ.

އެހެން ނަމަވެސް، މިނިވަން މުއައްސަސާތައް ބޭނުން ކޮށްގެން ރިޔާސީ ކެންޑިޑޭޓުންނަށް ބިރުދެއްކުމަށް ސަރުކާރުން ފަހަތުގައި އޮވެގެން ކުރާ މިފަދަ ފިނޑި ޢަމަލުތައް ބަލައި ނުގަންނާނެ ކަމަށް ނާޒިމް ވިދާޅުވިއެވެ.

އެހެންކަމުން، މިއަހަރުގެ ރިޔާސީ އިންތިޚާބަށް ނުފޫޒުފޯރުވުމަށް ސަރުކާރުން ކުރައްވަމުން ގެންދަވާ މަސައްކަތްތައް ހުއްޓަވާ ލައްވައި، މިނިވަން އިންތިޚާބަކަށް ޖާގަ ދެއްވުމަށް ނާޒިމް ވަނީ ސަރުކާރަށް ގޮވާލާފައެވެ.

އަދި އެންޓި-ކޮރަފްޝަން ކޮމިޝަންފަދަ ދައުލަތުގެ މިނިވަން މުއައްސަސާތައް ސިޔާސީ ނުފޫޒުން އެއްކިބާވެ، އެފަރާތްތަކުގެ ޤާނޫނީ ޒިންމާ އަދާ ކުރުމަށް ނާޒިމް ވަނީ އިލްތިމާސް ކުރައްވާފައެވެ.