ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯން ފައިނަލުގައި މިއަދު ހަވީރު ނިޔާމަ އާއި ކަނޑިންމަ ވާދަކުރި މެޗު 0-0 ގެ ނަތީޖާއަކުން އެއްވަރުވެ، ނަތީޖާ ނެރުމަށްޓަކައި ޖެހި ޕެނަލްޓީގައި 5-4 ގެ ނަތީޖާއަކުން މެޗު ކާމިޔާބުކޮށް މުބާރާތުގެ ޗެމްޕިއަންކަން ތިންވަނަ ފަހަރަށް ނިޔާމަ އިން ހޯދައިފިއެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ބައިވެރި ޓީމުތައް ދެގުރޫޕަކަށް ބަހާލައިގެންނެވެ. އެގޮތުން ގުރޫޕް އޭގައި ހަތަރު ޓީމު އަދި ގުރޫޕް ބީގައި ތިން ޓީމު ހިމެނޭގޮތަށެވެ.

ނިޔާމަ މުބާރާތުގެ ފައިނަލުން ޖާގަ ހޯދީ ސެމީފައިނަލްގެ ދެވަނަ މެޗުގައި ވޮއްމުލި އާއި ވާދަކުރި މެޗު 1-1 ގެ ނަތީޖާއަކުން އެއްވަރުވެ، ނަތީއްޖާނެރުމަށް ޖެހި ޕެނަލްޓީގައި 3-4 ގެ ނަތީޖާއަކުން މޮޅުވެގެންނެވެ. އަދި ކަނޑިންމަ ފައިނަލުން ޖާގަ ހޯދީ ސެމީ ފައިނަލުގެ ފުރަތަަމަ މެޗުގައި ބަގްލިއޯނީ އާއި ވާދަކުރި މެޗު ފަސޭހަކަމާއި އެކު 7-0 ގެ ނަތީޖާއަކުން ކާމިޔާބުކޮށްގެންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މެޗުގެ ފުރިހަމަ ވަގުތު ހަމަވީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ދެޓީމު އެއްވަރުވެފައި އޮވެގެންނެވެ. މިއާއެކު ނަތީއްޖާނެރުމަށްޓަކައި ޖެހި ޕެނަލްޓީގައި ނިޔާމަ އިން ފޮނުވާލި ހަތް ޕެނަލްޓީގެ ތެރެއިިން އެޓީމުން ވަނީ ފަސް ޕެނަލްޓީ ކާމިޔާބުކޮށްފައެވެ. އަދި ކަނޑިންމަގެ ހަތް ޕެނަލްޓީގެ ތެރެއިިން އެޓީމަށް ކާމިޔާބު ހަތަރު ޕެނަލްޓީ އެވެ. މިއާއެކު މެޗުގެ ކުޅުން ނިމިގެންދިޔައީ 4-5 ގެ ނަތީޖާއަކުން ނިޔާމަ މެޗު ކާމިޔާބުކޮށްގެންނެވެ.

ފައިނަލް މެޗުގެ މޭން އޮފް ދަ މެޗަކަށް ހޮވުނީ ނިޔާމަ ޓީމުގެ ގޯލްކީޕަރު އިބްރާހިމް ޝާހިދުއެވެ. އޭނާ ވަނީ މި މެޗުގައި ކަނޑިންމަ އިން ފޮނުވާލި ގިނަ ހަމަލާތަކެއް ދިފާއުކުރުމުގެ އިތުރުން ޕެނަލްޓީ ޝޫޓްއައުޓްގައި ކަނޑިންމަގެ ދެ ޕެނަލްޓީއެއް ދިފާއުކޮށްފައެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ލިބުނީ ކަނޑިންމަ ޓީމުގެ ޖޯޒީ ނަންބަރު 7 އަލީ ޝާމިއު އަށެވެ. އޭނާ ވަނީ މި މުބާރާތުގައި 7 ލަނޑު ކާމިޔާބުކޮށްފައެވެ. 

މުބާރާތުގެ އެންމެ މޮޅު ފަސް ކުޅުންތެރިންނަކީ އާލިމް އަލީ (ނިޔާމަ), މުހައްމަދު އަޔާޒް (ކަނޑިންމަ), އަކްރަމް އަހުމަދު (ކަނޑިންމަ), އިބްރާހިމް ސައިފް (ނިޔާމަ), އިބްރާހިމް ޝާހިދު (ނިޔާމަ) އެވެ. އަދި މުބާރާތުގެ އެންމެ މޮޅު ކޯޗަކަށް ހޮވުނީ ނިޔާމަ ޓީމުގެ ކޯޗު އަހުމަދު ރިލްވާން އެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ކަނޑިންމަ ޓީމުގެ ޖޯޒީ ނަންބަރު 7 އަލީ ޝާމިއުއެވެ.