ފިރިހެނެއްގެ އަތުން ފޭރުނު އަންހެނަކަށް ތަންފީޒު ކުރަންޖެހޭ ޖަލު އަދަބެއް ނެތް ކަމަށް ކްރިމިނަލް ކޯޓުން ކަނޑައަޅައިފިއެވެ.

ދައުލަތުގެ ފަރާތުން، ފޭރުމުގެ ދައުވާ އުފުލާފައި ވަނީ ޅ. ނައިފަރު، ހަނަފަސްގެ، އަމީނާ މުހައްމަދުގެ މައްޗަށެވެ.

އޭނާގެ މައްޗަށް އުފުލި ދައުވާއަކީ 2015 ވަނަ އަހަރުގެ ޑިސެމްބަރު މަހުގެ ތެރޭގައި އިތުރު ބަޔަކާއެކު މއ. ސީރިއާ ގެސްޓްހައުސްއަށް ވަނެ، އެތަނުގައި ހުރި ފިރިހެނެއްގެ މޭމަތީގައި ކަޓަރު ތިލައަކުން ޖައްސައި ބިރުދެއްކުމަށްފަހު ފޭރުމުގެ ދައުވާއެވެ.

ދައުލަތުން ބުނީ، އެ ފިރިހެން މީހާގެ ފޯނާއި ސައިކަލު ތަޅުދަނޑިއާއި ސިނގިރޭޓް ފޮއްޓާއި ވޮލެޓް ފޭރިގަނެފައިވާ ކަމަށެވެ. އޭރު އެ ވޮލެޓުގައި ވިސާ ޑެބިޓްކާޑަކާއި އެމެރިކަން އެކްސްޕްރެސް ޑެބިޓް ކާޑެއްގެ އިތުރުން 51 ޑޮލަރާއި 330 ރުފިޔާ އޮތް ކަމަށް ދައުލަތުން ބުންޏެވެ.

އަދި އެ ވޮލެޓުގައި އޮތް ކޭޝްކާޑު ބޭނުން ކޮށްގެން އެ ފިރިހެންމީހާގެ އެކައުންޓުން 3800 ރުފިޔާ ނަގާފައިވާ ކަމަށްވެސް ދައުލަތުން ބުންޏެވެ.

މި މައްސަލައިގެ އިބްތިދާއީ އަޑުއެހުމުގައި އަމީނާ ވަނީ ދައުވާއަށް އިއުތިރާފު ވެފައެވެ. ނަމަވެސް އަވަސް ނިޔާގެ އަޑުއެހުމުގައި އަމީނާ ދައުވާއަށް އިންކާރު ކުރިއެވެ.

އެހެންކަމުން ހެކި ހުށަހަޅަށް ކޯޓުން ދިން ފުރުސަތުގައި ދައުލަތުން ވަނީ ހަތް ހެކި ހުށަހަޅާފައެވެ. ނަމަވެސް އަމީނާގެ ފަރާތުން އެއްވެސް ހެއްކެއް ހުށަހަޅާފައެއް ނުވެއެވެ.

މައްސަލައިގެ ޝަރީއަތުގެ މަރުހަލާ ފެށުނު ފަހުން އަމީނާ ވަނީ އަނެއްކާވެސް ދައުވާއަށް އިއުތިރާފު ވެފައެވެ. 

މި މައްސަލައަކީ ޝަރީއަތުގެ ކުރީގެ މަރުހަލާ ކަޑައްތުކޮށްފައިވާ މައްސަލައަކާށް ވާތީ، ޝަރީއަތުގެ މަރުހަލާގައި ދައުވާއަށް އިއުތިރާފުވީ ނަމަވެސް އިބްތިދާއީ މަރުހަލާގައި ވާ އިއުތިރާފަށް ލިބިގެންދާ ލުއި، މި މައްސަލައިގެ ތެރޭގައި ދައުވާ ލިބޭ ފަރާތަށް ލިބިގެން ނުދާނެ ކަމަށް ކޯޓުން ބުންޏެވެ.

މި ކުށުގެ އަސާސީ އަދަބަކީ ހަތަރު މަހާއި 24 ދުވަހުގެ ޖަލު ހުކުމެކެވެ. 

މި މައްސަލައިގެ ޝަރީއަތުގެ މަރުހަލާގައި ހަތަރު މަހާއި 19 ދުވަސް އަދި ތަހްޤީޤީ މަރުހަލާގައި 16 ދުވަސް އަމީނަ ވަނީ ބަންދުގައި ހޭދަކޮށްފައެވެ. އެ މުއްދަތުން، އަމީނާއަށް ލިބޭ އަދަބުން އުނިކުރުމަށް ބަލާއިރު، އަމީނާ އިތުރަށް ބަންދުގައި ހުންނަން ޖެހޭ މުއްދަތެއް ނެތް ކަމަށް ކްރިމިނަލް ކޯޓުން ވަނީ ކަނޑައަޅާފައެވެ.